Կրթահամալիր ընդունվելուց 3 օր անց թողել է ուսումը. հաստատությունը դատարանով պահանջում է վճարել չարված դասերի համար

Ապրիլին ՀՀ ոստիկանության կրթահամալիր ընդունված եւ շուտով հեռացած Դավիթ Ասատրյանից դասերի երեք օրվա համար 36 հազար դրամ են պահանջում: Դավիթն ասում է՝ այդ ընթացքում դասապրոցես չի կազմակերպվել: Նրա կրթահամալիր ընդունվելը համընկել է մեր երկրում տեղի ունեցող թավշյա հեղափոխության օրերի հետ: Ըստ պայմանագրի՝ Դավիթն ընդունվել է 2018 թվականի ապրիլի 18-ին:

ՀԺ-ի հետ զրույցում 23-ամյա երիտասարդը հայտնեց, որ իրեն հրավիրել են այստեղ սովորելու, սակայն երեք օր անց այլեւս չի ցանկացել ոստիկան դառնալ:

«Անընդհատ զանգում էին, ասում, որ գնամ գործերս տամ: Իրենք էին հրավիրել: Գնացի, այդ երեք օրը տարածքի եւ դասախոսների հետ ծանոթություն էր, դաս չենք արել. երկրում այդ օրերին լարված ու խառը իրավիճակ էր, փոշմանեցի»,- պատմեց նա: Երիտասարդի խոսքով՝ իր այդ որոշման վրա մեծ ազդեցություն է ունեցել Հայաստանում տիրող լարված իրավիճակը, ոստիկանության գործադրած բռնությունները խաղաղ ցուցարարների նկատմամբ:

Նա դիմում է գրել, վերադարձրել այն համազգեստը, որը տրամադրել էին կրթահամալիրում եւ դուրս է եկել: Որոշ ժամանակ անց հաստատությունից զանգահարել են, հայտնել, որ Դավիթը պարտավոր է վճարել այն երեք օրերի համար, որոնք անցկացրել է կրթահամալիրում: «Առաջին երկու օրն եմ գնացել, միայն ծանոթություն է եղել, ինձ ոչ ոք ոչինչ չի սովորեցրել, բայց գումար են ուզում»,- ասաց նա: Ի դեպ, այս հաստատություն ընդունվելն էլ բավարար ծախսատար է. անհրաժեշտ փաստաթղթերը պատրաստելու համար Դավիթից պահանջվել է ընդհանուր առմամբ 40 հազար դրամ վճարել:

Քառօրյա պատերազմի մասնակից Դավիթ Ասատրյանն այս ընթացքում երկրում չի եղել: Կրթահամալիրից դուրս գալուց հետո գնացել է ՌԴ՝ արտագնա աշխատանք կատարելու: Վարձավճարի գործը հասել է դատարան, ապա եւ՝ ԴԱՀԿ, իսկ կրթահամալիրն ունեցած պարտքն օր օրի ավելանում է ու այժմ հասել է 41.200 դրամի: 

ՀՀ ոստիկանության կրթահամալիրի Կադրերի եւ անձնակազմի հետ տարվող աշխատանքների բաժնի պետի տեղակալ, ոստիկանության գնդապետ Գայանե Կարապետյանը հայտնեց, որ Դավիթ Ասատրյանն ինքնակամ է որոշել դադարեցնել կրթությունը, այդ պատճառով է, որ, կարգի համաձայն, պետք է փոխհատուցի յուրաքանչյուր օրվա համար:

Նա նաեւ նշեց, որ ՀՀ ոստիկանության ուսումնական հաստատությունում սովորողն ուսման կամ վերապատրաստման կազմակերպման համար պետության կատարած ծախսերը փոխհատուցում է «Ոստիկանությունում ծառայության մասին» ՀՀ օրենքի 40-րդ հոդվածի 1-ին մասով նախատեսված կետերի համաձայն: Սովորողը, ըստ այդմ, պետության կատարած ծախսերը փոխհատուցում է ուսման կամ վերապատրաստման փաստացի ժամանակահատվածի համար: Կրթահամալիրում սովորողի կողմից փոխհատուցման ենթակա գումարի չափը մեկ օրվա համար կազմում է 6 հազար 9 հարյուր 40 դրամ:

Գայանե Կարապետյանը մեր զրույցում նշեց՝ հաճախ տեսնում է, որ հաստատություն դիմած, ապա կիսատ թողած երիտասարդներն ինչ ֆինանսական վիճակում են ու չեն կարողանում վճարել, ցավ է ապրում, բայց ոչինչ չի կարող անել, կարգն այդպիսին է: «Բանակից հետո հստակ մտածելակերպով, կայացած, զինվորական ծառայություն անցած տղամարդը նախընտրել է այդ մասնագիտությունը եւ հետո գալիս ասում է՝ չէ, սխալ եմ ընտրել, դա արդեն մեր խնդիրը չէ: Մենք ոչինչ չենք կարող անել»,- ասաց ոստիկանության գնդապետը:

Մեր այն դիտարկմանը, թե երիտասարդը վստահեցնում է, որ իր ընդունվելուն հաջորդող օրերին դասապրոցես չի կազմակերպվել եւ ընդամենը ծանոթություն է եղել, Կարապետյանը նկատեց, որ եթե Դավիթ Ասատրյանն ինչ-որ հարցեր ունի, կարող է գնալ կրթահամալիր, որտեղ իրեն ամեն ինչ կբացատրեն ու կներկայացնեն կարգը: Գայանե Կարապետյանը, լսելով, որ պահանջվող գումարը չվճարելու պատճառով գործը ԴԱՀԿ-ում է, խորհուրդ տվեց նման պարագայում գնալ ներկայանալ, վճարման որեւէ ժամանակացույց նշել եւ կասեցնել գումարի աճը: