Հովտաշատում հարձակման են ենթարկվել «Կենտրոն» հը լրագրողն ու օպերատորը. Վարդուհի Մելտոնյան

Արարատի մարզի Հովտաշատ գյուղում 60 մարդ հարձակվել է «Կենտրոն» հեռուստաընկերության «Էպիկենտրոն» լրատվական ծրագրի լրագրող Արթուր Հակոբյանի և նույն լրատվամիջոցը ներկայացնող օպերատորի վրա: Այս մասին ֆեյսբուքի իր էջում տեղեկացրել է հեռուստաընկերության լրատվական բաժնի ղեկավար Վարդուհի Մելտոնյանը։

 Հայաստանի թավշյա հեղափոխության «թավշյա» բարքերը. երբ թիրախում կրկին լրատվամիջոցն է: Այս գրառումից անմիջապես հետո Մելտոնյանը գրել է «Հաղորդում հանցագործության մասին» եւ շարադրել հետեւյալը. «Այսօր՝ օրը ցերեկով, բոլորի աչքի առաջ, Արարատի մարզի Հովտաշատ գյուղի 6 տասնյակից ավելի բնակիչներ, որոնք ավելի շատ ցածրորակ ֆիլմերի երկրորդական պլանի չստացված հերոսակախմբի դերակատարներ են հիշեցնում, իրենց իրավունք են վերապահել 60 հոգով հարձակվել «Կենտրոն» հեռուստաընկերության «Էպիկենտրոն» լրատվական ծրագրի երկարամյա լրագրող Արթուր Հակոբյանի և նույն լրատվամիջոցը ներկայացնող օպերատորի վրա: Եվ չստացված ֆիլմի ժանրի բոլոր կանոններին համաձայն՝ այդ ամենն ուղղորդվել է իսկակական «հերոսակախմբին» վայել ոչ թավշյա՝ բռնի ուժով, թունդ հահոհոյանքներով համեմված լեքսիկոնով, «քուչի տղուն» վայել գռեհակաբանությամբ և սպառնալիքների հորդառատ տեղատարափով:

 Արդյունքում՝ «հրոսակախմբին»  հաջողվել է իրականացնել ինչ-ինչ շրջանակներից ստացված պատվերը, այն է՝ տարածքից չեզոքացնել իրենց «հերոսություններն» անմահացնող նկարահանող խմբին, իսկ ավելի քաղաքակիրթ լեզվով ասած՝ խոչընդոտել լրագրողի մասնագիտական գործունեությունը: Եվ ամենեևին էլ կարևոր չէ, թե ի՞նչ գնով: Հարգելի՛ քաղաքացիներ՝ սա նոր Հայաստանում արձանագրված հերթական դեպքն է, երբ ինչ-ինչ անձինք, տուրք տալուվ իրենց կամ իրենց պատվիրատուի սեփական ամբիցիաներին, թիրախավորում են լրատվամիջոցին՝ փորձելով ոչ միայն սևացնել նրանց բարի համբավը, այլև կասկածի տակ դնել լրագրողի և լրատվամիջոցի պաշտպանված լինելու՝ օրենսդրությամբ ամրագրված իրավունքը: Ի՞նչ է սա, եթե ոչ ամենաթողություն, կամ ամենաթողության վառ դրսևորում: Հովտաշենցիները, ինչպես հասկացանք, պայծառ երևակայություն ունեն...Նոր Հայաստանում, ինչպես Սիցիլիայում, ինչ կա՞ որ...իրենք էլ, երևի սիցիլիական մաֆիայի «կարկառուն» ներկայացուցիչներ են...

Իսկ ավելի լուրջ, այս ամենն արդեն վաղուց ծիծաղելի չէ...Ամենաթողությամբ վարակված յուրաքանչյուր ոք պետք է գիտակցի՝ այդ հիվանդությունը կարող է կործանարար լինել ոչ միայն հենց իրենց՝ այդ հիվանդության վիրուսակիրների, այլև հասարակության առողջ հատվածի համար: Հույս ունեմ՝ բոլոր մեղավորները պատասխան կտան օրենքի առաջ»:

Տեղի ունեցածին նույն հարթակում անդրադարձել է «Իմ քայլը» խմբակցության պատգամավոր Վահագն Թեւոսյանը: Կատարվածի մասին գրել է՝ շա՛տ վատ է: Ըստ Թեւոսյանի, անխտիր բոլոր լրագրողներին կամ լրատվամիջոցներին սիրող մարդիկ կան, թե՝ ոչ, չի կարող ասել: Կա՞ն սիրելու ոչ ենթակա լրագրողներ կամ լրատվամիջոցներ, հարցի պատասխանը յուրաքանչյուրն իր համար պետք է գտնի: Խնդիրը հենց դա է, որ ինչ-որ լրագրողի կամ լրատվամիջոցի սիրել-չսիրելը  մեզնից յուրաքանչյուրի անձնական, անհատական, բոլորովին ներքին խնդիրն է: Իսկ ոչ անձնական հարթությունում ուղղակի ականջներիս օղ պետք է անենք, որ լրատվություն հաղորդելը ինստիտուցիոնալ պարտավորություն է դա անողի կողմից, և հույժ կարևոր անհրաժեշտություն՝ նորմալ պետության ու հասարակության համար:

 «Կա՞ն այդ դաշտում բարդություններ: Ակնհայտորեն կան: Ու եղե՛լ են: Բազմաթիվ անգամներ ասել եմ՝ տեսանելի են նաև դրա բազմաթիվ օբյեկտիվ ու սուբյեկտիվ պատճառները: Դրանք շատերը բարդ, բայց ժամանակի հետ շտկելի են: Բայց նույնիսկ մեծ բարդությունների առկայության դեպքում՝ ով ուզում է հետս համաձայն չլինի, պնդում եմ, լրատվություն հաղորդողին մատով կպնել չի՛ կարելի: Սրա գիտակցման արմատավորումը մեր բանականությունում այսօրվա համար չէ՛ ընդամենը: Դրա նպատակները հեռահար են, միտված վաղվա օրվա նոր մշակույթին, որի սկիզբը հիմա պետք է դնենք: Չե՞ք սիրում լրագրողին՝ մի՛ սիրեք, բայց մի համարձակվեք խանգարել նրան. նա իր գործը սիրվելու համա՛ր չի անում»,-գրել է Թեւոսյանը: