Գաղտնալսումները չգիտեմ ով է արել, բայց օգտագործել են Ռ. Քոչարյանն ու որոշ հհկ-ականներ. Հովհաննես Իգիթյան

«Իմ քայլը» խմբակցությունն այսօր փակ նիստ է հրավիրել: Նիստի ավարտից հետո խմբակցության պատգամավոր Հովհաննես Իգիթյանը պատասխանել է լրագրողների հարցերին:

Ի թիվս այլ հարցադրումների, Իգիթյանն անդրադարձել է նաեւ հայտնի գաղտնալսումներին: Ասել է չգիտի, թե  ով է դա արել, բայց միանշանակ կարող է  ասել, թե ով եւ ինչի համար է օգտագործել: «Ես էլ կարող եմ ասել, դուք էլ գիտեք, թե ինչի համար, ով  է հրապարակել, որ լրատվական միջոցները: Ոնց որ սպասում էին, այդ գաղտանալսումներին եւ սկսեցին օգտագործել թեկուզ պաշտպանության կամ քաղաքական դիվիդենտ շահելու համար: Դա մենք չենք, դուք գիտեք, թե ով է օգտագործել, ով է խոսում նույնիսկ դատական պրոցեսի ժամանակ: Այո, Քոչարյան: Նաեւ ինքը, նախկին հանրապետականները: Ցանկացած քաղաքական գործիչ պետք է մտահոգված լինի, որ ՀՀ պաշտոնյաների խոսակցությունները գաղտնազերծվում են, բայց կան մարդիկ, որ սա ուրախությամբ են ընդունում եւ այնպիսի տպավորություն էր որ եթե այդ գաղնտալսումը չլիներ, կստեղծեին էդպիսի բան»,-ասել է Իգիթյանը:

 Լրագրողները նաեւ հարցրել են Արթուր Վանեցյանի վերջին շրջանում ցուցաբերած ակտիվության մասին: Իգիթյանն ասել է, մի քանի ֆեյսբուքյան գրառումը քաղաքական ակտիվություն չի համարում: «Վանեցյանի անձնական ակտիվությունը քաղաքական տեսակետից չեմ տեսնում, հաճախ որոշ լրատվականներ մի քիչ արհեստական ուշադրություն են տալիս խոսքին: իսկ որ ասում եք Բանեցյանը պատահական մեկը չէ,  ասեմ, որ ՀՀ-ում այնքան ոչ պատահական մարդ կա Վանեցյանից մի քանի մակարդակով բարձր, ՀՀ նախագահներ ունենք, նախարարներ նախկին, օլիգարխներ, եթե ամեն մեկին համարենք ոչ պատահական մարդ, դարձնենք թիվ մեկ օրակարգային հարց, ճիշտ չէ»:

Հասարակությունը դատաիրավական համակարգում ակնկալում է հստակ քայլեր ու փոփոխություններ, սակայն այս պահին իշխանության կողմից կա հապաղում: Ինչու: Իգիթյանն ասել է, որ չկա նման բան: «Իշխանությունն ամեն քայլը համապատասխանեցնում է գործող օրենսդրության հետ: Դատական իշխանությունը մեկ օրում չի կարող փոխվել եւ հենց այդ ճյուղն է մեր մոտ վատ վիճակում: Միշտ խնդիր ենք ունեցել ընտրությունների ձայներ կեղծելու, ձայներ առնելու ադմինիստրատիվ ռեսուրսի հետ: Այդ  հարցը  լուծվեց վերջին ընտրությունների ժամանակ, երբ որեւէ մեկն, այդ թվում ընդդիմադիրը կասկած չունի, որ դեկտեմբերի իննին ունեցել ենք լեգիտիմ ընտրություններ, եւ ըստ այդմ կարող ենք ասել, որ այսօր խորհրդարանը  լեգիտիմ ենք ձեւավորել: Խնդիր ունենք ՏԻՄ ընտրությունների հետ, այսինքն մեր բնակչությունը երկար ժամանակ իրենց ապագան չի կապել  ՏԻՄ-ի հետ: Դա պետք է փոխվի»,-ասել է  Իգիթյանը:

Սահմանադրական դատարանի ճգնաժամը շարունակվում է եւ որպես ելք միակ տարբերակը վաղ կենսաթոշակի անցնելն է: Արդյոք սա իրատեսական է: Ըստ Իգիթյանի, նախկին համակարգում մարդիկ ՍԴ նախագահ էին ընտրվում ցմահ, կամ մինչեւ բավական մեծ տարիքը, եւ մարդիկ իրենց կյանքն այս աշխատանքի հետ էին կապում հավերժ: Հիմա փոխվում է իրավիճակ, եւ մարդը, որը նախկինում երկար տարիներ էր իր կյանքը կապում էր այս աշխատանքի հետ, այժմ պետք է տասներկու տարի աշխատի ՍԴ դատավոր, կամ եթե նախագահ  վեց տարով:

«Ինչ վերաբերում է ՍԴ նախկին անդամներին, այդ հարցը մնում է օրակարգային անկախ այն հանգամանքից մի քանի հոգի կընդունեն այն, թե` ոչ: Հարցը պետք է լուծենք օրենքի սահմաններում: Այսօրվա ՍԴ կառուցվածքը եւ ոճը պետք է համապատասխանի այն սահմանադրությանը, որն իրենք են գրել: Նույն Հրայր Թովմասյանն իր ձեռքով գրել է, որ ՍԴ դատավորն ընտրվում է տասներկու տարով եւ վեց տարի ժամկետով միայն իրավունք ունի լինել դատավոր, այն էլ դատավորների ընտրությամբ: Այսօր խախտվել է ՍԴ բոլոր անդամների եւ դատավորների նախագահ ընտրվելու  իրավունքը: Սահմանադրութան մեջ գրված է, որ նրանք իրավունք ունեն ընտրվեն նախագահ, իրավունքը գրված է: Այսօր, սակայն, իննը հոգի կա այնտեղ, որ զրկված են իրենց այդ իրավունքից: Սահմանադրությամբ իրավունք ունեն, բայց Հրայր Թովմասյանը որոշել է, որ ինքը խրամատ է պահում եւ մինչեւ յոթանասուն տարեկան, այսինքն հավերժ, պետք է լինի նախագահ: Բայց այդ մարդիկ, որ ընտրվել են որպես դատավոր տասներկու տարով, նշանակում է մինչեւ իր պաշտոնավարման ժամկետի ավարտը զրկված է ՍԴ նախագահ լինելուց»,-հարցին պատասխանել է պատգամավորը: