Լրավճարներ չլինելու դեպք չէր եղել 2003 թվականից ի վեր. Լեզվի կոմիտեի մի խումբ աշխատակիցներ դիմում են վարչապետին

ՀՀ կրթության, գիտության, մշակույթի եւ սպորտի նախարարության լեզվի կոմիտեի մի խումբ աշխատակիցներ բաց նամակով դիմում են վարչապետ Նիկոլ Փաշինյանին: Նամակը ներկայացնում ենք ստորեւ:

«Մեծարգո՛ վարչապետ 

Վերջին մեկուկես ամսում դիմում ենք Ձեզ երրորդ անգամ և այս անգամ բաց նամակով, որովհետև նախորդ մեր փորձերը՝ կատարվածի մասին տեղեկացնել անձամբ Ձեզ, անցան ապարդյուն։ Տարօրինակ է, որ մեր նախորդ բողոքները Կառավարությունից երկու անգամ ուղարկվում են ԿԳՄՍ նախարարություն՝ այն պաշտոնյաներին, որոնց դեմ դրանք ուղղված են, ապա գործը փակվում է՝ առանց հարցի պատասխանն ստանալու։ Իսկ հարցը հետևյալն է։

Հակառակ ԿԳՄՍ նախարար Արայիկ Հարությունյանի հրապարակային հայտարարության, թե նախարարության համակարգի բոլոր աշխատողներն ստանում են եռամսյակային լրավճարներ, մենք՝ ԿԳՄՍ նախարարության Լեզվի կոմիտեի աշխատակիցներս, լրավճար չենք ստացել ո՛չ երրորդ, ո՛չ չորրորդ եռամսյակներում։ Չենք ստացել նաև, ինչպես ընդունված է ասել, տասներեքերորդ աշխատավարձ։

Լեզվի կոմիտեի (նախկին Լեզվի տեսչության) գոյության ողջ ընթացքում նման բան չէր եղել 2003 թվականից)։

Ամիսներ առաջ բանը հասել էր նրան, որ նախարարությունը հրաժարվում էր անգամ տրամադրել մեր ամենամյա արձակուրդները: Մեր արձակուրդի դիմումները չէին ընդունում և մեզ առաջարկում էին արձակուրդ գնալ «մեր հաշվին»՝   պատճառաբանելով, թե գումար չկա, և մեր աշխատավարձերը հազիվ են տալիս։

Ըստ մեր ունեցած տեղեկությունների՝ լրավճարների համար նախատեսված  գումարը (միայն երրորդ եռամսյակինը շուրջ 4 միլիոն) դուրս է գրվել, սակայն կոմիտե չի հասել։ Թե ինչո՛ւ, պատասխանը չի տալիս ոչ ոք։ Ավելին, պատասխան է համարվում պատասխան չտալը...

«Նախարարությունը .... այդ առնչությամբ որևէ այլ լրացուցիչ մեկնաբանություն չունի»,- ի պատասխան Ձեզ հղված մեր երկրորդ նամակի՝ գրել է ԿԳՄՍՆ գլխավոր քարտուղար Նաիրի Հարությունյանը՝ այդպես էլ չմեկնաբանելով, թե ո՛ւր են կոմիտեին հատկացված գումարները, և ինչո՛ւ կոմիտեի աշխատողներին լրավճար չի տրվել։

Ի դեպ, փաստարկված որևէ հիմք չունեցող այս պատասխանի մասին մենք գիտեինք նախապես, որի համար էլ դիմել էինք Ձեզ՝ խնդրելով և ակնկալելով Ձեր հանձնարարականը Կառավարության համապատասխան ստորաբաժանումներին՝ տվյալ հարցի հետ կապված հանգամանքները պարզաբանելու, գործին ընթացք տալու համար։ Նման պարագայում առնվազն տարօրինակ է, որ Կառավարության համապատասխան պաշտոնյաները, նախարարությունից ստանալով ոչ մի հիմնավորում չունեցող պատասխան, գործը փակել են։

            Անհասկանալի է նաև, թե մեր առաջին դիմումն ինչո՛ւ էր նախարարությունից ուղարկվել Լեզվի կոմիտե, եթե կոմիտեն չունի իր հաշվապահությունը, և ֆինանսական բոլոր գործարքները կատարում է նախարարությունը: Կարելի է կարծել, որ փորձ է արվում մեղքը բարդել ստորադասների վրա և նրանց ևս ներքաշել ստեղծված պատմության մեջ:

            Այժմ դարձյալ փորձելով մեր նամակը հասցնել Ձեզ՝ մեկ անգամ ևս խնդրում ենք Ձեր հանձնարարականը համապատասխան մարմիններին՝ պարզելու համար տվյալ խնդրի հետ կապված հանգամանքները։

Կարծում ենք՝ համամիտ եք, որ չի կարելի բողոքն ուղարկել այն պաշտոնյաներին, որոնց դեմ դրանք ուղղված են, և հարցը փակել։

Անշուշտ կհիշեք, թե ժամանակին, հատկապես խորհրդային տարիներին որքան է խոսվել այս արատավոր երևույթի դեմ: Նորանկախ մեր պետությունում կար ժամանակ, որ դա արգելված էր օրենքով: Մեր փորձը ցույց է տալիս, որ այդպիսի օրենք ունենալու անհրաժեշտություն կա բոլոր ժամանակներում:

Այսպիսի գործելակերպը նախ և առաջ հարված է ոչ միայն մեր, այլև անձամբ Ձեր, մեր բոլորի նվաճում՝ հեղափոխության թիկունքին:

Կատարվածից մեզ, իհարկե, ոչինչ էլ չի պատահի֊ (ինչպես ժողովուրդն է ասում, ո՛չ կաղքատանանք, ո՛չ էլ կհարստանանք), բայց մի ինչ-որ տեղ ինչ-որ կարևոր բան կկոտրվի… Իսկ դա թույլ չտալու համար գործին առնչվող բոլոր մեղավորները, հուսով ենք, կպատժվեն՝ անկախ զբաղեցրած պաշտոնից և հեղափոխությանը մասնակցությունից:

Այս մասին է, հարգելի՛ վարչապետ, որ ուզում ենք Ձեզ տեղեկացնել:

            Կցում ենք 2019 թ. դեկտեմբերի 17-ին և ս. թ. հունվարի 10-ին Ձեզ ուղարկած մեր նամակների, ինչպես նաև մեզ տրված՝ դրանց պատասխանների պատճենները։

            Առդիր՝ 7 (յոթ) էջ»։

Վարչապետին ուղղված բաց նամակը ստորագրել են հետեւյալ աշխատակիցները.