Լուսաղբյուրի բնակիչը կարծում է՝ «հանրաքվեն շուտ պըտի էնեին». քարոզարշավ Լոռու 7 գյուղերում (լուսանկարներ)

Ապրիլին կայանալիք հանրաքվեի Լոռու մարզի «ԱՅՈ՛» քարոզչական խումբը, որի պատասխանատուն մարզպետ Անդրեյ Ղուկասյանն է, այսօր այցելել է Սպիտակի տարածաշրջանի 7 գյուղական համայնքներ:

Քարոզարշավի առաջին կանգառը Լուսաղբյուր գյուղն էր: Բնակիչներին մարզպետը նախ հանձնեց «ՀՀ հպարտ քաղաքացու անձնագրեր»-ը՝ նախընտրական բուկլետները, որից հետո արդեն ներկայացրեց պետության կողմից կատարված այն բոլոր աշխատանքները, որոնք իրականացվել ու իրականացվելու են Լուսաղբյուրում: Ղուկասյանը խոսեց նաեւ սահմանադրական հանրաքվեին բնակչության ակտիվ մասնակցության մասին՝ նշելով, որ Հայաստանում, հեղափոխությունից հետո, որոշողը քաղաքացին է, հետեւաբար՝ իրենց է տրված այս կարեւոր ու օրակարգային հարցի լուծման բանալին: Լուսաղբյուրի բնակիչներից մեկը, տեղից բացականչեց՝ «Ըդիգ շուտ պտի էնեիք, որ էսքան չոգեւորվեին ու վերջապես հասկանային, որ Հայաստանում իրենք,  իրանց ձեռքով ու իրանց համար գրված օրենքներն էլ տեղ չունեն…»:

Քարոզարշավին եկած գյուղացիները բարձրաձայնեցին նաեւ մի գյուղում դեռեւս առկա խնդիրների մասին:

Հարթագյուղում էլ, ինչպես Լուսաղբյուրում, մարդիկ եկել էին անձամբ մարզպետից լսելու, թե ինչով է կարեւոր սահմանադրական հանրաքվեն ու թե ինչու պետք է հենց «Այո» ասել: Հարթագյուղից հետո քարոզչական խումբը եղավ Սարալանջ համայնքում: Չնայած ցուրտ եղանակին, բնակչությունը հավաքվել էր դպրոցի բակում: Հավաքված մարդիկ վստահեցնում էին՝ ինչպես հեղափոխությունը սկսեցին, այնպես էլ կհասցնեն տրամաբանական ավարտին:

Մեծ Պարնի համայնքում բնակչությունը լսել էր վարչապետ Նիկոլ Փաշինյանի՝ Լոռիում գտնվելու մասին, լուրեր էին հասել, թե իրենց գյուղ էլ է գալու: Վարչապետը չէր եկել, փոխարենը՝ մարզպետն էր ներկա: Խոսելով կատարված աշխատանքների մասին, մարզպետը վստահեցրեց՝ թավշյա հեղափոխությունից հետո յուրաքանչյուրի կյանքում շատ բան է փոխվել ու դեռ փոխվելու. «Թավշյա հեղափոխությունից հետո ինքներդ համոզվեցիք՝ Հայաստանում որոշողը քաղաքացին է, ու այսօր իշխանությունը մեկ անգամ եւս ձեզ որոշում կայացնելու իրավունք է տվել»:

«Այսօր մենք հավաքվել ու գիտակցում ենք, որ վճռորոշ ու վճռական քայլ ենք կատարելու, գիտակցելով, որ գնում ենք սահմանադրական բարեփոխումների, այդ բարեփոխումները լինելու են այսօրվա սերունդների բարեկեցության եւ վաղվա սերունդների բարօրության համար: Սահմանադրական բարեփոխումները լինելու են Հայաստանի վաղվա ազատության, անկախության ու անվտանգության համար, այդ սահմանադրական բարեփոխումները լինելու են ժողովրդի իրավունքի պաշտպանության համար: Այլեւս Հայաստանի Հանրապետությունում, ինչպես նախկին իշխանությունների օրոք էր, ամենանաթողության ու անպատժելիության մթնոլորտ, չպետք է լինի»,-իր ելույթում նշեց Մեծ Պարնի գյուղի բնակիչ Արմեն Բադալյանը:

Ծաղկաբերում, որտեղ հեղափոխությունից հետո, պետական աջակցությամբ բազմաթիվ լուրջ ծրագրեր են իրականացվել, սպասում էին թե՛ մարզպետի այցին, ու թե՛ նախընտրական քարոզչական խմբին: Զրույցի թեման նույնն էր՝ գյուղի խնդիրներ, արված աշխատանքներ ու ապագա անելիքներ, սահմանադրական հանրաքվեի մասնակցություն, որին քարոզչությանը եկած ծաղկաբերցիները, իրենց վստահեցմամբ, «Այո» են ասելու. «Ինչքան «Ոչ»-ին արժանի բան կար՝ 2 տարի առաջ ասել ենք, հիմա «Այո»-ի ժամանակն է», իսկ թե ինչու պետք է ասեն՝ այսպես մեկնաբանեցին. «Հեղափոխությունից հետո գյուղում էնքան բան ա փոխվել, թեկուզ հենց այդ փոփոխությունների, որակյալ ասֆալտապատման, իրականացված ծրագրերի ու գյուղացիներին պետության կողմից դարձվող ուշադրության համար»:

լուսանկարները՝ «Հայկական ժամանակ»-ի