Կապանում ձերբակալված երրորդ քաղաքացին եւս ազատ արձակվեց. նրա ձերբակալումը ճանաչվել է ոչ իրավաչափ

Երեկ՝ մայիսի 24-ին, Կապանում ձերբակալված երրորդ քաղաքացին՝ Խորեն Միրզոյանը, քիչ առաջ ազատ արձակվեց:

«Հայկական ժամանակ»-ի հետ զրույցում նրա պաշտպան Հովսեփ Սարգսյանը տեղեկացրեց, որ Երեւանի ընդհանուր իրավասության դատարանը, դատավոր Վարդան Լ. Գրիգորյանի նախագահությամբ, բավարարեց իր բողոքը՝ ոչ իրավաչափ ճանաչելով Միրզոյանը ձերբակալման որոշումը: Ըստ Սարգսյանի՝ իր պաշտպանյալը նախապես ծանուցված չի եղել, փողոցից բռնել, տարել են բաժին, ապա՝ ձերբակալել. «Դատարանը գտել է, որ բացակայել է ձերբակալման նպատակը»,- նշեց Սարգսյանը:

Խորեն Միրզոյանը կասկածվում է ՀՀ ՔՕ-ի 131-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ, բռնության գործադրմամբ անձին առեւանգելու մեջ, պաշտպանի խոսքով՝ կասկածանքը չի ընդունում. «Ակնհայտ անհիմն ձերբակալում էր, պատրաստվում են մեղադրանք առաջադրել, դա էլ է անհիմն»: Հարցին՝ պաշտպանական կողմին հայտնի՞ է՝ արդյոք նրան արդեն մեղադրանք են առաջադրել, Հովսեփ Սարգսյանն ասաց, որ իրենց հայտնի չէ, բայց  քննիչները հայտարարել են, որ որոշումները պատրաստ են. «Դեպքը մի ամիս առաջ է տեղի ունեցել, այդ ենթադրյալ մարդը, որ ցուցմունք է տվել, ասել է, թե իր վրա կրակել են, բայց դատաբժշկական փորձաքննությամբ կրակոցի հետքեր չեն հայտնաբերվել, իսկ նրա վրա անգամ թեթեւ վնասվածքի հատկանիշներ չպարունակող քերծվածքներ են, եղունգի ճանկռածներ»,- նշեց նա:

Այսօր ազատ էին արձակվել մյուս երկու ձերբակալվածները եւս: Նրանց ձերբակալման որոշումները դատարանի որոշմամբ ոչ իրավաչափ են ճանաչվել:

Հիշեցնենք՝ երեկ դիմակավորված և զինված ոստիկանները ձերբակալել են Քաջարանի համայնքապետի մերձավոր շրջապատից 4 անձի: Ըստ լրատվամիջոցների հրապարակումների եւ քաղաքացիների ահազանգերի՝ նրանց նկատմամբ բռնություն է կիրառվել: Դրա առնչությամբ ՀՀ ոստիկանության պետ Արման Սարգսյանի հանձնարարությամբ ոստիկանության ներքին անվտանգության վարչությունում նշանակվել է ծառայողական քննություն:

Ուշ երեկոյան արդեն պաշտոնական հաղորդագրությամբ հանդես եկավ Քննչական կոմիտեն՝ հայտնելով, որ ՔԿ հատկապես կարևոր գործերի քննության գլխավոր վարչությունում քննվող քրեական գործի նախաքննության ընթացքում պարզվել է, որ Քաջարանի բնակիչներ Գ․ Մ․-ի և նրա ընկերոջ՝ Կ․ Թ․-ի միջև տեղի ունեցած վեճի հանգամանքների պարզաբանման համար Քաջարան համայնքի ղեկավարի կանչով 2020թ. ապրիլի 26-ին՝ ժամը 20:00-ի սահմաններում, Քաջարանի Լեռնագործների փողոցում գտնվող չգործող ռեստորանի շինությունում հավաքվել են համայնքի ղեկավարը և շուրջ 20 հոգի, որտեղ տեղի է ունեցել ծեծկռտուք։

Հաղորդագրությունից պարզ է դառնում, որ ազատ արձակված նշված երեք անձինք Զանգեզուրի պղնձամոլիբդենային կոմբինատի աշխատակիցներ են, որոնք, ըստ ՔԿ-ի, 2020թ. ապրիլի 29-ին՝ ժամը 13:30-ի սահմաններում, նույն կոմբինատի աշխատակից Բ․ Հ․-ի հետ միասին, կոմբինատի ավտոկայանատեղիում բռնություն գործադրելով, առևանգել են Շ. Մ․-ին, տեղափոխել «Աժդանակ» ՍՊԸ-ի տարածք, որտեղ Ա․ Հ․-ի և Գ․ Մ․-ի հետ ծեծի ենթարկել նրան. «Շուրջ կես ժամ ծեծելուց հետո Շ. Մ․-ին «Տոյոտա-Պրադո» մակնիշի ավտոմեքենայով տեղափոխել են Ագարակ բնակավայրում գտնվող, Ա․ Պ․-ին պատկանող առանձնատուն, որտեղ կրկին ծեծել են նրան, ինչին միջամտել են Շ. Մ․-ի եղբայրը՝ Գ. Մ․-ն և Ա․ Փ․-ն, ինչպես նաև ինքնությունները չպարզված անձինք, ինչի հետևանքով ծեծկռտուքը դադարել է: Քրեական գործի նախաքննության ընթացքում Ա․ Պ․-ի բնակության վայրում կատարված խուզարկությամբ հայտնաբերվել է առանձնապես խոշոր չափի «մարիխուանա» տեսակի թմրամիջոց»,- ասված էր հաղորդագրության մեջ: