Ավագանու «Իմ քայլի» անդամն առաջարկում է ամեն նիստին հարցուպատասխան չանել, փոխարենը՝ նոր բաժին ավելացնել. «Լույսը» դեմ է

Երեւանի ավագանու «Իմ քայլը» խմբակցության անդամ Էդուարդ Ավետիսյանը նախագիծ է ներկայացրել՝ առաջարկելով փոփոխություն կատարել Երեւան քաղաքի ավագանու որոշումներից մեկի մեջ: Ավետիսյանն առաջարկում է փոփոխել օրակարգային հարցերի քվերակությունից հետո անցկացվող հարցուպատասխանի կարգը: Ավագանու հաջորդ՝ հունիս 24-ի նիստին քննարկվելու է ներկայացվող նախագիծը:

Ավագանու անդամը առաջարկում է հարցուպատասխան անցկացնել ոչ թե յուրաքաչյուր նսիտից հետո, այլ երկու ամիսը մեկ անգամ (Երեւանի ավագանու նիստերն անցկացվում են ամիսը մեկ անգամ, որին պարտադիր հաջորդում է հարցուպատասխանը):

Ավագանու «Իմ քայլը» խմբակցության անդամի այս առաջարկը, սակայն, բոլորովին դուր չի եկել ավագանու ընդդիմադիր թեւին՝ «Լույս» խմբակցության անդամներին: Այս խմբակցությունը ներկայացնող Անի Խաչատրյանը «Հայկական ժամանակ»-ի հետ զրույցում նշեց, որ իրենց խմբակցության բոլոր՝ երեք անդամներն էլ դեմ են քվեարկելու այդ նախագծին, քանի որ առավել մեծ կարեւորություն են տալիս օրակարգային հարցերին հաջորդող այդ ձեւաչափով քննարկումներին:

«Անցած գումարման ավագանիներում՝ Տարոն Մարգարյանի եւ նրան նախորդած քաղաքապետերի ժամանակ, հարցուպատասխանը երկու ամիսը մեկ էր, եւ հենց «Լուսյ» խմբակցությունը բերեց նախագիծ՝ այն դարձնելով յուրաքանչյուր նիստին: Հիմա նորից փոխում են, եւ սա խնդիր է»,- ասաց Անի Խաչատրյանը:

Նշենք, որ սա միակ փոոփոխությունը չէ: Առաջարկվող նախագծով նոր հարթակ է տրամադրվելու ավագանու անդամներին, սակայն մի փոքր այլ ֆորմատով: Խաչատրյանը նշեց, որ մնացած առաջակվող փոփոխություններն ու հարցերը քննարկման ենթակա են, իրենք միայն խնդիր են տեսնում հարցուպատասխանները երկու ամիսը մեկ իրականացնելու մեջ:

Ըստ ավագանու «Լույս» խմբակցության անդամի՝ առաջարկվող նման փոփոխությունները ավագանու «Իմ քայլի» անդամները պատճառաբանել են նաեւ վարչական շրջանների ղեկավարների՝ յուրաքանչյուր ամիս մեկ ամբողջ օր կորցնելով: «Թաղպետներն ընդամենը 9 անգամ են գալիս ժամը երկուսից հետո, մի քանի ժամ են կորցնում, որը կարծում եմ՝ նորմալ է, իրենք պարտավոր են ավագանու առաջ հաշվետվություն ներկայացնել: Հարցուպատասխանի ժամանակ ավելի շատ հարցեր են քննարկվում, քան բուն օրակարգային հարցերի»,- ասաց Խաչատրյանը:

Նկատենք՝ Երեւանի քաղաքապետարանի նիստերում իրապես ամենաակտիվ ու անկաշկանդ, երբեմն նույնիսկ տարբեր սահմաններ հատող քննարկումները տեղի են ունենում հենց հարցուպատասխանների ընթացքում: Նախադեպեր ունենք, երբ դրանք այնքան բուռն են ընթացել, որ ավարտվել են թեժ լեզվակռիվներով ու փոխադարձ վիրավորանքներով՝ հասնելով ընդհուպ մինչեւ ծեծկռտուքի:

Անի Խաչատրյանը շեշտեց, որ «Իմ քայլը խմբակցությունը մյուս՝ նախորդ գումարման խմբակցություններից տարբերվում է, քանի որ իրենք էլ են հարցեր տալիս, ակտիվ քննարկումներ անում: Նախորդների ժամանակ սա չի եղել: «Լիահույս եմ, որ «Իմ քայլի» գերակշիռ մասը դեմ կքվեարկի այդ նախագծին, որովհետեւ բոլոր նիստերին լինում են իրենց հետաքրքրող քննարկումներ»,- եզրափակեց նա:

«Հայկական ժամանակը» նախագիծն առաջ քաշած Երեւանի ավագանու «Իմ քայլը» խմբակցության անդամից խնդրեց մանրամասնել, թե ինչ փոփոխություններ է առաջարկում:

Էդուարդ Ավետիսյանը նշեց, որ ավելացվելու է նոր՝ մտքերի փոխանակման բաժին, որը հաջորդելու է օրակարգային հարցերին: Օրակարգային հարցերը սպառելուց հետո ավագանու անդամները կարողնալու են ելույթ ունենալ ցանկացած թեմայով, որի հնարավորությունը մինչեւ այս չունեին: Կոնկրետ ժամ հատկացված չէ նոր բաժնի համար, տեւողությունը կախված է նրանից, թե քանի հոգի կհերթագրվի ելույթների համար: Յուրաքանչյուր աձնի ելույթների տեւողությունը չի կարող գերազանցել 5 րոպեն: Ավետիսյանը նաեւ շեշտեց՝ դրանք միայն ելույթներ են լինելու, արձագանքելու-պատասխանելու հնարավորություն չի լինի:

«Սրա կարիքը տեսել ենք, որովհետեւ շատ ասելիք է լինում այն հարցերի շուրջ, որոնք օրակարգային հարցերի մեջ չեն մտնում, ու մինչեւ այս ավագանու անդամներն այդ հարցերի մասին ստիպված խոսել են օրակարգային հարցերի քննարկման ժամանակ, այսինքն՝ թեմայից շեղվելով»,- ասաց նա:

Ինչ վերաբերում է հարցուպատասխանի հնարավարությունը սահմանափակելու հեռանկարն ընդդիմադիր գործընկերների դեմ լինելուն, ապա ասաց. «Մենք հենց իրենց առաջարկով կարգը փոխեցինք եւ գրեթե մեկ տարի է՝ հարցուպատասխանն անում ենք երկու ամիսը մեկ անգամի փոխարեն ամեն ամիս: Կարծում ենք, որ այժմ կարիք կա նախորդ ձեւին վերադառնալու, քանի որ նոր բաժին ենք ավելացնում նիստի ընացքում, ժամանակը երկարում է»:

Այժմ նաեւ բալանսավորելու են օրակարգային հարցերի քանակը. եթե նիստին լինելու է հարցուպտասխան, ապա այդ անգամ հարցերի քանակն էապես կնվազի: «Մեզ մոտ եղել են նիստեր, երբ մինչեւ գիշերվա 10-ն են տեւել, ու եթե նոր բաժին էլ ենք ավելացնում, փաստացի մոտ երկու ժամ կամ ավելի դա կարող է գումարվել, իսկ այդպես աշխատակազմին շատ անհարմար է»,- ասաց նա:

Ավետիսյանը նաեւ նկատեց՝ ըստ կանոնակարգի՝ ավագանու անդամները կարող են հարց տալ զեկուցողին, բայց զեկուցողի պատասխանից հետո արձագանքի իրավունք չունեն, պարզապես քաղաքապետ Հայկ Մարությանը շատ ժամանակ բարի կամքի դրսեւորումով թույլ է տվել, որ ավագանու անդամներն արձագանքեն: Այժմ կանոնակարգով ամրագրելու են, որ ավագանու անդամն իրավունք ունենա 2 րոպե հարց տալու, ապա զեկուցողը 3 րոպե պատասխանի, ավագանու անդամն էլ կրկին 1 րոպե արձագանքի: «Մոտավորապես բերում ենք Ազգային ժողովի ֆորմատին»,- ասաց նա:

Նաեւ համոզմունք հայտնեց, որ առաջարկին մանրամասն ծանոթնանալուց հետո մյուս բոլոր խմբակցություններն էլ կողմ կքվեարկեն:

«Կարող է ընդդիմադիր կողմը ասի, թե վախենում ենք հարցերից, փորձում ենք իրենց լռեցնել, բայց փաստացի նոր հարթակ ենք տրամադրում, որ ինչ թեմայից ուզում են, խոսեն եւ լինեն ավելի ազատ»,- եզրափակեց նա: