Սեւանում այրել են քաղաքացու մեքենան. նա դա քաղաքապետին քննադատելու արձագանք է համարում, քաղաքապետը բացառում է դրանց կապը

Հունիսի 16-ի առավոտյան՝ ժամը 4-ի սահմաններում այրել են Գեղարքունիքի մարզի Սեւան քաղաքի բնակիչ Արտակ Տեր-Գրիգորյանի մեքենան (Toyota camry): Քաղաքացին արթնացել է տագնապած հարեւանների դռան թակոցից, որոնք էլ վերջինիս հայտնել են այդ լուրը:

«Պատուհանից տեսա կարմիր լույսն ու միանգամից հասկացա, որ դա այրվող մեքենաս է: Հնարավոր է, որ դա արվել է մի քանի օր շարունակ իմ կողմից արված տարբեր տեսաուղերձների պատճառով, որոնք ուղղված են եղել Սեւանի քաղաքապետի անգործությանը: Փաստորեն, օրեր շարունակ որեւէ արձագանք չստացած իմ բարձրացրած խնդիրների արձագանքն այսպիսին էր: Սա եղավ, երբ սկսեցի խոսել Սեւանի քաղաքապետի անգործության, ներդրումների ներգրավմանը խոչընդոտելու ու քաղաքի թշվառ վիճակի մասին»,- վրդովված պատմեց Արտակ Տեր-Գրիգորյանը: Վերջինս ՀԺ-ի հետ զրույցում մանրամասնեց նաեւ իր տեսաուղերձներն ու վերջին շրջանում Սեւան քաղաքում կատարվող խնդրահարույց երեւույթները:

Մեքենան այրելու մեջ քաղաքացին կոնկրետ անձի չի կասկածում: Մեր զրույցում նշեց, որ ոչ մեկի հետ որեւէ անձանական խնդիր կամ կոնֆլիկ երբեւէ չի ունեցել եւ բացառում է, որ ինչ-որ մեկը կարող էր այդ քայլին դիմել անձնական դրդապատճառներից ելնելով: Նրա խոսքով՝ միակ հավանական տարբերակը՝ այս մեթոդով իրեն լռեցնել է:

Հարեւանները զանգահարել են 911 ծառայություն: Կրակը հանգցնելուց հետո մեքենայի դիմացի հատվածն ամբողջովին այրված է եղել: «Գլխավոր մասնագետն իր բանավոր կարծիքը հայտնեց, որ ակնհայտորեն մեքենան վառված է դիտավորությամբ, ասաց, որ իրենք կզեկուցեն նաեւ ոստիկանություն»,- պատմեց Տեր-Գրիգորյանը՝ հավելելով որ ինքը ոստիկանություն չի դիմել:

Տեղի ոստիկանությունից դեռ չեն արձագանքել կատարվածին, ոչ էլ գնացել են դեպքի վայր: Քաղաքացին նկատեց՝ հույս էլ չունի, թե տեղի ոստիկանությունը գործին ընթացք տա կամ բացահայտի, թե դա ում ձեռքի գործն է:

Արտակ Տեր-Գրիգորյանը Թավշյա հեղափոխությունից հետո արտերկից Հայաստան ներգաղթած քաղաքացիների թվին է պատկանում: Ռուսաստանի Դաշնությունից Հայաստան է վերադարձել 2018 թվականի մայիսին: Մեծ ներդրումային ծրագրով ու բազմաթիվ նպատակներով, որոնք սակայն մինչեւ օրս չի կարողանում իրականացնել: Ըստ նրա՝ խոչընդոտում են տեղի քաղաքային իշանությունները:

«Սեւանի համար հսկայական ներդրումային ծրագիր էինք բերել, որը տեղի համայնքապետարանի կողմից որեւէ աջակցություն չստացավ, մեզ անգամ չուղղորդեցին, թե որ պատական մարմններին դիմենք: Ահռելի մեծ սոցծրագիր էինք անելու: Ներդրումային ծրագրով ստեղծվող կազմակերպությունն ամեն տարի 1 միլիոն դոլար էր նվիրաբերելու քաղաքին, բայց դա տապալվեց: Մարզպետարանը, որտեղ գնացել ու տեղեկացրել էի ծրագրի մասին, ոչինչ չարեց, եւ իրենք, եւ Սեւանի քաղաքապեարանը շահագրգռված չեն որեւէ լավ բան անելու: Երեկ մարզպետի մոտ էի, լսեցի, որ անգամ դա չի զեկուցվել իրեն, հանցավոր անգործություն է տիրում»,- ասաց մեր զրուցակիցը:

Քաղաքացու համոզմամբ՝ Սեւանի քաղաքապետ Սարգիս Մուրադյանի «տիրապետության» տակ գտնվող քաղաքում ոչինչ էլ հնարավոր չի լինի անել: Ավելին՝ այստեղ չեն լուծվում անգամ մարդկանց ֆիզիկական անվտանգության հետ կապված տարրական խնդիրները: Քաղաքի հրապարակից դեպի շուկա գնացող գլխավոր ճանապարհի հետիոտնային անցումի մասին է խոսքը, որտեղ անգամ նորմալ լուսացույց չկա, ինչն էլ վրաերթերի պատճառ է դառնում:

Քաղաքացին պատմեց, որ անցումի թերի լինելու պատճառով 2019 թվականին վրաերթի են ենթարկվել վերջինիս կինն ու 10 տարեկան երեխան, կինը ծանր մարմնական վնասվածքներով տեղափոխվել է հիվանդանոց: Դրանից հետո եւս երկու նման դեպք է գրանցվել այլ անձանց երեխաների հետ: «Բարձարձայնեցի խնդիրը, բայց շարունակվում է չլուծվել: Ոչ մի կերպ չենք կարողնում հասել հետիոտնային անցման անվտանգությունն ապահովելուն: Ի՞նչ անենք, դա՞ էլ վարչապետի մակարդով լուծել տանք»,- ասաց Արտակը՝ հավելելով քաղաքապետը ոչինչ չի անում, իսկ նրա հասցեին հնչած քննադատությունները անհետեւանք չեն մնում:

Ըստ մեր զրուցակցի՝ վերը նշված եւ բազմաթիվ նմանատիպ խնդիր տեւական ժամանակ է բարձրաձայնում է ֆեյսբուքյան տեսանյութերի միջոցով, սակայն դրանց ոչ մի արձագանք չի տրվում քաղաքապետի կողմից: Խնդրիրների լուծումը հենց նրա տիրույթում են:

Բացի դա, Արտակ Տեր-Գրիգորյանը հայտնեց, որ Սեւան քաղաքում ծայրահեղ անառողջ ու վախի մթնոլորտ է սկսել տիրել: Քաղաքացու խոսքով՝ իր խնդրիները բարձրաձայնող իր տեսանյութերի տակ անհարկի արտահայտություններ, անգամ որոշ դեպքերում սպառնալիքներ են հնչում:

«Ամբողջ քաղաքը խոսում է նրա մասին, որ իրենց կարծիքը արտահյտող անձանց վախեցնում եւ ահաբեկում են, անգամ դա հասնում է նրան, որ մարդիկ ջնջում են սեփական  մեկնաբանությունները, քանի որ վախենում են աշխատանք կորցնել կամ խնդիրներ ունենալ: Վախի մթնոլորտում որոշները ստիպված են լինում լռել անգամ ամենահրատապ հարցերի մասին»,- ասաց նա:

Վերջինիս խոսքով՝ բարձրաձայնված հարցերի նկատմամբ բացարձակ անգործություն ու անտարբերություն է ցուցաբերում քաղաքապետ Սարգիս Մուրադյանը:  Քաղաքացին նշում է՝ Սեւանում չկա ո՛չ երաժշտական դպրոց, ո՛չ սպորտ դպրոց,  ո՛չ էլ արվեստի կամ մշակույթի հետ առընչվող կենտրոն:

«Ոչ մի բան գոյություն չունի այստեղ, անգամ հարեւան գյուղերն են քաղաքից լավ: Երեխայիս տանում եմ հարեւան՝ Լճաշենի երաժշտական դպրոց: Պատմության մեջ միշտ հակառակն է եղել, մարդիկ գյուղերից էին քաղաք տանում երեխաներին: Գյուղապետերը շենացնում են, տեր կանգնում իրենց գյուղերին, իսկ այս քաղաքն օր օրի մեռնում է»,- ասաց նա՝ հավելելով, որ Սեւանում քաղաքապետը խնդիրները չի լուծում, այլ լռեցնում է մարդկանց ահաբեկելով:

Այրված մեքենայի ու քաղաքացի Արթուր Տեր–Գրիգորյանի հայտարարությունների մասին «Հայկական ժամանակը» մեկնաբանություն խնդրեց Սեւանի քաղաքաետ Սարգիս Մուրադյանից: Վերջինս մեր զրույցում հայտնեց, որ արդեն տեղյակ է կատարվածի մասին, որով զբաղվում են նաեւ իրավապահ մարմինները: Իսկ ինչ վերաբերում է քաղաքացու պնդմանը, թե դա քաղաքապետի կողմից իրեն լռեցնելու քայլ է, Մուրադյանը ասաց. «Անլուրջ եմ վերաբերում նման հայտարարություններին: Լիահույս եմ, որ իրավապահ մարմինները շատ արագ կբացահայտեն ու պարզ կդառնա, թե ով ինչի համար է մեղավոր: Մի բան կարող եմ ձեզ հստակ ասել՝ եթե ես որեւէ քայլ եմ արել, որը օրենքի շրջանակներից դուրս է, պատրաստ եմ պատասխանատվությյուն կրել»:

Իսկ ինչ վերաբերում է քաղաքում իր կատարած աշխատանքներին, ապա նշեց, որ դրա գնահատականը ժողովուրդը կտա:

Մեր դիտարկմանը, թե որոշ մարդիկ վստահեցնում են, որ խնդիրների մասին բաձրաձայնողներն ահաբեկվում ու լռեցվում են, քաղաքապետն ասաց. «Սեւանում չի կարող վախի մթնոլորտ լինել, անգամ չգիտեմ, թե ինչի մասին է խոսքը: Բայց կրկնում եմ, եթե մարդիկ ունեն ապացույցներ քաղաքապետի հանցավոր անգործության կամ ապօրինությունների հետ կապված, խնդրեմ, թող դիմեն իրավապահ մարմիններին, դրա ամենաճիշտ պատասխանը իրենք կտան»:

Անդրադառնալով իր հասցեին հնչող քննադատություններին՝ Մուրադյանը նկատեց՝ 25 հազար բնակչություն ունեցող քաղաքում դա նորմալ է՝ կաող է լինել ե՛ւ առողջ քննադատութուն եւ կեղծ, ե՛ւ դժգոհողներ, ե՛ւ գոհ մարդիկ: Քաղաքապետը սակայն նկատեց, որ եթե նմանատիպ գործընթացները երկար տեւեն, ապա զրպարտության, անհիմն մեղադրանքների ու իր բարի համբավը արատավորելու համար պատասխանատվության կենթարկվեն դրանք տարածողները:

Մեր ճշտող հարցին, թե Սեւան քաղաքն ունի՞ երաժշտական դպրոց եւ սպորտ դպրոց, ասաց. «Սեւան քաղաքան ունի ե՛ւ երաժշտական դպրոց ե՛ւ մարզադպրոց եւ էլի շատ ձեռքբերումներ: Կոռեկտ չեմ համարում դրանք թվարկել, բայց ձեզ մեկ բառով կասեմ՝ Սեւանում վերջին մի քանի տարիների ընթացքում բեկումնային փոփոխություններ են տեղի ունեցել, որի մասին համոզված եմ մեր ազգաբնակչության ճնշող մեծամասնությունը գիտի ու կասի»: