Առանց դիմակների ու առանց սոցիալական հեռավորության կյանք․ պատվաստանյութ կլինի

Հայաստանն այժմ աշխատանքներ է տանում COVID-19-ի դեմ հակավիրուսային դեղեր ձեռք բերելու ուղղությամբ։

Մամուլի ասուլիսի ժամանակ ՀՀ առողջապահության նախարար Արսեն Թորոսյանը թվարկեց․ «Ռեմդեսիվիր»-ի խմբաքանակը մեկ շաբաթից կամ 10-ը օրից այստեղ կլինի, ճապոնական «Ֆավիպիրավիր» ենք ստացել, որի կիրառումը շուտով կսկսվի։ Այժմ բանակցում են՝ ռուսական «Ավիֆավիր» դեղամիջոցը ստանալու համար։

Այլ է իրավիճակը պատվաստանյութերի հետ կապված։ Հանրային առողջության մասնագետներն այսօր կարծում են՝ այն ամեն դեպքում լինելու է, մինչդեռ, ըստ նախարարի, համավարակի սկզբում հարցի հետ կապված անորոշություն էր։ Դա միակ բանն է լինելու, որ թույլ կտա վերադառնալ առանց դիմակների, առանց սոցիալական հեռավորության կյանքին:

Աշխարհում մշակվում է մոտ 200 պատվաստանյութ, որոնցից 20-ը վերջնական արդյունքի մեծ հնարավորություն ունի։ Դրանցից է, օրինակ, «Մոդեռնա» ընկերության արտադրանքը։

Ձեռք բերման ուղղությամբ բանակցություններ ընթանում են, սակայն՝ նախնական, Թորոսյանը առկա անորոշություններն է նշում։ Տարբեր երկրներ ի սկզբանե գնում են դեռ չարտադրված կամ արտադրված, բայց՝ չհաստատված պատվաստանյութերի մեծ խմբաքանակներ:

Օրինակ՝ անգլիական մի պարբերական գրել է, թե Մեծ Բրիտանիան 500 մլն ֆունտով ապագա պատավաստանյութ է գնել։ Նախարարը նկատեց՝ նշանակում է՝ այլ պետությունների դա չի հասնի, քանի որ ենթադրաբար նրանք ուշացել են։

Նա այս ամենը համեմատեց սառը պատերազմի ժամանակների հետ, մի դեպքում բոլորը փորձում էին նոր զենքեր արտադրել, հիմա էլ՝ դեռ չարտադրված, չհաստատված պատվաստանյութերի խմբաքանակներ գնել, տարբեր տեղեկություններով՝ գումարը նախապես վճարելով: 

«Մենք որոշել ենք առնվազն սկսել այդպիսի խոսակցություններ թե՛ ուղիղ արտադրողների, թե՛ հավաքական գնորդների հետ, ինչպիսիք են ԱՀԿ-ն, ՅՈՒՆԻՍԵՖ-ը, ԳԱՎԻ-ն, որոնք կարող են միանգամից 100 երկրի համար գնել մեկ մեծ խմբաքանակ եւ հավասարաչափ բաշխել»,- նշեց Թորոսյանը՝ ավելացնելով՝ սա թույլ կտա ապահովել հավասարություն, արդարություն։

Ինչ վերաբերում է անվտանգությանը, պատվաստանյութերը փորձարկվում են, եւ գնահատվում է 3 հիմնական կետ․ ինչքանո՞վ են դրանք առաջացնում հակամարմիններ, արդյոք չե՞ն առաջացնում այլ վտանգներ եւ որքանո՞վ են իջեցնում վարակվածության տոկոսը։

«Բազմիցս նշել եմ, հիմա էլ հաստատում եմ՝ վակցինաները մարդկության պատմության մեջ հայտանաբերված ամենաանվտանգ բժշկական միջամտություններն են»,- նկատեց նախարարը։

Նրա խոսքով՝ ճիշտ օգտագործման, հակացուցումները ճիշտ պահպանելու դեպքում դրանք ընդհանրապես մարդ չեն սպանում։ «Մենք երկար տարիներ պատվաստումների որեւէ լուրջ կողմակի էֆեկտ չենք ունեցել ու աշխատելու ենք չունենալ»։