Անկարայի միջամտությունը շատ մտահոգիչ է. Հունաստանի ԱԳ նախարարը վստահ է՝ պետք է տարբերակվեն բոցի վրա յուղ լցնողները

«Ինձ համար մեծ հաճույք է բարեկամների միջավայրում գտնվել այստեղ՝ Երեւանում: Մենք երկար կուռ հարաբերությունների նախապատմություն ունենք, հարաբերություններ, որոնք հիմնված են կուռ պատմական հիմքերի վրա: Ուստի իմ ներկայությունն այստեղ, սիրելի Զոհրաբ, խորհրդանշում է իմ բարեկամությունը ձեզ եւ հայ ժողովրդին». Հունաստանի ԱԳ նախարար Նիկոս Դենդիասն այսպիսի խոսքերով սկսեց ՀՀ արտգործնախարար Զոհրաբ Մնացականյանի հետ համատեղ մամուլի ասուլիսը:

Աշխատանքային այցով Հայաստանում գտնվող Հունաստանի արտգործնախարարը տեղեկացրեց, որ մինչ ԱԳՆ գալը եղել է Ցեղասպանության զոհերի հուշահամալիրում եւ հարգել նրանց հիշատակը:

Նախարարը վստահ է՝ այս ողբերգական եղելությունների հիշողությունը չպետք է մոռանալ, որպեսզի այդօրինակ ոճիրները չկրկնվեն երբեւէ:

Այնուհետեւ տեղեկացնելով, որ ՀՀ արտգործնախարարի հետ քննարկել են ինչպես տարածաշրջանային, այնպես էլ երկկողմ հարաբերություններին վերաբերող հարցեր՝ Դենդիասը նկատեց. 

«Մենք ջանք չենք խնայում՝ ամրացնելու մեր կուռ հարաբերությունները է՛լ ավելի, մասնավորապես՝ տնտեսական ասպարեզում, որտեղ շատ տեղ կա դեռ ընդլայնելու»:

Անդրադառնալով արցախյան հարցի շուրջ քննարկմանը՝ Դենդիասը տեղեկացրեց. «Ես ուշադիր ունկնդրեցի նախարարի վերլուծությունը Հարավային Կովկասում շատ մտահոգիչ բռնկումների վերաբերյալ: Աթենքից մենք հետեւում ենք այդ զարգացումներին խիստ սերտորեն: Մենք ողջունում ենք Մոսկվայում բանակցած հրադադարի լուրը, մեզ շատ մտահոգում են դրա խախտումները: Թույլ տվեք կրկնել՝ հրադադարը պետք է խստիվ հարգվի: Մենք համարում ենք, որ տեւական լուծումներին կարելի է հասնել միայն դիվանագիտական միջոցներով, վերադառնալով բանակցությունների սեղան՝ Մինսկի խմբի համանախագահների հովանու ներքո, միջազգային կուռ հիմքերի վրա»:

Հունաստանի արտգործնախարարը չշրջանցեց նաեւ հակամարտության սրման վրա յուղ լցնողներին:

«Վճռական կարեւոր է, որ միջազգային հանրությունը հստակ տարբերակում մտցնի նրանց միջեւ, ովքեր յուղ են լցնում լարման եւ բոցի վրա, եւ նրանց, ովքեր որդեգրում են կառուցողական մոտեցում եւ մնում վեճերի լուծման խաղաղ լուծմանը հավատարիմ: 

Բացարձակապես հստակ է, որ նաեւ պետք է վերջ տրվի օտար միջամտությանը: Անկարայի միջամտությունը եւս մեկ կոնֆլիկտում շատ մտահոգիչ է իրականում: Այն առաջ է բերել լուրջ մտահոգություններ միջազգային ասպարեզում: Հունաստանը ձայնը բարձրացրել է ի սկզբանե այս կապակցությամբ: Մենք առաջինն էինք, որ Եվրոպական միության արձագանքը պահանջեցինք այս կոնֆլիկտի բոցավառման շուրջ՝ կոչ անելով անմիջական եւ տեւական զինադադարի եւ խաղաղ լուծման ԵԱՀԿ Մինսկի խմբի հովանու ներքո: Մենք նաեւ առաջարկեցինք, որ Եվրամիությունը կոչ անի դադարեցնել արտաքին կողմերի ներգրավումը»,- շարունակեց Հունաստանի արտգործնախարարը:

Նա տեղեկացրեց, որ Հունաստանն անգամ հետ է կանչել իր դեսպանին Բաքվում:

Դենդիասի փոխանցմամբ՝ ինքը Զոհրաբ Մնացականյանի հետ քննարկել է նաեւ Արեւելյան Միջերկրականում ստեղծված իրավիճակը, լարումները եւ ապօրինի գործողությունները Սիրիայում, Լիբիայում, Իրաքում, Կիպրոսում եւ Արեւելյան Միջերկրականում:

«Բոլորն էլ ունեն ընդհանուր քաջ հայտնի հայտարար, ընդհանուր հայտարարը Թուրքիան է, Թուրքիայի անտեսումը ԵՄ կոչերին՝ հարգել միջազգային լեգիտիմությունը»,- ընդգծեց նա:

Դենդիասը տեղեկացրեց, որ Հունաստանի վարչապետ Կիրիակոս Միցոտակիսը այսօր այդ հարցերը եւս մեկ անգամ կարծարծի Եվրոպական խորհրդում: «Մեր դիրքորոշումը բյուրեղի պես հստակ է, մենք միշտ պատրաստ ենք մտնել երկխոսության մեջ բարի կամքով, միջազգային իրավունքի հիմունքների վրա եւ ելնելով բարի դրացիական հարաբերությունների սկզբունքներից: Բայց եւ այնպես փոխանակ կոչ անելու բանակցությունների, որոնք փոխհամաձայնեցված էին, մենք եւս մեկ անգամ բախվեցինք թուրքական սադրանքների վերսկսմանը»,- նկատեց Հունաստանի ԱԳ նախարարը՝ կոչ անելով Թուրքիայի մասին դատել իր գործողություններով եւ ոչ թե հայտարարություններով:

Իր խոսքի ավարտին Դենդիասը վստահեցրեց՝ Հունաստանը կշարունակի տրամադրել օժանդակություն՝ ելնելով Հայաստանի հետ երկկողմանի համագործակցության հուշագրից եւ հարաբերություններից:

Նա նաեւ հույս հայտնեց շուտով Զոհրաբ Մնացականյանին հյուրընկալել Աթենքում: