Հայաստանի հավաքականը հաղթեց Հյուսիսային Մակեդոնիային և Ազգերի լիգայում բարձրացավ B դիվիզիոն

Նոյեմբերի 18-ին Հայաստանի հավաքականն անցկացրեց ֆուտբոլի Ազգերի լիգայի 2020/21 մրցաշրջանի C դիվիզիոնի խմբային փուլի երկրորդ խմբի վերջին հանդիպումը:

Խոակին Կապառոսի գլխավորած թիմը երկրում պատերազմական դրության պատճառով Հյուսիսային Մակեդոնիայի հավաքականի հետ տնային հանդիպումը ստիպված էր անցկացնել Կիպրոսի մայրաքաղաք Նիկոսիայում: Խաղից առաջ խմբի մրցաշարային աղյուսակում ստեղծված դրությունը ստիպում էր Հայաստանի հավաքականին խաղալ միմիայն հաղթանակի համար: Մակեդոնացիները գլխավորում էին աղյուսակը վաստակած 9 միավորով, իսկ Հայաստանի հավաքականը հետ էր մնում մեկ միավորով: 

Դեռևս 5-րդ տուրի Վրաստանի հավաքականի հետ խաղից առաջ Հայաստանի հավաքականը զրկվել էր մի շարք առաջատար խաղացողներից. «Ռոման» արգելել էր թիմին միանալ Հայաստանի հավաքականի ավագ Հենրիխ Մխիթարյանին, վնասվածք ուներ Խորեն Բայրամյանը: Այնուհետև կորոնավիրուսով վարակվեցին և հայտացուցակից դուրս մնացին կիսապաշտպան Էդգար Բաբայանը, հավաքականի նորեկ, պաշտպան Ռոբերտ Հակոբյանը, ինչպես նաև պահեստային երկու դարպասապահները՝ Արսեն Բեգլարյանն ու Անատոլի Այվազովը: Վրաստանի հավաքականի հետ խաղից հետո կորուստները մեծացան: Կորոնավիրուսով վարակվեցին վրացիների հետ խաղում գոլերի հեղինակներ դարձած Գևորգ Ղազարյանն ու Սարգիս Ադամյանը, հիմնական կազմի պաշտպան Անդրե Չալըշըրը, ևս մեկ պահեստային դարպասապահ Գրիգոր Մելիքսեթյանը:

Իր հերթին, Հյուսիսային Մակեդոնիայի հավաքականը տարբեր պատճառներով զրկվել էր իր առաջատար խաղացողներից: Հայաստանի հավաքականի հետ խաղի հայտացուցակից դուրս մնացին Գորան Պանդևը, Էնիս Բարդին, Արիան Ադեմին, Էզջան Ալիոսկին, Ստոլե Դիմիտրևսկին, Բոբան Նիկոլովը, Ստեֆան Սպիրովսկին ու Էլիֆ Էլմասը. բոլորն էլ հիմնական կազմի խաղացողներ, ովքեր ելույթ են ունենում եվրոպական առաջատար առաջնություններում:

Խոակին Կապառոսը մեկնարկային կազմում Չալըշըրի փոխարեն դուրս բերեց Տարոն Ոսկանյանին: Ղազարյանին և Ադամյանին փոխարինեցին «Ուրարտուի» կիսապաշտպան Հակոբ Հակոբյանն ու ռուսական «Խիմկիի» խաղացող Արշակ Կորյանը: Հակոբյանի համար սա առաջին հանդիպումն էր Հայաստանի հավաքականի կազմում: Վրաստանի հավաքականի հետ հանդիպման համեմատ Կապառոսը ևս մեկ փոփոխություն էր կատարել. ձախ պաշտպանի դիրքում Արման Հովհաննիսյանի փոխարեն մեկնարկային կազմում էր Կամո Հովհաննիսյանը:

Հայաստանի հավաքականը խաղի մեկնարկից գործում էր երկրորդ համարով, ինչպես և Վրաստանի հավաքականի հետ խաղում, ապավինելով հակագրոհների մարտավարությանը: Մակեդոնացիները մի քանի անգամ հեռու տարածություններից սպառնացին Դավիթ Յուրչենկոյի դարպասին, սակայն Հայաստանի հավաքականի դարպասապահն ուշադիր էր: Կապառոսի թիմն առաջին իրական գոլային պահն ունեցավ 24-րդ րոպեին. Տիգրան Բարսեղյանը հակագրոհի արդյունքում գնդակը հասցրեց Ալեքսանդր Կարապետյանին, որը, խաբս տալով պաշտպանին, հարվածեց, սակայն վերջին պահին մակեդոնացի դարպասապահը կարողացավ հանել գնդակը անկյունային: 40-րդ րոպեին Տիգրան Բարսեղյանի հեռահար հարվածից հետո ևս մեկ անգամ իր թիմին փրկեց Դամիան Շիշկովսկին: Առաջին կեսն ավարտվեց գոլազուրկ ոչ-ոքիով:

Ընդմիջմանը Կապառոսը երկու փոխարինում կատարեց. Վահան Բիչախչյանը փոխարինեց Կարապետյանին, Սոլոմոն Ուդոյի տեղն էլ խաղը շարունակեց Վբեյմար Անգուլոն: Փոփոխությունները միանգամից իրենց արդյունքը տվեցին. 55-րդ րոպեին Բիչախչյանը լավ նկատեց աջ եզրից գրոհին միացած Հովհաննես Համբարձումյանին, վերջինս էլ դիպուկ հարվածով բացեց հաշիվը:

Հայաստանի հավաքականի գլխավոր մարզիչը խփած գոլից հետո ևս մի քանի փոփոխություններ կատարեց՝ ուժեղացնելով պաշտպանությունը: Պաշտպան Սերոբ Գրիգորյանը փոխարինեց հարձակվող Արշակ Կորյանին, հենակետային կիսապաշտպան Կարեն Մուրադյանը դաշտ դուրս եկավ Հակոբ Հակոբյանի փոխարեն: Հայաստանի հավաքականը գրագետ պաշտպանվում էր՝ անցկացնելով վտանգավոր հակագրոհներ: Դրանցից մեկի ժամանակ՝ 79-րդ րոպեին, Կամո Հովհաննսյանը մեն մենակ մնաց դարպասապահի հետ, բայց չկարողացավ գնդակը նրա կողքով ուղարկել դարպասը: Մակեդոնացիները, ունենալով տարածքային առավելություն, այդպես էլ լուրջ սպառնալիքներ չկարողացան ստեղծել Յուրչենկոյի դարպասի մոտ:

Հայաստանի հավաքականը հաղթեց 1-0 հաշվով ու, վաստակելով 11 միավոր, խմբում զբաղեցրեց առաջին հորիզոնականը: Այսպիսով, Խոակին Կապառոսի թիմն իրավունք ստացավ Ազգերի լիգայի 2022/23 խաղարկությունում հանդես գալ B դիվիզիոնում: