Արձանագրվել են խոշտանգման մի շարք դեպքեր, նաեւ՝ հետմահու․ Բեգլարյանը՝ Ադրբեջանի անմարդկային վերաբերմունքի մասին

Բաց տեսանյութերի հիման վրա այս պահին ունենք մոտ 50-60 ռազմագերու մասին հաստատված տվյալ, որոնցից մոտ 30-ի ինքնությունն ենք կարողացել պարզել։ Այսօր հրավիրված ասուլիսի ժամանակ հայտարարեց Արցախի մարդու իրավունքների պաշտպան Արտակ Բեգլարյանը՝ հավելելով, որ բոլոր տվյալները փոխանցում են Կարմիր խաչին եւ, ըստ անհրաժեշտության, նաեւ ռուսական կողմին եւ քաղաքական ղեկավարությանը։

«Մեր ներկայացրած տվյալների՝ լուսանկարների, կոնտակների, տեղանքի վերլուծությունների շնորհիվ հնարավոր է եղել նաեւ փրկել կյանքեր, եւ Կարմիր խաչը կարողացել է կապ հաստատել այդ ռազմագերիների հետ»,- ասաց Բեգլարյանը՝ նշելով, որ Կարմիր խաչը եւ պաշտպանության նախարարություններին կից գործող գերիների եւ անհետ կորածների հանձնաժողովները եւս իրենք իրենցով զբաղվում են տվյալների հավաքմամբ։

Խոսելով քաղաքացիական գերիների մասին՝ Արցախի ՄԻՊ-ը հայտնեց, որ նրանց վերաբերյալ տվյալների ողջ վերլուծությունը կատարում են իրենք, քանի որ բոլորը գտնվել են Արցախում, եւ երբ ադրբեջանական կողմը ներխուժել է, հիմնականում եղել են իրենց բնակավայրերում կամ տներում․ «Մոտավոր հաշվարկով՝ ի սկզբանե կար մոտ 30 անհետ կորած, նրանց մի մասի ճակատագիրը այժմ պարզվել է․ նրանք քաղաքացիական ներկայացած անձինք են, որոնց հետ Կարմիր խաչը կապ է հաստատել: Մի մասով էլ, եթե չեմ սխալվում՝ 11-ով, հաստատվել են մահվան դեպքեր, եւ նրանցից 7-ի մարմինները վերադարձվել են մեզ կամ մեր փրկարար ծառայություններն են գտել»։

Արցախի ՄԻՊ-ի խոսքով՝ նշված 7 քաղաքացիական անձինք էլ սպանվել են, եւ գրեթե բոլոր դեպքերով, եթե ոչ բոլորով, նրանց մարմնի վրա առկա են եղել խոշտանգման, խեղման հետքեր, այդ թվում՝ հետմահու․ «Այդ թվում՝ ականջներ կտրելու, աչք հանելու, գլխատման փորձեր, հետմահու դանակահարության եւ սարսափազդու մի շարք դեպքեր են արձանագրվել: Փորձաքննություններ են ընթանում»։

Արտակ Բեգլարյանը նշեց, որ կան նաեւ ադրբեջանական կողմից հրապարակված տեսանյութեր, որոնցում երեւում են, որ կենդանի վիճակում մարդկանց գլխատում են կամ ականջները կտրում, եւ այս բոլոր տեղեկությունները իրենք վերլուծում են, անձնանց ինքնությունները պարզում, ներկայացնում Կարմիր խաչին եւ ռուսական կողմին․ «Գլխավոր պատասխանատուն եւ միակ հանցագործը այստեղ ադրբեջանական կողմն է, որը ժամանակ է ձգում գերիների, որոշ դեպքերում՝ նաեւ դիերի փոխանակման համար»։

Արտակ Բեգլարյանը հիշեցրեց, որ հոկտեմբերի կեսերից սկսած՝ անմարդկային վերաբերմունքի վերաբերյալ փակ զեկույցներ են պատրաստել Հայաստանի ՄԻՊ-ի հետ համատեղ, վերջերս հրապարակեցին 4-րդը, այժմ պատրաստում են 5-րդ զեկույցը․ «Ինչո՞ւ փակ, որովհետեւ այնտեղ կան բավականին դաժան պատկերներ եւ անձնական տվյալներ, մենք և նախընտրել ենք, որ դրանք չմտնեն հայկական իրականության մեջ, քանի որ ակնհայտորեն Ադրբեջանի նպատակներից մեկը հենց հոգեբանորեն ճնշելն է, լրացուցիչ վախեր զինծառայողների եւ հայ հասարակության մոտ առաջացնելը»։

Ըստ Բեգլարյանի՝ քանի որ պատերազմը ավարտվել է, այս խնդիրը նույն ուժգնությամբ առկա չէ, բայց այն հոգեբանական տառապանքը, որ պատճառում են այդ տեսանյութերը, մնում են, եւ Ադրբեջանը բավականին «արդյունավետ» դրանից օգտվում է եւ փորձում հնարավորինս լայն տարածում ապահովել, ինչը անընդունելի է եւ միանշանակ հանցագործություն․ «Կան նաեւ ապացույցներ՝ պնդելու, որ սա պետության վերահսկողության եւ ուղիղ կազմակերպման տակ է, քանի որ այդ տեսանյութերը հրապարակող էջերը տարբեր ուղիներով կապվում են ադրբեջանական պետական մարմինների հետ, եւ բոլորս էլ հասկանում ենք, որ նման տեսանյութեր, այն էլ՝ այդ ծավալի, հնարավոր չէ առանց պետական մարմինների, այդ թվում՝ Հատուկ ծառայությունների վերահսկողության եւ իմացության դուրս հանել բանակից»։

Բեգլարյանը հայտնեց, որ հնարավորինս վերլուծում են թե՛ հրապարակային, թե՛ ընտանիքների կողմից տրված տվյալները, փորձում մշակել եւ ներկայացնել թե՛ Կարմիր խաչին, թե՛ ՊՆ-ին կից գործող գերիների եւ անհետ կորածների հանձնաժողովներին, որը լիազոր մարմինն է այս հարցի․ «Եվ Կառավարությունը՝ հանձին այս հանձնաժողովի, պատասխանատու է այս գործողությունների համար: Մենք եւ մնացած մարմինները պարզապաես աջակցող գործառույթ ենք իրականացնում»։