ՀՊՏՀ ռեկտորի ընտրության արդյունքները հաստատելու մասին նախագիծը օրակարգից հանվեց․ Մեսրոպ Առաքելյանն առարկություններ ուներ

Հայաստանի պետական տնտեսագիտական համալսարանի ռեկտորի ընտրության արդյունքները հաստատելու մասին նախագիծը ՀՀ Կառավարությունն այսօր չհաստատեց։

Ի սկզբանե նախատեսված էր հարցը չզեկուցվող հարցերի փաթեթով ընդունել, սակայն աշխատանքի եւ սոցիալական հարցերի նախարար Մեսրոպ Առաքելյանը խնդրեց, որ այն զեկուցվի։

Հարցը զեկուցող կրթության, գիտության, մշակույթի եւ սպորտի նախարար Վահրամ Դումանյանն ասաց, որ ուղիղ 5 ամիս առաջ՝ հուլիսի 17-ին, տեղի են ունեցել ՀՊՏՀ ռեկտորի ընտրություններ, նախապես հայտարարված մրցույթին դիմած թեկնածուների միջեւ եղել է մրցակցային ընտրություն. «Մասնակցել են 2 թեկնածու, ընտրվել է Դիանա Գալոյանը։ Ամբողջ գործընթացը առկա փաստաթղթերով համապատասխանում է սահմանված կարգին, առաջարկում եմ հաստատել ընտրության արդյունքը»։

Արձագանքելով Մեսրոպ Առաքելյանն ասաց, որ ընտրություններին տեղի ունեցած նիստի հետ կապված եղել է դատական հայց. «Դատարանի կողմից եղել է որոշում ընտրությունների իրականացումը կասեցնել՝ հաշվի առնելով խորհրդի եւ ընտրական գործընթացի հետ կապված խնդիրները։ Ես ինքս խորհրդի անդամ եմ, նշանակվել եմ վարչապետի խորհրդական լինելու ժամանակ այդ կարգավիճակում։ Այդ ժամանակ դատարանի մեկ այլ որոշմամբ՝ նիստից ընդամենը 10 րոպե առաջ չեղյալ է համարվել դատարանի մյուս որոշումը։ 2 դատարաններն էլ եղել են առաջին ատյանի»։

Առաքելյանի խոսքով՝ այս պահին նաեւ ԿԳՄՍ նախարարության դեմ դատական հայց կա այդ ընտրություններին տեղի ունեցած խորհրդի նիստի հետ կապված։

«Հետեւաբար, ես կարծում եմ, որ առնվազն հավելյալ ուսումնասիրության անհրաժեշտություն կա այս հարցի շուրջ։ Համաձայն եմ, որ 5 ամիսը բավական երկար ժամկետ է, քանի որ նաեւ խաթարվում է կրթական գործընթացը։ Սակայն մյուս կողմից դատական գործընթացի արդյունքը հնարավոր է, որ առաջիկայում այդ որոշման մեջ փոփոխություն մտցնի, հետեւաբար հավելյալ քննարկման առարկա կա»,- նշեց նախարարը։

Նրա խոսքով՝ մինչեւ ընտրությունները խորհրդի կողմից առաջարկ է ներկայացվել նախարարություն, որ բուհը վերակազմավորվի հիմնադրամի, քանի որ բոլոր բուհերը գրեթե վերակազմավորված են հիմնադրամի, եւ այդ հիմնադրամի կարգավիճակով նոր տեղի ունենան ընտրություններ. «Խորհրդի որոշումը մինչեւ հիմա ներկայացված չէ Կառավարությանը, որ բուհը վերակազմավորվի հիմնադրամի։ Այսինքն՝ 1 տարի նույնպես հիմնադրամի վերակազմավորվելու հարցը լուծում չի ստացել։ Հիմա, եթե հիմնադրամի որոշումը կայացվի, արդյունքում ձեւավորվելու է նոր խորհուրդ, տեղի են ունենալու նոր ընտրություններ, եւ արդյունքում մի քանի ամիս հետո նոր գործընթաց ենք սկսելու»։

Արձագանքելով Վահրամ Դումանյանն ասաց, թե չի կարծում, որ արժե Կառավարության նիստում քննարկել դատարանների որոշումների հետ կապված որեւիցե հարց. «Մենք այստեղ պետք է քննարկենք եւ պարտավոր ենք քննարկել այն փաստը, ինչը դրված է այսօր սեղանին, այն փաստաթղթերի փաթեթը, որը վերաբերում է միմիայն ռեկտորի ընտրությանը։ Ես քաջատեղյակ եմ բոլոր խոսակցություններին։ Իհարկե, եթե ապագայում կլինեն համապատասխան վճիռներ, սահմանված կարգով կարվի։ Հիմա խոսքը մեր իսկ սահմանած կարգերի շրջանակում տեղի ունեցած մի փաստի մասին է, որտեղ մենք սահմանել ենք ընտրության կարգ»։

ԿԳՄՍ նախարարն ընդգծեց՝ գործընթացն ավարտվել է, եւ իրենք պարտավոր են վերջակետ դնել այդ գործընթացին։ Վերջակետը հաստատել կամ չհաստատելն է ընտրության արդյունքը։

«Չհաստատելու որեւիցե ֆորմալ հիմք փաստաթղթային փաթեթի շրջանակներում գոյություն չունի։ Ես ասում եմ ընդամենը այդքանը։ Ինչ կլինի ապագայում՝ կապրենք, կտեսնենք։ Այս գործընթացում ամենաշատ տուժող կողմը բուհն է իր պրոֆեսորադասախության կազմի եւ իր ուսանողության բնականոն գործընթացը կազմակերպելու գործում։ Ավելի բարձր եւ կարեւոր խնդիրներ կան այս ճանապարհին։ Իմ ունեցած տեղեկություններով՝ բուհը սպասում է որեւէ որոշման՝ կա՛մ այո, կա՛մ ոչ։ Ոչի հիմք ես պնդում եմ՝ այս պահին գոյություն չունի, հետեւաբար առաջարկում եմ՝ այո-ն, որպեսզի բուհը մտնի իր բնականոն գործունեության մեջ։ Անձի խնդիր չի լուծվում եւ չի լուծվելու, բուհի խնդիր է լուծվելու եւ կրթության որակի»,- ասաց Դումանյանը։

Փոխվարչապետ Տիգրան Ավինյանն ասաց, որ այս փուլում հարցը օրակարգից կհանեն, կքննարկեն, եթե իրավական տեսանկյունից որեւէ այլ հարց չառաջանա, այդ դեպքում կհաստատեն։