Փետրվարի 1-ից Վրաստանը կվերականգնի ավիահաղորդակցությունը. հնարավոր է մեկնել՝ պատվաստվելու մասին փաստաթղթով

Փետրվարի մեկից օտարերկլրացիները կարող են ազատորեն եւ առանց կարանտինային միջոցառումների կիրառման մեկնել Վրաստան, եթե նրանց մոտ առկա լինի COVID-19-ի պատվաստում անցնելու մասին փաստաթուղթ: Այս մասին հայտարարել է Վրաստանի  էկոնոմիկայի եւ կայուն զարգացման նախարար Նաթիա Թուրնավան, փոխանցում է «Новости Грузия»-ն:

«Բոլոր երկրների քաղաքացիները կկարողանան անվերապահորեն մուտք գործել Վրաստան` սահմանին տրամադրելով ցանկացած տեսակի պատվաստանյութերի ներարկումների մասին ամբողջական տեղեկանք, այսինքն `երկու լրիվ դոզայի մասին փաստաթուղթ: Պատվաստված մարդկանց թիվն աշխարհում աճում է, սա մեր առաջին թիրախային խումբն է », - պարզաբանել է Թուրնավան:

Երկրի ցամաքային սահմանները նախկինի նման փակ կմնան, միայն օդային ավիափոխադրումը կվերսկսվի փետրվարի 1-ից:

Համաճարակի պատճառով Վրաստանը նախորդ տարվա մարտից ամբողջովին փակել էր իր սահմանները եւ դադարեցրեցլ կանոնավոր միջազգային թռիչքները: Հետագայում սահմանափակումները թուլացան, այնուհետ՝ կրկին խստացվեցին, իսկ հետո ավիափոխադրումները փույլատրելի եղան մի շարք երկրների քաղաքացիների համա:

Բոլոր այցելուների համար սահմանվեց պարտադիր կարանտին 8-14 օր ժամկետով և կորոնավիրուսի թեստավորում անցնելու պարտադիր պահանջ: Բացի այդ, Վրաստան մուտք գործելու համար շատ երկրների քաղաքացիների համար անհրաժեշտ է հատուկ թույլտվություն: Վրաստանի քաղաքացիները և նրանց ընտանիքի անդամները, ինչպես նաև ԵՄ երկրների մեծ մասի քաղաքացիներն ու մշտական բնակիչները ազատվել են այն ստանալու անհրաժեշտությունից: Բոլոր մյուս օտարերկրացիների, ինչպես նաեւ անկախ աշխատողների համար, ովքեր ցանկություն կամ անհրաժեշտություն են ունեցել հեռակա աշխատել Վրաստանի տարածքից, անհրաժեշտ է հատուկ թույլտվություն, կորոնավիրուսի մի քանի թեստեր (մուտքից առաջ, ժամանումից եւ մուտքից որոշ ժամանակ անց), ինչպես նաեւ  ութօրյա կարանտին:

Այժմ արդեն, նոր կանոնների համաձայն, մուտքը  բոլոր այն քաղաքացիների համար, ովքեր արդեն ստացել են կորոնավիրուսի պատվաստանյութ, ազատ է լինելու : Նրանց համար, ովքեր չեն ստացել կորոնավիրուսի դեմ պատվաստանյութ, կպահանջվի պարտադիր բացասական թեստ COVID-19-ի համար, որը կկատարվի ուղեւորությունից ոչ շուտ, քան 72 ժամ առաջ: Վրաստանի տարածքում գտնվելու երրորդ օրը օտարերկրացիները պետք է կրկին անցնեն թեստավորում՝ պատասխանը ներկայացնելով անհրաժեշտ վայր:

Վրաստանի քաղաքացիների երկիր վերադառնալու կարգը նույնպես հեշտացվելու է: Նոր կանոնակարգերով նվազեցվել  է ինքնամեկուսացման օրերի քանակը: Մինչ այս գործող կանոնակարգերի համաձայն, արտերկրից վերադարձող Վրաստանի քաղաքացին պետք է ինքնամեկուսացման մեջ մնար 12 օր, իսկ PCR թեստի բացասական արդյունքի մասին փաստաթուղթ ունենալու դեպքում 8 օր անձը պարտավոր էր մնալ ինքնամեկուսացման մեջ: Փետրվարի 1-ից արդեն, երկիր վերադարձող Վրաստանի քաղաքացին 12 օրվա փոխարեն ինքնամեկուսացման մեջ կանցկացնի 8 օր, կամ կորոնավիրուսի ՊՇՌ թեստ հանձնելու դեպքում, 72 ժամվա ընթացքում հնարավորություն կունենա նորից հանձնել թեստը եւ ավարտել ինքնամեկուսացումը:

Վրաստանի  Էկոնոմիկայի ու կայուն զարգացման  նախարար Նաթիա Թուրնավան խոսել է նաեւ որոշակի սահմանափակումների վերացման մասին:

Ըստ նրա՝ համավարակի հարցերով զբաղվող խորհուրդը  քննարկում է Թբիլիսի, Քութաիսի, Ռուսթավի քաղաքներում տրանսպորտի աշխատանքը փետրվարի 15-ից վերականգնելու հարցը: Նշենք, որ առայժմ, ըստ որոշումների, տրանսպորտի աշխատանքը պետք է վերականգնվեր մարտի 1-ից:

«Շուկաները եւս վերաբացելու անհրաժեշտության մասին քննարկումներ կան: Եթե մինչեւ փետրվարի 15-ը չհաջողվի բացել շուկաները, ապա այդ օրը հաստատ կբացենք, քննարկում ենք նաեւ դպրոցները վերաբացելու եւ տրանսպորտի աշխատանքը վերսկսելու հարցը»,- ասել է Թուրնավան:

Վրաստանում վերջին  շաբաթվա ընթացքում քաղաքացիները շարունակ բողոքի ակցիաներ են իրականացնում: Տարբեր ոլորտների ներկայացուցիչներ տարատեսակ սահմանափակումներ վերացնելու նպատակով ակցիաներ են կազմակերպում: Վերջինը՝ ռեստորանային ոլորտի մի շարք ներկայացուցիչների ակցիան է, որպես բողոքի նշան նրանք ամբողջ Վրաստանի տարածքում դադարեցրել են  «սնունդը տուն տանելու»,  առաքման ծառայությունները:

Քաղաքի կենտրոնում էլ, աշխատանքային պայմանների մասին բողոքի ակցիաներ են կազմակերպել առաքման  ծառայությունների աշխատակիցները:

Նշենք, որ այժմ Վրաստանից կանոնավոր թռիչքներ են իրականացվում դեպի Գերմանիա, Ֆրանսիա, Հունաստան, Ավստրիա, Իսպանիա և եվրոպական այլ երկրներ: Փետրվարին դրանց կավելանան նաեւ թռիչքները դեպի Ուկրաինա եւ Թուրքիա, Հայաստանից եւս, համապատասխան տեղեկանքների առկայությամբ հնարավոր կլինի մեկնել Վրաստան:

Կորորնավիրուսով պայմանավորված ընդհանուր համաճարակային իրավիճակը Վրաստանում, ըստ վերջին մի քանի օրերի համեմատությունների եւ ոլորտի պատասխանատուների, կարծես թե կարգավորվում է: Վարակակիրների թվի նվազում է նկատվում: Նշենք, որ այս տարվա մեկնարկից ի վեր, գրեթե ամբողջ հունվար ամիսը Վրաստանում COVID-ի զգալի բարձր ցուցանիշներ էին գրանցվում այն պարագայում, երբ գրեթե 1 տարի շարունակ երկրի առողջապահական համակարգին հաջողվում էր ինտենսիվ պայքար մղել վարակի տարածման դեմ՝ շատ երկրների համար օրինակ դառնալով արագ արձագանքման եւ  խիստ սահմանափակումների ու կոշտ միջոցառումների արդյունավետության տեսանկյունից: Համեմատական առումով, Հայաստանի համեմատ, հարեւան Վրաստանում վարակման գրեթե կրկնակի բարձր ցուցանիշներ են գրանցվել, երկիրն առաջ անցել նաեւ մահերի ցուցանիշներով: