Այն, ինչ մնաց Մխիթարյանի՝ հայտացուցակում չընդգրկվելու ստվերում. հավաքականի հայտացուցակի հետքերով

Հայաստանի հավաքականի գլխավոր մազիչ Խոակին Կապառոսը երկուշաբթի հարապարկեց Հայաստանի ազգային հավաքականի հայտացուցակը առաջիկա երկու ընկերական հանդիպումների համար, և բուռն քննարկումներ ծավալվեցին Հենրիխ Մխիթարյանի բացակայության պատճառով: Դրան մեծապես նպաստեց հենց Մխիթարյանի գրառումը սոցցանցերում, որը կրակի վրա յուղ լցրեց և հանգեցրեց նաև քաղաքական քննարկումների, թեև հարցը, իրականում, ֆուտբոլային դաշտից այն կողմ չի գնում: Իսկ այդ ամենի ներքո տեսադաշտից դուրս մնացին հայտացուցակից բացակա ֆուտբոլիստերի և, ամենակարևորը, հավաքականի նորեկների մասին քննարկումները:

Կապառոսն այս անգամ, իսկապես, հիմնական կազմի մի շարք խաղացողների դուրս է թողել հայտացուցակից: Չկան Հովհաննես Համբարձումյանը, Սոլոմոն Ուդոն, Ալեքսանդր Կարապետյանը, Նորբերտո Բրիասկո Բալեկյանը, չկան նաև մի շարք պահեստային խաղացողներ՝ Արսեն Բեգլարյանը, Սերոբ Գրիգորյանը, Արման Հովհաննիսյանը, չկա Արշակ Կորյանը, որն արդեն ապաքինվել է վնասվածքից, սակայն դեռ նորմալ չի խաղացել ապաքինվելուց հետո: Իսպանացին, հավանաբար, յուրաքանչյուրի համար ունի չհրավիրելու իր պատճառները, թեև այքան էլ հասկանալի չէ՝ ինչ սկզբունքով են հիմնական կազմի որոշ ֆուտբոլիստներ հրավիրվել, ինչ սկզբունքով՝ ոչ: Մյուս կողմից, Կապառոսը դեռ տեղ չի թողել կասկածելու իր որոշումների իրավացիության վրա և քննարկել այս կամ այն որոշման ճիշտ-սխալ լինելը: Իսկ դա է՛լ ավելի հետաքրքիր է դարձնում առաջիկա հանդիպումները:

Ինչ վերաբերում է նորեկներին, ապա ցուցակում կային թե՛ սպասելի, թե՛ անսպասելի անուններ:

Սպասելի էր Դավիդյանի հրավերը: «Ալաշկերտի» ֆուտբոլիստը լավագույններից է Հայաստանի առաջնությունում, աշնանային հատվածում ընդհանրապես ճանաչվեց լավագույնը: Մենք դեռևս հավաքականի գարնանային խաղերից առաջ առանձնացրել էինք Դավիդյանին և նշել,որ նա կարող է լինել հավանական նորեկներից մեկը, սակայն այն ժամանակ Կապառոսը որոշեց չհրավիրել ֆուտբոլիստին: Հաշվի առնելով, որ Մակեդոնիայի հավաքականի հետ աշնանային հանդիպումը բաց է թողնելու հավաքականի առաջատարներից մեկը՝ Տիգրան Բարսեղյանը, հնարավոր է, որ Կապառոսը Դավիդյանին փորձարկի հենց Բարսեղյանի դիրքում: 

Ալբերտ Խաչումյանը վերջին շրջանում շատ վստահ խաղ է ցուցադրում «Արարատ-Արմենիայում», կարողանում է հաղթել լեգիոներների հետ մրցակցությունում: Նրա հրավերը ևս կարևոր է Կապառոսի համար: Մարզիչը պետք է գործի մեջ տեսնի այն ֆուտբոլիստներին, որոնք կարող են փոխարինել Մակեդոնիայի հետ խաղում որակազրկված ֆուտբոլիստներին, իսկ այդ խաղը բաց է թողնելու նաև թիմի պաշտպանության առաջատար Վարազդատ Հարոյանը: Հաշվի առնելով, որ Բարսեղյանն ու Հարոյանը կարող են ուշ միանալ հավաքականին, Դավիդյանին ու Խաչումյանին խորվաթների հետ խաղում կարող ենք տեսնել կամ մեկնարկային կազմում կամ երկրորդ կեսի հենց սկզբից:

Մյուս երեք ֆուտբոլիստների պարագայում իսպանացի մարզիչը նորից կարողացավ զարմացնել ֆուտբոլասերներին: Դարպասապահ Արման Ներսեսյանը հրավիրվել է հավաքական Առաջին դիվիզիոնում հանդես եկող ԲԿՄԱ-ից: Առաջնության սկզբում Ներսեսյանը մի քանի կոպիտ սխալներ էր թույլ տվել, բայց զգացվում է, որ ԲԿՄԱ-ում նրան վստահում են և փորձում ապահովել նրա առաջընթացը՝ ապագայի հեռանկարով: Այժմ Ներսեսյանը բավականին վստահ է հանդես գալիս, լավ է խաղում ոտքերով, ինչը իսպանացի մարզիչների համար շատ կարևոր փաստ է:

 Դավիթ Տերտերյանը վերջին մեկ մրցաշրջանի ընթացքում շատ է բարելավել իր խաղը, աջ եզրային պաշտպանը բավականին լավ է միանում գրոհներին «Արարատ-Արմենիայում», դարձել է մի քանի գոլային փոխանցման հեղինակ և արժանացել հավաքականի մարզչական շտաբի ուշադրությանը:

Եվ վերջապես, Կարեն Մելքոնյանը, որը դարձել է «Ուրարտուի» ավագը, կփորձարկվի եզրային հարձակվողի դիրքում (եթե Կապառոսը այլ ծրագրեր չունենա): Առայժմ դժվար է ասել, թե ինչով է Մելքոնյանը գրավել Կապառոսի ուշադրությունը: Հայաստանի առաջության մակարդակով, իհարկե, Մելքոնյանը շատ լավ ֆուտբոլիստ է, բայց Կապառոսի ուշադրությունը, ամենայն հավանականությամբ, գրավել է երիտասարդ ֆուտբոլիստի առաջատարի հատկանիշները: Մելքոնյանը չի վախենում խաղն իր վրա վերցնել ու թիմակիցներին տանել իր հետևից: Իսկ այդ հատկանիշը հավաքականի ֆուտբոլիստի համար շատ կարևոր է:

Թե որքանով են արդարացի մարզչի որոշումները, կարող ենք քննարկել միայն խաղերից հետո, բայց ընկերական խաղերն առաջին հերթին փորձարկումների համար են, և մարզիչը դրանցից չի վախենում, ինչը չի կարող չուրախացնել: Ինչ վերաբերում է Մխիթարյանի բացակայությանը, ապա դրա դրական և բացասական կողմերից, հավանաբար, կարող ենք խոսել միայն աշնանային հանդիպումներից հետո:

Ռաֆայել Խալաթյան