Փորձարկումները կշարունակվեն. Հայաստանի հավաքականը պատրաստվում է Շվեդիայի հետ խաղին

Հայկական ֆուտբոլային ամառը բավականին բուռն սկիզբ ունի: Հայաստանի առաջնության թիմերը մտնում են տրանսֆերային շուկա, առայժմ հիմնականում հայտարարում են կորուստների մասին, շուտով կսկսվեն նաև ձեռքբերումները:

Այս անգամ հավաքականից հրավեր չստացած ֆուտբոիստներից երկուսը ակտիվորեն կարգավորում են իրենց ակումբային հարցերը. Մխիթարյանը երկարաձգեց պայմանագիրը «Ռոմայի» հետ, Բալեկյանը մետ (որոշ արգենտինացի լրագրողներ պնդում են, որ նույնիսկ երկու) ոտքով «Բոկա Խունիորսում» է: 

Երիտասարդական հավաքականը պատրաստվում է Եվրո-2023-ի ընտրական փուլին. հունիսի 8-ին մեր ընտրանուն սեփական հարկի տակ սպասելու է Ֆարերյան կղզիների հավաքականը:

Դե իսկ ազգային հավաքականն անցկացնում է ընկերական խաղեր եվրոպական առաջատար հավաքականների հետ, և այդ խաղերում Խոակին Կապառոսը, կարծես, փորձում է վերջնականորեն պարզել հավաքականի կազմի ողջ խորությունն ու ներուժը:

Աշխարհի փոխչեմպիոններից չվախեցան, բայց…

Խորվաթիայի հավաքականի հետ խաղից հետո ազգային ընտրանու հասցեին շարունակում են գովեստի խոսքեր հնչել: Կոմպլիմենտներից զերծ չի մնում նաև գլխավոր մարզիչը. Կապառոսն առանձնացնում է հավաքականի նվիրվածությունը աշխարհի փոխչեմպիոնների հետ խաղում: Իսկապես, ցանկության պակաս չկար: Բայց, իհարկե, խորվաթների հետ խաղում ամեն ինչ չէր, որ լավ էր: Խաղից հետո երկրպագուներն արդարացիորեն նշում էին. եթե վերջին րոպեին Տիգրան Բարսեղյանը հակագրոհի ժամանակ փոխանցեր ձախ՝ դեպի Շաղոյանը, հավաքականը կարող էր նույնիսկ հաղթել: Բայց, հանուն արդարության, պետք է նշենք, որ նույն հաջողությամբ հավաքականը կարող էր 60-րդ րոպեի կողմերը խոշոր հաշվով պարտվելիս լինել: Չափից շատ էին դաշտի տերերը «ներում» հայ պաշտպաններին ամենաթողության համար: Միայն Պերիշիչն ու Ռեբիչը երկու 100 տոկոսանոց գոլային պահ ունեցան: 

Կապառոսը չի սիրում առանձին անուններ տալ, դա միանգամայն հասկանալի է. մարզիչը չի ցանկանում լարվածություն ստեղծել խաղացողների մոտ: Սակայն մի քանի բան ակնհայտ էր. Հարոյանի բացակայությամբ պաշտպանության կենտրոնում երբեմն խուճապ էր լինում, ավելին, «օդը մաքրող» չկար: Վերևից փոխանցումների մեծ մասը բաժին էր հասնում խորվաթ հարձակվողներին, իսկ եթե թիմում ունես Լուկա Մոդրիչի պես փոխանցումների վարպետ, ապա դա վաղ թե ուշ կբերի դարպասի գրավման: Այդպես էլ Հայաստանի հավաքականը բաց թողեց միակ գոլը: Դա ավելի շատ մտահոգիչ է այն տեսանկյունից, որ Հարոյանը որակազրկման պատճառով բաց է թողնելու Մակեդոնիայի հետ հանդիպումը:

Երկրորդը՝ Դավիթ Տերտերյանն իր նորամուտի խաղում բավականին լարված էր, խորվաթների գրոհների մեծ մասն էլ ընթանում էր հենց իր եզրով, և մրցակցի ճեղքումները մեր պաշտպանության աջ եզրով շատ շատ էին: Իրավիճակը փոխվեց Ժոաո Մոնրոյ Արարատի դաշտ դուրս գալուց հետո: Կոլումբահայ ֆուտբոլիստը կարողացավ փակել եզրը ու այլևս հնարավորություն չտվեց մրցակցին այդ եզրով առաջխաղացում ունենալ: Հովհաննես Համբարձումյանի բացակայությամբ՝ Արարատն իրեն բավականին լավ դրսևորեց, միգուցե Շվեդիայի խաղում ավելի շատ խաղաժամանակ ստանա:

Եվ վերջապես, չի կարելի չառանձնացնել երիտասարդների խաղը. Ժիրայր Շաղոյանն ու Վահան Բիչախչյանն այնպես մտան խաղադաշտ, կարծես արդեն 50-րդ հանդիպումն էին անցկացնում հավաքականի կազմում: Երևում է, որ Կապառոսը ճիշտ մոտեցնումներ է ընտրել և գիտի ինչպես երիտասարդներին իրենց սեփական ուժերի հանդեպ վստահություն ներարկի: Բայց դա չի նշանակում, որ երիտասարդները կազմից դուրս են մղում փորձառուներին: Իսպանացի մարզիչն ամեն ինչ հսկողության տակ է պահում և գիտի, թե որ փոխարինումներն ինչպես ու երբ կարող են ուժեղացնել հավաքականի խաղը:

Փորձարկումները կշարունակվեն

Կասկած չկա, որ Կապառոսը կշարունակի փորձարկումներ անել նաև Շվեդիայի հետ խաղում: Բացառված չէ նույնիսկ դարպասապահի փոխարինումը: Դավիթ Յուրչենկոն ֆանտաստիկ էր խորվաթների հետ խաղում, նրա տեղը հիմնական կազմում կարևոր խաղերին կասկածի տակ չէ: Սակայն Կապառոսը որևիցե ֆուտբոլիստի զուր չի հրավիրում հավաքական. երիտասարդ Արման Ներսեսյանը կարող է իր հնարավորությունը ստանալ առաջիկա խաղում, թեև, իհարկե, շանսերը մեծ չեն: Շվեդների հետ խաղում Հարոյանի առկայությունը կարևոր է. սկանդինավները ֆիզիկապես ուժեղ են, նման ֆուտբոլիստների հետ հավասար պայքարող այլ պաշտպան այս պահին չունենք: Միգուցե փորձարկվի նաև Ալբերտ Խաչումյանը, եթե իհարկե նա մարզումների ժամանակ կարողացել է ապացուցել մարզչին, որ արժանի է նշել նորամուտը հավաքականում:

Ինչ վերաբերում է առջևի գծին, ապա այստեղ ընտրությունը շատ է, և դա այսօրվա հավաքականի առավելություններից է: Մարզիչը կարող է տարբեր սխեմաներ ընտրել՝ տարբեր ֆուտբոլիստներով: Այս տեսանկյունից հավաքականը բավականին անկանխատեսելի է դարձել մրցակիցների համար, և դա թիմի համար միայն լավ է:

Ավելացնենք, որ Շվեդիա - Հայաստան հանդիպումը տեղի է ունենալու շաբաթ՝ Հայաստանի ժամանակով 22:45-ին:

Ռաֆայել Խալաթյան