Գործադուլ Գյումրու «Մարիամ և Երանուհի Ասլամազյան քույրերի» պատկերասրահում. Բալասանյանից պահանջում են «չքանդել» այն

Գյումրու «Մարիամ և Երանուհի Ասլամազյան քույրերի պատկերասրահը անժամկետ դադարեցրել է իր աշխատանքը։ Որոշումն աշխատակազմն այսօր է կայացրել՝ նախկին տնօրենի պաշտոնակատարին աշխատանքից ազատելու քաղաքապետի որոշումն ու նոր ԺՊ-ի նշանակման լուրը ստանալուց հետո:

Գյումրու քաղաքապետ Սամվել Բալասանյանին կոչ են անում «չքանդել» պատկերասրահը: Նաև վերջնական որոշման մասին են տեղյակ պահում. դեմ են նոր նշանակմանը, չեն ընդունում տնօրենի նոր պաշտոնակատար Գագիկ Մանուկյանին: Վերջինս Գյումրու գեղարվեստի ակադեմիայի ամբիոնի վարիչն է: Կոլեկտիվի հիմնական ու միակ պահանջը նախկին տնօրենի ԺՊ Միքայել Վարդպարոնյանի վերականգնումն է:

Արդեն մեկ շաբաթ է՝ պատկերասրահում բնականոն կյանքն ու մթնոլորտը խաթարված են: Ասլամազյանցիները Գյումրու բոլոր պետական և ոչ պետական կառույցներին այս ծանր և օրհասական ժամերին կոչ են անում կանգնել Գյումրու «Մարիամ և Երանուհի Ասլամազյան քույրերի պատկերասրահի» ողջ անձնակազմի կողքին առաջացած լուրջ խնդիրների լուծման համար։

«Հայկական ժամանակը» խնդրին անդրադարձել էր հուլիսի 2-ին, երբ պատկերասրահի տնօրենի պաշտոնակատար Միքայել Վարդպարոնյանը հրաժարվել էր զբաղեցրած պաշտոնից այն բանից հետո, երբ պատկերասրահի աշխատակիցներից մեկն աշխատանքից ազատման դիմում էր ներկայացրել Գյումրու քաղաքապետարանի համապատասխան բաժին: Առկա խնդիրների մասին պատկերասրահի աշխատակիցները բաց նամակ էին գրել ու տեղեկացրել, որ աշխատակիցը, որի մասին խոսում են, բազմիցս ունեցել է կոնֆլիկտներ պատկերասրահի գրեթե բոլոր աշխատակիցների հետ աշխատանքային, քաղաքական, սոցիալական, կենցաղային և այլ տարբեր հարցերի շուրջ: Բազմիցս օգտագործել է անձնավորված վիրավորանքներ և դրսևորել ոչ ադեկվատ պահվածք, հեռախոս է նետել այլ աշխատակցի ուղղությամբ, հարվածել ինքն իր գլխին, բղավել: Այդ գործողությունները, ըստ պատկերասրահի աշխատակիցների, բազմիցս գրավել են հարակից շենքի բնակիչների ուշադրությունը:

Բազմաթիվ խորհրդակցություններից, խնդրի կարգավորման ելքերի որոնումներից հետո Վարդպարոնյանն աշխատանքից ազատել էր հիշյալ աշխատակցին՝ վերջինիս կողմից ներկայացված դիմումը հաշվի առնելով: Այդ գործողությանը հետևել են զանգ քաղաքապետարանից և նոր խնդիրներ:

Գյումրու քաղաքապետարանում պատկերասրահի՝ արդեն նախկին տնօրենի պաշտոնակատարին տեղեկացրել են, որ եթե ուզում է շարունակել աշխատանքը պատկերասրահում, պետք է հրաժարվի երկրորդ աշխատանքից և հետ ընդունի աշխատանքից ազատված Անի Ավետիսյանին:

Վարդպարոնյանը, հաշվի առնելով կոլեկտիվի սպասումն ու կարծիքը, հուլիսի 2-ին Գյումրու քաղաքապետարանի պահանջով ազատվել է իր երկրորդ աշխատանքից, որը, ըստ իրեն, ընդհանրապես չի էլ խանգարել պատկերասրահի իր զբաղվածությանը, քանի որ երեկոյան ժամի աշխատանքի մասին է խոսքը, նաև պայմանավորվածություն է ձեռք բերել աշխատակիցների հետ իրենց նախկին գործընկերոջը կրկին աշխատանքի ընդունելու վերաբերյալ:

Քաղաքապետարանը, սակայն, բոլորի համար անսպասելի մեկ այլ պահանջ էլ է ավելացրել նախկին երկուսին, որը, ըստ Միքայել Վարդպարոնյանի, անհանդուրժելի էր:

«Պահանջեցին պատկերասրահի հաստիքով հավաքարարի աշխատանքից հեռացումը, որը նախկին այդ աշխատակցուհու հետ կոնֆլիկտ է ունեցել: Հիմա մենք պետք է հավաքարարին ազատենք, որ երբ վերականգնվի ինքը, իրեն լավ զգա: Բոլոր պայմանավորվածությունները եղել են բանավոր»,- ասաց Վարդպարոնյանը:

Աշխատանքից ազատված աշխատակիցը Գյումրու քաղաքապետ Սամվել Բալասանյանի մտերիմ ընկերոջ դուստրն է, ըստ Միքայել Վարդպարոնյանի՝ իրենք պետք է անեն հնարավոր ամեն բան, որ նա իրեն միշտ լավ զգա:

«Այսօրվա գործադուլի հիմնական նպատակը պղտորված արդարության վերականգնումն է, անձի խնդիր չկա, ինստիտուցիոնալ ու գաղափարի խնդիր է: Պատկերասրահի շահերը ստորադասվել են անձնական ամբիցիաներին: Բալասանյանի հետ շատ դժվար է հանդիպելը, մի քանի անգամ կոլեկտիվը գնացել է, չի ընդունել: Սա անձնական ու ամբիցիոզ մոտեցում է թե՛ աշխատակցուհու, թե՛ նրա ծնողների, թե՛ քաղաքապետարանի կողմից»,- ասաց Միքայել Վարդպարոնյանը:

«Մենք Մանուկյանին դեմ ենք, քանի որ ինքն էլ ունի երկրորդ աշխատանք, և նշանակում են տնօրեն, իսկ մեր տնօրենին ազատում են այն բանի համար, որ այլ տեղում էր աշխատում: Ո՞րն է տարբերությունը»,- ասացին պատկերասրահի աշխատակիցները:

Փակել պատկերասրահը տուրիստական թեժ սեզոնին անընդունելի են համարում աշխատակիցները, սակայն թողնել խնդիրն անլուծելի, առավել անընդունելի է: Օրվա ընթացքում հասցրել են շատ հյուրերից ներողություն խնդրել փակ դռների համար, նրանց փոքրիկ բացիկներ են նվիրում և խոստանում հարցի արագ կարգավորում:

Տարածք ժամանած փոխքաղաքապետ Հայկ Սուլթանյանն ու այլ պաշտոնյաներ պատկերասրահի աշխատակիցներին տեղեկացրին, որ իրենք իրենց համար խնդիր են ստեղծում, քանի որ անօրինական գործադուլ են կազմակերպել: Երկար-բարակ բացատրեցին, թե ինչպես է օրենքի շրջանակում գործադուլ կազմակերպվում: «Բացեք, մտեք աշխատանքի, թե չէ էս ամեն ինչը այլ իրավական հետևանքներ կունենա, որը չենք ուզում»,- զգուշացրեց քաղաքապետարանի պատասխանատուն:

Անկախ զգուշացմանը՝ պատկերասրահը վաղը ևս փակ կմնա, այնքան ժամանակ, քանի դեռ աշխատակիցներին քաղաքապետ Սամվել Բալասանյանը չի լսի, խնդիրը չի կարգավորվի, արդարությունը, ըստ նրանց, չի վերականգնվի:

Լուսանկարները՝ «Հայկական ժամանակի»

Սամսոն Մատինյան