Քովիդն ավելի վտանգավոր է հղիների համար, քան պատվաստվելը. վարակը կարող է պատճառ դառնալ մեռելածնության

Առողջապահության նախարարությունը վերջերս հայտնեց, որ կերակրող մայրերը նույնպես կարող են պատվաստվել կորոնավիրուսային հիվանդության դեմ: Բայց այդ հայտարարության ֆոնին հնչեցին տարբեր հակասական կարծիքներ և մտահոգություններ: Ոմանց կարծիքով՝ պատվաստանյութերը հակացուցված են ոչ միայն կերակրող մայրերին, այլ նաև հղի կանանց:

Հանրային առողջապահության մասնագետ, Հայաստանի ամերիկյան համալսարանի Թրփանճեան հանրային առողջապահության ֆակուլտետի դեկան Վարդուհի Պետրոսյանը «Հայկական ժամանակ»-ի հետ զրույցում ասաց, որ արդեն կան անհրաժեշտ գիտական հետազոտություններ, որոնց հիման վրա կերակրող մայրերը միանշանակ կարող են պատվաստվել:

Մասնագետի խոսքով՝ դա, ընդհակառակը, ոչ միայն իրենց է պաշտպանում, այլ նաև իրենց երեխային, քանի որ կրծքի կաթի միջոցով հակամարմինները կարող են նաև երեխային փոխանցվել և պաշտպանել նրան կորոնավիրուսային հիվանդությունից:

«Պատվաստանյութի հայտնաբերման նախնական շրջանում հղիներին ասում էին չպատվաստվել, քանի որ նոր դեղանյութն անցնում էր կլինիկական փորձաքննությունների փուլ, իսկ հղիները համարվում են խոցելի խումբ և երբևիցե մասնակից չեն լինում որևէ դեղամիջոցի փորձաքննության փուլին: Սակայն արդեն միլիարդավոր մարդիկ պատվաստվել են քովիդի դեմ, և կա տվյալների բազա, որտեղ տեղեկատվություն կա նաև պատվաստված հղի կանանց մասին: Պատվաստված հղիները իրենք են որոշել՝ պատվաստվել, թե ոչ, ոմանց բժշկին է խորհուրդ տվել, որոշներն էլ պատվաստվել են և նոր տեղեկացել, որ հղի են: Տվյալների բազայի վերլուծությունները ցույց են տալիս, որ որևէ այլ կողմնակի երևույթներ հղիների մոտ պատվաստվելուց հետո չեն առաջացել: Այսինքն՝ պատվաստանյութը անվտանգ ու ապահով է նաև հղիների շրջանում»,- ասաց Պետրոսյանը:

Ինչո՞ւ է անհրաժեշտ, որպեսզի հղին պատվաստվի «Քովիդ-19»-ի դեմ

Երբ որ համեմատում ենք հղի և ոչ հղի կանանց, ապա հղիների մոտ հիվանդությունը բավականին դժվար ընթացք ունի: Վիրուսը պատճառ է դառնում մեռելածնության, վաղաժամ ծննդաբերության: Պատվաստումը կարևոր է նաև այն հղիների համար, որոնք բարձր տարիք ունեն, խրոնիկ հիվանդություններ: Հղիները կարող են պատվաստվել՝ խորհրդակցելով իրենց բժշիկների հետ:

Արդյոք պատվաստումը կարո՞ղ է առաջացնել վիժում

Դա կեղծ է: Հետազոտությունները ցույց են տալիս, որ չպատվաստված հղիների 11-16 տոկոսը ունենում է վիժումներ, իսկ պատվաստված հղիների մոտ վիժումը եղել է մոտ 12 տոկոս: Ընդհանրապես վիժումը կարող է լինել ցանկացած հղիի դեպքում, տարբեր պատճառներով: ԱՄՆ-ում արդեն 99 հազար հղի պատվաստվել է, և կա այդ հղիների տվյալների բազա, որը ուսումնասիրել են և եկել են այն եզրակցության, որ հղիները կարող են պատվաստվել: 

Կա՞ որևէ պատվաստանյութ, որը հակացուցված է հղի կանանց և կերակրող մայրերին

Սա նույնպես կեղծ պնդումներից է: Բոլոր պատվաստանյութերն էլ անվտանգ են ու արդյունավետ: Օրինակ՝ ռուսական պատվաստանյութի վերաբերյալ այս տարվա հունիս ամսին ՌԴ առողջապահության նախարարություն հայտարարեց՝ կարող է կիրառվել նաև հղիների շրջանում: Եթե որևէ հղի որոշում է, որ չի ցանկանում պատվաստվել, ապա նրա ընտանիքի անդամների պարտականությունն է, որ բոլորը պատվաստված լինեն, ապահովեն, որ իրենց հղին չվարակվի: Մեզ մոտ արդեն գրանցվել է երկու հղի կնոջ մահ:

Աշխարհի առաջատար պատվաստանյութերը նույնպես օգտագործվում են հղիներին պատվաստվելու համար: Ամերիկագերմանական արտադրության «Պֆայզր» պատվաստանյութի արտադրողները իրենց պատվաստանյութը նույնպես կիրառում են հղի կանանց դեպքում: Ըստ նրանց՝ պատվաստանյութի անվտանգությունն ազդեցություն է թողնում և՛ մոր, և՛ երեխայի առողջության վրա: ԱՀԿ-ն խորհուրդ է տալիս նաև հղիներին պատվաստել չինական արտադրության «Սինոֆակ», «Սինոֆարմ» և «Կորոնավակ» պատվաստանյութերով: «Աստրազենեկա»-ն նույնպես կիրառելի է հղի կանանց, կերակրող մայրերի և հղիություն պլանավորող անձանց դեպքում:

Համաձայն ԱՄՆ-ի Հիվանդությունների կանխարգելման և վերահսկման կենտրոնի՝ կորոնավիրուսային հիվանդության դեմ կիրառվող բոլոր պատվաստանյութերն էլ անվտանգ են ու արդյունավետ: Դրանք հատկապես կարևորվում են քովիդի համավարակի կանխարգելման համար՝ «դելտա» շտամի տարածման համատեքստում: Ըստ կենտրոնի՝ միայն օգոստոս ամսվա ընթացքում քովիդի դեմ պատվաստվել է հղի կանանց 23 տոկոսից ավելին: CDC-ի նոր անալիզի համաձայն՝ հղիության սկզբում պատվաստված հղիները որևէ խնդիր չեն ունեցել: Հղիության ընդհատման ռիսկ չի եղել հղիության 20 շաբաթականում գտնվող 2500 կանանց մոտ: