Նոր սահմանափակումներ, ռեկորդային թվով վարակակիրներ ու հազարավոր մահեր. կորոնավիրուսային իրավիճակը ՌԴ-ում

Ռուսաստանի վեց շրջաններում երեկվանից սկսվել են «ոչ աշխատանքային օրերը». Մոսկվայի իշխանությունները պատրաստվում են նոր արգելափակում մտցնել։ Այս ֆոնին նախագահ Վլադիմիր Պուտինը շրջանների ղեկավարներին խորհուրդ է տվել սահմանափակել գիշերային ժամերին ռեստորանների և ակումբների աշխատանքը։

Կորոնավիրուսի դեմ պայքարի օպերատիվ շտաբի տվյալներով՝ երեկ Ռուսաստանում հայտնաբերվել է «Քովիդ-19» վարակի 37.930 դեպք: Սա նոր առավելագույն ցուցանիշ է համաճարակի սկզբից ի վեր։ Մասնավորապես՝ Մոսկվայում հայտնաբերվել է 7778 նոր դեպք, Սանկտ Պետերբուրգում՝ 2693, Սամարայի շրջանում՝ 1184, Նիժնի Նովգորոդի մարզում՝ 769։

Առհասարակ, վերջին մեկ ամսում ՌԴ-ն վարակվածության ցուցանիշներով շարունակ թարմացնում է իր իսկ սահմանած հակառեկորդները:

Նոր վարակակիրների ու մահերի ցուցանիշները

Վերջին անգամ վարակվածների ռեկորդային թիվ էր գրանցվել 3 օր առաջ՝ հոկտեմբերի 23-ին։ Այնուհետ օպերատիվ շտաբը զեկուցել էր 37.678 նոր դեպքի մասին։

Նոր դեպքերի օրական աճը հիմնականում կենտրոնացած է Մոսկվայում։

Կորոնավիրուսի հետևանքով գրանցված մահերի թիվը յոթերորդ օրն անընդմեջ գերազանցում է 1000-ը։ Երեկ պարզ դարձավ, որ, ըստ ՌԴ օպերատիվ շտաբի, «Քովիդ-19»-ով վարակված 1069 մարդ է մահացել: Սա երեքով ավելի է, քան նախորդ օրը։ Կորոնավիրուսով հիվանդների օրական մահացության ամենառեկորդային թիվը գրանցվել է 3 օր առաջ՝ շաբաթ օրը: Շտաբը հայտնել է 1075 մահվան դեպքի մասին:

Մահացածների ընդհանուր թիվը, ըստ շտաբի, հասել է 231.669-ի։ Ռոսստատը, որը անկախ մարմին է և կորոնավիրուսի դեպքերի ու մահերի թիվը հաշվում է այլ ցուցիչով, նշել է, որ եղել են ավելի շատ մահվան դեպքեր, քան ավելի վաղ հայտարարվել էր: Ըստ նրանց՝ համաճարակի ընթացքում ավելի քան 400 հազար ռուս է մահացել՝ վարակված կորոնավիրուսով։

Սեպտեմբերի վերջից Ռուսաստանում նկատվում է հիվանդացության կտրուկ աճ։ Վերջին մեկ ամսվա ընթացքում օրական հայտնաբերված դեպքերի թիվը, ըստ պաշտոնական տվյալների, աճել է ավելի քան 70%-ով։ Պարբերաբար թարմացվում են ինչպես «Քովիդ-19»-ի օրական աճի, այնպես էլ օրական մահացության առավելագույն չափերը։

Միևնույն ժամանակ, Ռուսաստանում հիվանդացության նոր ալիքի գագաթնակետը դեռ չի գրանցվել: Այս մասին երկուշաբթի ասել է առողջապահության նախարարության գլխավոր ինֆեկցիոնիստ Վլադիմիր Չուլանովը։ Մասնագետը նաև նշել է, որ վերջին շրջանում կտրուկ աճել է այն երեխաների և դեռահասների թիվը, որոնք հիվանդ են հոսպիտալացում պահանջող սուր ձևերով։

Ոչ աշխատանքային օրերն ու մյուս սահմանափակումները

Անցյալ շաբաթ Վլադիմիր Պուտինը համաձայնել է կառավարության առաջարկին՝ հոկտեմբերի 30-ից նոյեմբերի 7-ը ոչ աշխատանքային օրեր հայտարարել «Քովիդ-19» վարակակիրների աճի պատճառով։ Միաժամանակ մարզային իշխանություններին իրավունք է տրվել սահմանել լրացուցիչ ոչ աշխատանքային օրեր՝ կախված տեղում տիրող իրավիճակից։

Այդ իրավունքից օգտվել են մասնավորապես Սամարայի, Նիժնի Նովգորոդի, Նովգորոդի, Վորոնեժի և Կուրսկի շրջանների, ինչպես նաև Պերմի երկրամասի իշխանությունները։ Այնտեղ ոչ աշխատանքային օրերի շրջանն սկսվել է արդեն երկուշաբթի՝ հոկտեմբերի 25-ին։

Հոկտեմբերի 28-ից Մոսկվայում կսկսի գործել սահմանափակումների շղթան, որը ներառում է ռեստորանների, առևտրի կենտրոնների, սպասարկման ձեռնարկությունների և ուսումնական հաստատությունների փակումը, իսկ հոկտեմբերի 30-ից նույնը կլինի Սանկտ Պետերբուրգում։

Երեկ Կրեմլի կայքը հրապարակել է Պուտինի հանձնարարականները կառավարության անդամների հետ հանդիպումից հետո։ Նա մասնավորապես խորհուրդ է տվել մարզային իշխանություններին արգելել «սննդի ծառայությունների մատուցումը» գիշերով. ռեստորաններն ու բարերը չպետք է աշխատեն ժամը 23:00-ից մինչև 6:00-ն: Նաև առաջարկվում է գիշերային ժամերին արգելել ժամանցային միջոցառումների անցկացումը, այսինքն՝ ակումբների ու բարերի աշխատանքը։

Բացի այդ, Պուտինը կարգադրել է աշխատող ռուսներին տրամադրել երկու վճարովի հանգստյան օր՝ կորոնավիրուսային վարակի դեմ պատվաստվելու համար։

Առաջադրանքների ցանկը երկար է. պետք է բազմապատկել թեստավորման ծավալը, տարեցներին ուղարկել հեռավար աշխատանքի, մուտքագրել QR կոդեր և ավելացնել պատվաստումների արագությունը: Ավելի վաղ Կրեմլում բարձր հիվանդացության և մահացության հիմնական պատճառ էին անվանում պատվաստումների արշավի ծայրահեղ ցածր ցուցանիշները։

Սանկտ Պետերբուրգի իշխանությունները դեռ չեն քննարկում նոյեմբերի 7-ից հետո արգելափակումը երկարացնելու հարցը: Այս մասին երեկ ասել է փոխնահանգապետ Բորիս Պիոտրովսկին։

Մոսկվայում մտադիր են երկարաձգել ոչ աշխատանքային օրվա ռեժիմը: Սա կարող է նշանակել, որ ոչ աշխատանքային օրերի շրջանում մայրաքաղաքում կաշխատեն միայն մթերային խանութներն ու դեղատները:

Ավելի ուշ քաղաքային օպերատիվ շտաբն իր հեռագրային ալիքում հայտնել էր, որ նոյեմբերի 7-ից հետո Մոսկվայում ոչ աշխատանքային օրերի երկարաձգում չի նախատեսվում։