«Ապրելու երկիր» կուսակցությունը պարտաստ է Փարաքար համայնքի ավագանու նոր ընտրությունների անցկացման

«Ապրելու երկիր» կուսակցությունը պարտաստ է Փարաքար համայնքի ավագանու նոր ընտրությունների անցկացման։

Կուսակցությունը հայտարարություն է տարածել՝ Փարաքար համայնքում տեղի ունեցած իրադարձությունների վերաբերյալ, որն ամբողջությամբ ներկայացնում ենք ստորեւ․

««Ապրելու երկիր» կուսակցությունը Փարաքարի ավագանու ընտրություններում հավաքել է 49% ձայն՝ ստանալով 10 մանդատ։ Դեկտեմբերի 17-ին տեղի ունեցած ավագանու առաջին նիստին «Ապրելու երկիր» խմբակցության կողմից համայնքի ղեկավարի թեկնածու է առաջադրվել Վալոդյա Գրիգորյանը։

Ավագանու մյուս անդամների կողմից նիստին ձևավորված չեն եղել խմբակցություններ և հնարավորություններ չեն ունեցել առաջարդել համայնքի ղեկավարի թեկնածու, ինչը Ընտրական օրենսգրքի 142.2 հոդվածի հստակ պահանջ է։

Արդյունքում Վալոդյա Գրիգորյանի օգտին քվեարկել են 10 կողմ, 0 դեմ, և, համաձայն Ընտրական օրենսգրքի 142.2 հոդվածի 8-րդ մասի, Վալոդյա Գրիգորյանն ընտրվել է Փարաքար համայնքի ղեկավար։

Այնուհետև ավագանին անցել է օրակարգի հաջորդ հարցերին և ավարտել առաջին նիստը։

Նիստի ավարտից հետո, որին ներկա էին ավագանու բոլոր անդամները, մյուս երկու ուժերի ավագանու անդամները օրենքի կոպիտ խախտումով՝ գերազանգելով իրենց լիազորությունները, «շարունակել են» նիստը, որտեղ կազմակերպել են «նոր քվեարկություն» և «ընտրել» համայնքի ղեկավար։

Այս կապակցությամբ «Ապրելու երկիր» կուսակցությունը պատրաստվում է դիմել իրավապահ մարմիններին՝ ավագանու 11 անդամի կողմից պաշտոնեական լիազորությունների անցման հիմքով քրեական գործ հարուցելու հարցով։

Հատկանշական է, որ ՔՊ կուսակցության կողմից առաջադրված թեկնածուն այդ նոր «ընտրություններում» ստացել է 0 ձայն՝ ունենալով ավագանու 6 անդամ՝ ներառյալ ինքը՝ թեկնածուն։

Դեկտեմբերի 23-ին օրենքի ուժով իրականացվել է Վալոդյա Գրիգորյանի երդմակալության արարողությունը, որից հետո ոստիկանությունը արգելել է Վալոդյա Գրիգորյանին և ավագանու մյուս անդամներին մուտք գործել համայնքապետարանի շենք։

Այնուհետև երդման արարողությանը հրավիրված քաղաքացիներն իրականացրել են բողոքի ակցիաներ, որի արդյունքում ոստիկանները բացել են համայնքապետարանի մուտքը։

Մյուս կողմը դիմել է դատարան՝ վիճարկելով ավագանու նիստի իրավազորությունը՝ դրանով փաստելով, որ նիստից հետո կազմակերպված նիստը ամբողջովին ապօրինի է եղել, և հրաժարվում են իրենց «հաղթանակից»։

«Ապրելու երկիր» կուսակցությունը ավագանու առաջին նիստի ընթացքում, անմիջապես դրանից հետո և մինչև այժմ փորձում է իշխանության թեկնածու Դավիթ Մինասյանի հետ քննարկել ստեղծված իրավիճակը և հնարավորինս արագ լուծումներ տալ և միասնական ուժերով օր առաջ լծվել Փարաքար համայնքը զարգացնելու գործին։

Ցավոք, Դավիթ Մինասյանի կողմից մինչև այժմ չկա որևէ արձագանք։

Մենք մեր հաղթանակը պատրաստ ենք ամրագրել նաև դատական ատյաններում, սակայն հաշվի առնելով, որ նման մթնոլորտում հետագա աշխատանքները չեն ունենալու բարձր արդյունավետություն, «Ապրելու երկիր» կուսակցությունը, թեև հաղթել է ավագանու ընտրություններում, պարտաստ է Փարաքար համայնքի ավագանու նոր ընտրությունների անցկացման՝ ակնկալելով մյուս երկու պարտված ուժերի ողջախոհությունը այս հարցում»։

Հիշեցնենք, որ Փարաքար խոշորացված համայնքում ՏԻՄ ընտրություններին մասնակցում էր երեք ուժ՝ «Ապրելու երկիր» կուսակցությունը, որը ստացել է 48,94 տոկոս ձայն, երկրորդը «Քաղաքացիական պայմանագիր» կուսակցությունն է՝ 27,54 տոկոս ձայնով և երրորդը՝ «Դավիթ Մինասյան» դաշինքը՝ 23,51 տոկոս ձայնով:

Այսպիսով, ընտրություններին մասնակցած ուժերից որևէ մեկը չէր կարողացել հաղթահարել ձայների 50 տոկոսից ավելիի շեմը:

Դեկտեմբերի 20-ին՝ ավագանու կայացած առաջին նիստի ժամանակ՝ քվեարկության ընթացքում, «Քաղաքացիական պայմանագիր» կուսակցությունն իր 5 ձայնը տվել էր «Դավիթ Մինասյան» դաշինքի առաջին համար Դավիթ Մինասյանին, որով նրա ձայները դարձել են 11: 

«Հայկական ժամանակ»-ի հետ զրույցում Փարաքարում «Քաղաքացիական պայմանագիր» կուսակցության գրասենյակի աշխատանքները համակարգող Կարեն Գրիգորյանն ասել էր, որ «Ապրելու երկիր» կուսակցությունն ընդմիջման ժամին է ընտրել իր թեկնածուին, որը հակաօրինական է: «Քվեարկությունը եղել է ընդմիջման ժամին։ Դա իրավաչափ չէ»,- ասել էր Գրիգորյանը՝ ընդգծելով՝ իրենք հետո շարունակել են նիստը և առաջադրել թեկնածու, որն էլ ստացել է ձայների մեծամասնությունը՝ 11 քվե։

Այսօր Արմավիրի մարզի Փարաքար համայնքում լարված իրավիճակ էր ստեղծվել: «Ապրելու երկիր» կուսակցության համակիրները՝ Մանե Թանդիլյանի և Մեսրոպ Առաքելյանի գլխավորությամբ, փակել էին դեպի օդանավակայան տանող ճանապարհը։ 

ՀՀ ոստիկանությունից «Հայկական ժամանակ»-ին հայտնել էին, որ բերման էր ենթարկվել 7 անձ՝ ոստիկանության օրինական պահանջը չկատարելու համար: