2022 թվականի գալստին հաշված օրեր են մնացել. որտեղ և ինչպես են դիմավորելու Ամանորը շոու բիզնեսի ներկայացուցիչները

2022 թվականին՝ վագրի տարվա գալստին հաշված օրեր և ժամեր են մնացել: Մինչ քաղաքական և հասարակական գործիչներն ամփոփում են 2021 թվականի ձեռքբերումները, արձանագրում բացթողումները, շոու բիզնեսի որոշ ներկայացուցիչներ «Հայկական Ժամանակ»-ի հետ զրույցում խոսել են այն մասին, թե ինչպե՞ս և որտե՞ղ են նշելու Ամանորը։

Դերասան, երգիչ շոումեն Արամ MP3-ի Ամանորը, ինչպես ամեն տարի, այս տարի ևս անցնելու է աշխատանքային մթնոլորտում: Ելույթներից, համերգներից հետո Արամը ժամանակն անցկացնելու է տանը՝ ընտանիքի հետ:

«2022 թվականին բամաթիվ ստեղծագործական ծրագրեր ունեմ՝ երգեր, տեսահոլովակներ, համերգներ: Հուսանք՝ կիրագործվեն: Հույս ունեմ նաև, որ գալիք տարի բոլորն առողջ և ամեն ինչ լավ կլինի: Պետք է հույսով և սիրով սպասել, որ այս տարին ամենալավը կլինի, կլինի նաև խաղաղություն մեր երկրում»,- հավատացած է նա:

Թե ի՞նչ է թողնում անցնող՝ 2021 թվականի 365 օրերում, Արամ MP3-ին կատակում է՝ ասելով՝ տարիքը, իսկ եթե ավելի լուրջ, այն ամենը, ինչ իրականցրել է 2021 թվականին: «2022-ին պետք է նոր բաների մասին մտածել, ինքդ քեզ վրա աշխատել, ավելի նոր մտքերի և նախագծերի փուլ մտնել: Նոր տարուց հետո եկող երկու ամիսները ստեղծագործական փուլն է, քանի որ «լուռ» ամիսներ են: Չենք ընկճվում, շարունակում ենք գնալ առաջ»,- խորհուրդ է տալիս Արամը՝ հայ ժողովրդին մաղթելով խաղաղություն:

Դերասանուհի Իննա Խոջամիրյանն էլ որոշել է գալիք տարին դիմավորել հետաքրքիր ձևով, սակայն դեռ հստակ չի իմանում՝ որտե՞ղ և ինչպե՞ս: «Հանգամանքներն ինձնից կախված չեն, հստակ չեմ կարող ասել՝ որտե՞ղ եմ լինելու Ամանորին»,- ասում է նա: 2022 թվականի համար ծրագրած անելիքների վերաբերյալ դերասանուհին դեռևս փակագծեր չի բացում, բայց ցանկությունը հստակ է. ուզում է, որ ամեն բան խաղաղ և անհոգ իրականանա:

«Հետաքրքիր սովորություն ունեմ՝ թղթի վրա գրում եմ այդ տարվա երազանքը, և, ի զարմանս ինձ, իրականանում է։ Օրինակ՝ 2021-ին թղթին հանձնել էի, որ մինչև 2022 թվականն իմ կյանքից հեռանան այն մարդիկ, որոնք իրապես ընկեր չեն, և դա իրականացավ։ Հիմա 2021-ին եմ թողնում այդ մարդկանց»,- անկեղծանում է Իննան՝ խոսելով այն մասին, թե ինչ է թողնում 2021 թվականում: Իսկ որպես ամանորյա բարեմաղթանք՝ ուղղված հայ ժողովրդին՝ դերասանուհին ցանկանում է, որ ազգը միասնական լինի:

Իսկ ահա դերասան Ռաֆայել Երանոսյանը հստակ որոշել է՝ Ամանորն անցկացնելու է տանը՝ ընտանիքի հետ։ Ռաֆայելն ընդգծում է՝ տոնական տրամադրություն չկա, իսկ 2022-ին  խաղաղություն է ցանկանում: «Սահմանում խաղաղ լինի, ուժեղ լինեն մեր զինվորները։ Ուզում եմ յուրաքանչյուրը զբաղվի իր գործով, ու մեկս մյուսին թև ու թիկունք լինելով՝ մեր երկիրը կառուցենք»,- նշում է նա։

Անդրադառնալով 2022 թվականի անելիքներին՝ Ռաֆայել Երանոսյանը խոստանում է՝ գալիք տարվա սկզբին՝ հունվարին, հանդիսատեսին սպասվում է նոր ներկայացում, ինչպես նաև կլինեն նոր սիթքոմի և գեղարվեստական ֆիլմի նկարահանումներ։

Երգիչ Վահագն Ռաշը ևս Ամանորը տանն է նշելու։ Ասում է, որ 2022 թվականի համար շատ անելիքներ կան ծրագրած, որոնք պիտի իրագործի. «Նոր երգերի ու տեսահոլովակի նկարահանումներ են սպասվում, դրանցից մի քանիսն արդեն ընթացքի մեջ են։ Ցանկանում եմ՝ 2022-ին լինենք խաղաղ ու երջանիկ»։

Երգչուհի Հասմիկ Կարապետյանը նույնպես ամանորյա տրամադրություն չունի, քանի որ վերջին երկու տարիները դաժան էին մեզ համար, սակայն հավատացած է, որ պետք է լավատես լինել և յուրաքանչյուր պահի նայել դրական տեսանկյունից։

Երգչուհին գալիք տարին ընտանիքի հետ միասին դիմավորելու է Երևանի ժամանցի վայրերից մեկում. «Հանուն իմ երեխաների ես պետք է ուժեղ լինեմ և կյանքով լի, որպեսզի երեխաներս էլ այդպես լինեն»,- ասում է Հասմիկը և հավելում, որ 2022-ի համար նախատեսում է նոր երգ և տեսահոլովակ, զուգերգ, ինչպես նաև կլինի համագործակցություն՝ կապված երաժշտության հետ:

«Ես ատում եմ ձմեռը, և ձմռանն ինձ մոտ ստեղծագործական դադար է։ Ինձ համար դժվար է ստեղծագործել ձմռանը: Ամռանը նորից կշարունակվեն համերգներս՝ կենդանի կատարմամբ, նաև սպասվում է մեծամասշտաբ մենահամերգ Երևանում»,- մանրամասնում է երգչուհին և խաղաղություն ու համբերություն ցանկանում հայ ժողովրդին։

Դերասանուհի Անահիտ Կիրակոսյանի համար Ամանորն աշխատանքային է լինելու: Անահիտն ասում է, որ այդ օրը վարելու է ամանորյա միջոցառում, սակայն ընտանիքը նույնպես իր հետ է լինելու։ «Ամանորը ասոցացնում եմ երեխաներիս հետ. միասին տոնածառն ենք զարդարում, տունը: Թող այս տարի խաղաղություն լինի և կորուստներ չունենանք»,- հույս է հայտնում դերասանուհին: 2022 թվականը նրա համար նույնպես ստեղծագործական առումով բուռն է լինելու:

Մերի Խաչատրյան