Սա լավագույն տարբերակն է բիզնեսի համար. օրեր հետո սահմանափակումներ կգործեն հանրային վայրեր այցելելու դեպքում

Կորոնավիրուսային հիվանդության հետ կապված իրավիճակը կանխելու նպատակով Հայաստանի առողջապահության նախարարությունը քննարկում և ընդունում է դրա վերաբերյալ տարբեր սահմանափակումներ: Այս ամենին զուգահեռ նախարարությունը շեշտում է՝ դրա դեմ պայքարելու միակ արդյունավետ միջոցը քովիդի դեմ պատվաստվելն է:

Սկզբում ՀՀ առողջապահական գերատեսչությունը հայտնեց, որ քննարկում է կորոնավիրուսի բուժումը վճարովի դարձնելը չպատվաստված քաղաքացիների շրջանում, հետո քննարկեց և ընդունեց հանրային սննդի կամ ժամանցի վայրեր այցելելիս ՊՇՌ թեստի բացասական պատասխան կամ պատվաստման սերտիֆիկատով մուտքի անհրաժեշտությունը: Քաղաքացիներն այդ վայրեր այցելելիս պետք է ներկայացնեն վերջին 72 ժամվա ընթացքում արված ՊՇՌ թեստի բացասական արդյունքը կամ վերջին 24 ժամվա ընթացքում ռապիդ թեստի պատասխան կամ պատվաստման սերտիֆիկատ:

Այս որոշումը ուժի մեջ է մտնելու 2022 թվականի հունվարի 20-ին:

ԵՊԲՀ համաճարակաբանության ամբիոնի դոցենտ Մերի Տեր-Ստեփանյանի խոսքով՝ նման միջոցառումները վաղուց ընդունելի ու կիրառելի են եվրոպական մի շարք երկրների համար: Հայաստանը, հիմնելով նրանց փորձի վրա, նույնպես որոշեց կիրառել դա, որպեսզի բարձրացնի պատվաստումային գործընթացը: Մասնագետն ասում է՝ ժամանցային վայրերի հիմնական թիրախը երիտասարդներն են, իսկ նրանք պատվաստումային գործընթացում ցածր շեմում են գտնվում:

«Սա առիթ է, որ պատվաստվեն նաև երիտասարդները: Նման միջոցառումների հիմնական նպատակը վարակի տարածումն ու հանրային առողջությունը պաշտպանելն է: Ճիշտ է, կան մարդիկ, որոնք կտրականապես դեմ են պատվաստմանը, բայց այս սահմանափակումն արդեն դրական ազդեցություն ունի. որոշակի առումով բարձրացրել է մեր երկրում քովիդի դեմ պատվաստված անձանց ցուցանիշը»,- «Հայկական ժամանակ»-ի հետ զրույցում ասաց նա:

Այս միջոցառումը կօգնի զերծ մնալ հիվանդանոցային ծանրաբեռնվածությունից, որը լինում է վարակի դեպքերի աճի դեպքում: Հայաստանում հիմա կորոնավիրուսային իրավիճակը կայուն է, նվազում են քովիդով գրանցման դեպքերը, իսկ այսպիսի սահմանափակումները հնարավորություն են տալիս դիմակայել քովիդի նոր ալիքներին:

«Մեզ մոտ հիմա միայն լարված վիճակ է գրիպի և սուր շնչառական վիրուսի առումով: Իսկ այս սահմանափակումը կխթանի, որ մարդիկ պատվաստվեն քովիդի դեմ, կօգնի դիմակայել հաջորդ ալիքին, որը երկար սպասեցնել չի տա: Մի քանի շաբաթից 5-րդ ալիքը կգա, որովհետև աշխարհում արդեն այդ միտումը կա: Մենք հիմա գտնվում ենք քովիդի 4-րդ ալիքի վերջում: Յուրաքանչյուր ալիք տևում է 12 շաբաթ»,- պարզաբանեց նա:

Համաճարակաբանի խոսքով՝ մարդիկ հիմա ավելի հակված են դեպի պատվաստումը, քանի որ ՊՇՌ հետազոտությունը հավելյալ ֆինանսական ծանրաբեռնվածություն է առաջացնում:

Իսկ ի՞նչ ազդեցություն կթողնի նոր սահմանափակումը տնտեսության վրա

ՀՀ ԱԺ «Քաղաքացիական պայմանագիր» խմբակցության պատգամավոր, տնտեսագետ Գևորգ Պապոյանը մեզ հետ զրույցում պարզաբանեց՝ սկզբում թվում է՝ եթե մարդը չկարողանա ՊՇՌ հետազոտության համար վճարի կամ չպատվաստվի քովիդի դեմ, չօգտվի հանրային սննդի և ժամանցի վայրերի ծառայությունից, ապա այդ վայրերը չեն կարողանա մատուցել ծառայություն և պետությանը հարկ չեն վճարի, ինչը կարճ տրամաբանություն է, ասում է նա:

«Երկար մտածողության արդյունքում, եթե այդ մարդկանց մեջ լինեն քովիդով վարակված 5-10 անձ, նրանք, մտնելով հասարակության մեջ ու օգտվելով որևէ ծառայությունից, վարակելու են բոլորին ու վարակի շղթա ստեղծեն: Պետությունը ծախսեր է կատարելու նրանց բուժման հարցում: Դրան զուգահեռ վարակի դեպքերի աճի հետևանքով լինելու է բժշկական ծանրաբեռնվածություն: Հասարակությունն ու պետությունը շատ ավելի են տուժելու, քան այն պարագայում, երբ կարելի է պարզապես քովիդի դեմ թեստ հանձնել ու պատվաստվել»,- ասաց Պապոյանը:

Նրա խոսքով՝ պետությունը նաև հանրային սննդի և վայրերի շահերն է պաշտպանում: Պետք է հանրային առողջության մակարդակը բարձր պահել: Լոքդաունի շրջանից հետո բիզնեսը փորձում է վերականգնվել, իսկ այս սահմանափակումը լավագույնն է, որ կարող է օգնել այդ ոլորտին:

«Եթե օրենքով հասարակության 99 տոկոսի շահը պահանջի ինչ-որ գործողություն, պետությունը կարող է անել մի բան, որը 0,1 տոկոսի կոմֆորտը կարող է խանգարել: Դա և՛ հանրության, և՛ պետության համար ճիշտ է: Սա այդպիսի որոշումներից մեկն է: Հանրային սննդի օբյեկտն իր պահանջները վերականգնելու համար պետք է աջակցի նմանատիպ սահմանափակումներին,- շեշտեց Պապոյանը:

Տնտեսագետն ասում է՝ լոքդաունի քաղաքականությանը Հայաստանն այլևս չի գնա, դրա փոխարեն կլինեն որոշակի հակաքովիդյան սահմանափակումներ: Պապոյանի խոսքով՝  մարդիկ, հետևելով այս սահմանափակմանը, կնպաստեն, որպեսզի այլևս նման դեպքեր չլինեն, երբ ծանրաբեռնված էին բժշկական հաստատությունները, ազատ մահճակալներ չկային: Դա հնարավորություն կտա ունենալ քիչ թվով վարակվածության դեպքեր և մահեր:

Իսկ կհետևե՞ն քաղաքացիներն այս սահմանափակմանը, թե՞ ոչ, Պապոյանն ասում է՝ պետությունն ունի բացատրելու և երբեմն էլ հարկադրելու իրավունք:

Մերի Խաչատրյան