Երևանում 7 մանկապարտեզ փակ է. սուր շնչառական վարակներով ու քովիդով պայմանավորված իրավիճակը լարված է

Հայաստանը դեռևս սուր շնչառական վարակների ու համաճարակային իրավիճակի ակտիվ գոտում է: Դրանք հատկապես թիրախավորում են երեխաներին: Այս պահին Երևանի շուրջ 7 մանկապարտեզ փակ է. պատճառը քովիդն է: Թե՛ անձնակազմի, թե՛ երեխաների հիվանդացության ցուցանիշը 10 տոկոսից բարձր է:

Երևանի թիվ 17 պոլիկլինիկայի մանկաբուժության գծով փոխտնօրեն Անահիտ Պիվազյանը «Հայկական ժամանակ»-ի հետ զրույցում ասաց՝ երեխաների հիվանդացության հետ կապված դիմումները վերջին շաբաթների ընթացքում աճել են: Այսօրվա դրությամբ տնային պայամններում վարակների դեմ բուժում է ստանում 35 երեխա, 3 երեխա էլ՝ ստացիոնար բուժում:

«Կարիքի դեպքում կատարում ենք թեստավորում՝ պարզելու՝ դա քովի՞դ է, թե՞ շնչառական վարակ: Բացի գրիպից, այլ շնչառական վարակներ կան, որոնց դեպքում թեստավորում չի կատարվում: Ելնելով կլինիկական ախտանշաններից՝ համապատասխան բուժօգնություն ենք տրամադրում: Եթե մանկաբույժը մի օրում ընդունում է 10-15 երեխա, նրանցից 3-ը հիվանդ են լինում ու բուժում պահանջում»,- նշեց նա:

Երեխաների բուժման ընթացքին երբեմն խոչընդոտում է մայրիկների կողմից իրականացվող ինքնաբուժությունը: Մանկաբույժի խոսքով՝ նրանք երբեմն մտածում են՝ թեթև մրսածություն է, կանցնի: Լինում են դեպքեր, երբ ծնողը ճիշտ ժամանակին է դիմում բժշկին, սակայն նրա կողմից նշանակված անտիբիոտիկներին է դեմ լինում:  

«Երեխաների տարիքային շեմը մինչև 18 տարեկաներն են: Ունեցել ենք 2 ամսական բալիկ ևս: Հիվանդացության ախտանշաները ջերմության բարձրացումն է, ընդհանուր թուլությունը, գլխացավը, մարմնացավը, շատ քչերի շրջանում՝ ցավը, կարմրությունը»,- հավելեց նա:

Երևանի թիվ 17 պոլիկլինիկայի մանկաբույժ Անուշիկ Խաչատրյանն էլ մեզ հետ զրույցում նշեց՝ երեխաների դիմելիությունը պոլիկլինիկա վերջին շաբաթների ընթացքում բավական աճ է ունեցել, այս շաբաթ պատկերը թեթևացել է, բայց մանկաբույժների աշխատանքը գերծանրաբեռնված է: «Հունվարի 31-ից մինչև փետրվարի 4-ը ունեցել ենք 18 երեխա, այս շաբաթ նրանց թիվը համեմատաբար քիչ է: Ունենք 9 ամսական երեխա, որի մոտ քովիդ էր հաստատվել և ստացիոնարում էր բուժում ստանում: 2 երեխա են եղել, որ բրոնխիոլիտ ունեին»,- ասաց Խաչատրյանը:

Հիվանդությամբ պայմանավորված՝ այցերը պոլիկլինիկայի կողմից անցած շաբաթ եղել են 19-ը: Այս շաբաթ դրանց թիվը 13-ն է: Կանչերը եղել են 2, անցած շաբաթ՝ 8-ը:

Երևան համար 154 մանկապարտեզի տնօրեն Արփիկ Խաչատրյանը «Հայկական ժամանակ»-ի հետ զրույցում նույնպես փաստեց երեխաների շրջանում հիվանդացության բարձրացումը: Դեկտեմբեր ամսվանից մինչև 2022-ի հունվար մանկապարտեզի 140 երեխայից հաճախում էր 80-ը. «Վերջերս նոր խումբ ունեցանք, որտեղ երեխաների թիվը դարձավ 70, հետո նորից քանակը նվազեց: Հիմա այդ խումբն էլ չի հաճախում»:

Սա նշանակում է, որ սուր շնչառական հիվանդությունները դեռ շարունակական են: Այս պահին մանկապարտեզի 171 երեխայից հաճախում է 115-ը: Լինում է այնպես, որ մանկապարտեզի անձնակազմն ինքն է զանգահարում ծնողներին և նրանց կանչում, որպեսզի երեխային, որը հիվանդ է, հետ տանեն տուն:

Սուր շնչառական վարակներով և համաճարակով պայմանավորված իրավիճակային պատկերը Հայաստանում

Առողջապահության նախարարության գլխավոր մանկաբույժ Սերգեյ Սարգսյանը «Հայկական ժամանակ»-ի հետ զրույցում նշեց՝ Հայաստանը սուր շնչառական վարակներով ու քովիդով պայմանավորված՝ գտնվում է ակտիվ փուլում: Այս պահին մոտ 200 երեխա մանկական ԲԿ-ներում է բուժում ստանում, նույնքան երեխա էլ բուժում է ստանում սուր շնչառական վարակների դեմ: Այս առումով մանկաբույժների աշխատանքը ծանրաբեռնված է:

«Քովիդով պայմանավորված բոլոր դեպքերում երեխաները կազմում են 4.5 տոկոս: Ակտիվ շրջանում ենք, բայց կանխատեսում ենք նվազում: «Օմիկրոն»-ի ախտանշաները գրեթե նույն են՝ համեմատած սուր շնչառական վարակների հետ: «Օմիկրոն»-ը առաջացնում է քթըմպանի բորբոքում, հարբուխ, հազ, ախտահարում է բրոնխները, առաջացնում սպաստիկ հազ, շնչառական անբավարարություն, փորլուծություն և փսխում: Երբեմն ականջի բորբոքում է լինում, թոքաբորբ, ջերմության բարձրացում, մեջքի ցավ, ախորժակի իջեցում»,- պարզաբանեց մանկաբույժը:

Ըստ նրա՝ հիվանդանոցներում բուժում ստացող երեխաների մեծ մասի մոտ առկա է կռուպ (հիվանդություն է, որն առաջացնում է շնչուղիների այտուցվածություն և շնչառության դժվարություն) ու բավականին ծանր է ընթանում: Դա առաջացնում են և՛ «Օմիկրոն»-ը, և՛ սուր շնչառական վարակները:

Կփակվե՞ն արդյոք մանկապարտեզները կորոնավիրուսային հիվանդությամբ ու սուր շնչառական վարակներով պայմանավորված

Առողջապահության նախարարության մամուլի խոսնակ Հռիփսիմե Խաչատրյանը մեզ հետ զրույցում ասաց. «Այս պահին մանկապարտեզները որոշ ժամանակով փակելու որևէ առաջարկ նախարարությունը չի ներկայացրել Երևանի քաղաքապետարան»:

Մերի Խաչատրյան