ԶԼՄ-ները թեթև կրակոցն անգամ այնպես են ներկայացնում, թե քաղաքը գրավել են. այցելուներ ունե՞ն Ջերմուկի հանգստի կենտրոնները

Շուրջ 20-օրյա դադարից հետո Ջերմուկում հյուրանոցային, ռեստորանային եւ առողջարանային կենտրոններից շատերն արդեն վերսկսել են աշխատանքը: Սեպտեմբերի 13-14-ին հակառակորդի հարձակումից առավել տուժած բնակավայրերից առողջարանային քաղաք Ջերմուկը վերադառնում է իր բնականոն կյանքին:

«Հայկական ժամանակ»-ը հետաքրքրվել է, թե քաղաքի առողջարանները, հյուրանոցներն եւ ռեստորաններն ինչ ակտիվությամբ են աշխատում, ունե՞ն արդյոք այցելուներ եւ ամրագրումներ:

«Արարատ մոր եւ մանկան առողջարան»-ի կոմերցիոն գծով տնօրեն Գրիգոր Հակոբյանը մեզ հետ զրույցում հայտնեց, որ իրենք գործունեությունը կսկսեն մի քանի օրից՝ ամեն ինչ վերջնական ու պատշաճ մակարդակի հասցնելուց հետո. «Մենք մոր եւ մանկան առողջարան ենք ու ավելի լավ է՝ մի քանի օր ուշ վերաբացվենք, բայց իմանանք, որ վերջնական է, քան բացվենք, նորից փակվենք»,- ասաց Հակոբյանը:

Վերջինս նաեւ նկատեց՝ անհրաժեշտություն ունեն պաշտոնական հայտարարությունների ավելի բարձր մակարդակով: «Երբ առողջարանը սեպտեմբերի 13-ին փակվեց, 170 հոգի հանգստացողներ ունեինք: Ծառայություններ էին ամրագրել, բայց մարդիկ եղան, որ հրաժարվեցին, ու գումարները հետ վերադարձրեցինք: Քանի որ լրատվամիջոցներն էլ սահմանի ամեն մի թեթեւ կրակոց ներկայացնում էին այնպես, կարծես Ջերմուկը գրավել են արդեն, մարդիկ էլ վախեցած զանգում, իրենց գումարներն էին հետ պահանջում»,- նշեց նա:

Կոմերցիոն գծով տնօրենը, սակայն, չցանկացավ խոսել կրած վնասների մասին. «Վնասն էլ կախված է նրանից, թե կոնկրետ երբ կվերաբացվենք»:

«Grand Resort Jermuk» հյուրանոցն արդեն մի քանի օր է՝ վերաբացվել է, Գագիկ Ստեփանյանը մեզ հետ զրույցում հայտնեց՝ առայժմ հատուկենտ այցելություններ ունեն: «Ռուսներ կան, որոնք եկել են, հայեր էլ կան, որ Ջերմուկ քաղաքին հատուկ օգնելու նպատակով զանգահարել են ու ամրագրումներ արել: Թե՛ երկրի տնտեսության, թե՛ հենց Ջերմուկի զարգացման համար անհրաժեշտ է, որ մենք մեր գումարները ծախսենք երկրի ներսում։ Ուստի բոլորին հրավիրում ենք վայելելու աշնանային Ջերմուկն ու նպաստելու քաղաքի վերածննդին»,- ընդգծեց նա:

«Jermuk hotel and spa» կենտրոնը ևս հայտարարել է վերաբացման մասին: Ունեն ամրագրումներ: «Արդեն ունենք թե՛ հարցումներ, թե՛ ամրագրումներ»,- ասաց Կենտրոնի ադմինիստրատիվ աշխատակիցը, սակայն նա չցանկացավ ամրագրումների հստակ թիվը հայտնել՝ ընդգծելով՝ իրավիճակից ելնելով՝ նորմալ են համարում պատկերը:

Իսկ ահա «Ֆորտե» ռեստորանը սեպտեմբերի 13-ի դեպքերից հետո փակվել է: Վերաբացվելու մտադրություն առայժմ չունեն: «Եթե ինչ-որ մեկն ուզում է այս իրավիճակում ռեստորանում հաց ուտել, թող այդ գումարը ծառայեցնի սահմանին կանգնած տղաների կարիքների համար: Մենք առայժմ տրամադրություն ու ցանկություն չունենք վերաբացվելու»,- հայտնեցին ռեստորանային համալիրից:

Բաղաբերդ ռեստորանում էլ նախապատրաստական աշխատանքներ են ընթանում: Ռեստորանի սեփականատեր Կորյուն Մկրտչյանը մեզ հետ զրույցում տեղեկացրեց՝ ամեն ինչ բերում են նախկին տեսքին, մաքրում, պատրաստում, որպեսզի վերսկսեն աշխատանքը: «Աշխատող կանայք էլ առայժմ քաղաքում չեն, սպասում ենք, որ նրանք էլ վերադառնան: Մի քանի օրից արդեն այստեղ կլինեն, ու կվերաբացվենք: Մոտ 12 հոգի է աշխատողների անձնակազմը»,- հայտնեց Մկրտչյանը:

Նշենք՝ երեկ էլ Ջերմուկի զբոսաշրջության զարգացման կենտրոնից էին հայտնել, որ գրեթե 20-օրյա դադարից հետո Ջերմուկում հյուրանոցային բիզնես իրականացնող ընկերությունները վերսկսում են իրենց աշխատանքները:

Հիշեցնենք՝ Ջերմուկում հյուրանոցների եւ քաղաքային մյուս ենթակառուցվածքների աշխատանքը դադարել էր սեպտեմբերի 12-ին Ադրբեջանի՝ ՀՀ-ի դեմ իրականացրած հարձակման հետևանքով, որի ընթացքում ադրբեջանական ԶՈՒ ստորաբաժանումները միտումնավոր թիրախավորել էին նաեւ Ջերմուկի քաղաքացիական ենթակառուցվածքները: Ադրբեջանական հրթիռակոծության և հրետակոծության հետևանքով լուրջ վնասներ էին կրել քաղաքի զբոսաշրջային կենտրոնները: