Խուճապ չկա, կա անհանգստություն. ինչ իրավիճակ է Ջերմուկում, բնակչության քանի տոկոսն է վերադարձել մշտական բնակության վայր

Սեպտեմբերի 13-14-ին հակառակորդի հարձակումից առավել տուժած բնակավայրերից առողջարանային քաղաք Ջերմուկը վերադարձել է իր բնականոն կյանքին, սակայն մարդկանց շրջանում դեռ անհանգստություններ կան:

Այս մասին «Հայկական ժամանակ»-ի հետ զրույցում ասում է Ջերմուկի փոխքաղաքապետ Վարդան Սարգսյանը: Նրա հավաստմամբ՝ տեղահանված բնակչության 70-80 տոկոսը կրկին վերադարձել է մշտական բնակության վայր:

«Խուճապ չկա, բայց անհանգստություն կա: Ադրբեջանցիները վիզուալ մեր տեսադաշտում են: Նրանց դիրքերը մեզ շատ մոտ են, ինչը եւ անհանգստության պատճառ է»,- ընդգծում է նա:

Փոխքաղաքապետի խոսքով՝ չնայած սրճարանները, առողջարանային կենտրոններն ու ժամանցի վայրերն արդեն գործում են, սակայն այցելուների զգալի պակաս կա, նկատելի է նաեւ զբոսաշրջիկների թվի նվազում:

Վարդան Սարգսյանի վստահեցմամբ՝ վերականգնվել ու վերաբացվել են բնականոն կյանքին անհրաժեշտ բոլոր ենթակառուցվածքները՝ դպրոցներ, մանկապարտեզներ, խանութներ եւ այլն, եւ այլն:

Հակառակորդի թիրախում են եղել քաղաքացիական օբյեկտները: Վնասվել են առողջարան, ԱԻՆ-ի շենքը, հյուրատներ, հարակից գազատարը, ճոպանուղին, հարակից օբյեկտներն ու շինությունները, ճամփեզրերը, մեքենաներ:

«Շատ մեծ վնաս է կրել քաղաքի շուրջ գտնվող լանդշավտն ու անտառածածկը: Սեպտեմբերի 19-20-ը բնապահպանության եւ ընդերքի տեսչական մարմնի հարուցած վարչական վարույթի շրջանակում տեսչական մարմնի աշխատակիցներն ԱԻՆ-ի, «Հայանտառ» ՊՈԱԿ-ի, ՏԻՄ ներկայացուցիչների ներգրավվածությամբ զննություն են իրականացրել: Զննվել է շուրջ 7 հեկտար անտառային տարածք։ Հաշվարկվում է բնությանը հասցված վնասի չափը։ Նյութերը փոխանցվելու են իրավապահ մարմիններին»,- նշում է Սարգսյանը:

Բնակելի տներից ապակիներ են վնասվել, մասամբ՝ նաեւ արտաքին պատերը, ծերպեր են թափվել եւ այլն, դրանք քաղաքապետարանի աջակցությամբ վերականգնվել են, ասում է փոխքաղաքպետը:

«7-8 բնակարանն է վնասել, նախնական գնահատմամբ: Ամեն դեպքում, որեւէ մեկն առանց կացարան չի մնացել: Մենք հրատապ կարգով արել ենք այն, ինչ անհրաժեշտ է: Առաջնային վերականգնել ենք ենթակառուցվածքները»,- մանրամասնում է նա:

Վերջինիս խոսքով՝ 20 եւ ավելի շինություն է վնասվել, եւ դեռ շարունակվում է վնասների գնահատումը. «Ինչ-որ վնասվել էր, վերականգնել ենք, բայց պասիվությունը դեռ կա: Ժամանակ է անհրաժեշտ»:

Վարդան Սարգսյանն ասում է՝ ճիշտ է, մարդիկ վերադարձել են, սակայն խնդրում են ապահովել իրենց անվտանգությունը. «Օր օրի մարդիկ ավելանում են, վերադառնում են իրենեց տներ, ոմանք այստեղ աշխատել են, գալիս են աշխատանքը շարունակելու»:

Նշենք՝ այսօր Էկոնոմիկայի նախարար Վահան Քերոբյանը հայտնել է, որ այս պահի դրությամբ Ջերմուկում զբոսաշրջային ակտիվությունը 10-15 տոկոս է։ Ճոպանուղին դեռեւս չի գործում: «Ես այցելել եմ Ջերմուկ սեպտեմբերի 13-ից հետո, ինչպես նաեւ՝ Վարդենիս, որպեսզի անձամբ ծանոթանամ այնտեղ տիրող իրավիճակին, նշել եմ, որ անհանգստացնող է վիճակը։ Պետք է նշել, որ Ջերմուկի հյուրանոցներն սկսել են աշխատել, սակայն սեպտեմբերի 13-ի գիշերը ոչ մի ազատ տեղ չի եղել: Հիմա, ճիշտ է, այդպիսին չէ իրավիճակը, բայց ակտիվություն կա»,- ասել է Քերոբյանը:

Հիշեցնենք՝ մոտ երկու շաբաթ առաջ էր հայտարարվել Ջերմուկում բնականոն կյանքի վերականգնման մասին. շուրջ 20-օրյա դադարից հետո հյուրանոցային, ռեստորանային եւ առողջարանային կենտրոններից շատերը վերսկսել էին աշխատանքը: «Հայկական ժամանակ»-ը հետաքրքրվել էր՝ քաղաքի առողջարանները, հյուրանոցներն ու ռեստորաններն ինչ ակտիվությամբ են աշխատում, ունե՞ն արդյոք այցելուներ եւ ամրագրումներ:

Հիշեցնենք՝ Ջերմուկում հյուրանոցների եւ քաղաքային մյուս ենթակառուցվածքների աշխատանքը դադարել էր սեպտեմբերի 12-ին Ադրբեջանի՝ ՀՀ-ի դեմ իրականացրած հարձակման հետեւանքով, որի ընթացքում ադրբեջանական ԶՈՒ ստորաբաժանումները միտումնավոր թիրախավորել էին նաեւ Ջերմուկի քաղաքացիական ենթակառուցվածքները: Ադրբեջանական հրթիռակոծության եւ հրետակոծության հետեւանքով լուրջ վնասներ էին կրել քաղաքի զբոսաշրջային կենտրոնները: