Ձեր կիսագրագետ լրագրողներից մեզ փրկեք. Ղազարյանը՝ ընդդիմությանը

Հանրային հեռուստաընկերության հաղորդավար Պետրոս Ղազարյանը «Ֆեյսբուք» սոցիալական ցանցի իր էջում անդրադարձել է նախօրեին լրատվամիջոցներից մեկում հրապարակված՝ ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի տված հարցազրույցին, որտեղ վերջինս հրաժարվել է ավելի վաղ «Երկիր Մեդիա» հեռուստաընկերությանը տված հարցազրույցում իր արտահայտած մտքերից մեկից, որտեղ ասել էր, թե «հնարավոր միջանցքի մասին հարցերը պետք է տալ նրանց, ովքեր ստորագրել են համաձայնագրերը։ Հայկական կողմից դա եղել է Նիկոլ Փաշինյանը։ Երբ նա ստորագրում էր այդ համաձայնագիրը, ինչի՞ մասին էր մտածում։ Միջանցքը ստորագրել է Փաշինյանը»:

Ղազարյանը նկատել է՝ Զատուլինը լրագրողին ասում է, որ ինքը նման բան չի ասել, և իր խոսքը խեղաթյուրել են իշխանամետ լրագրողները։

«Ավելին՝ Զատուլինը պնդում է, որ Ալիևի ներկայացրած 5-կետերի մեջ «Զանգեզուրի միջանցք» կա, և Հայաստանը այն քննարկել է Սոչիում։ Ինձ էնքան էլ հասկանալի չէ՝ Զատուլինը իրո՞ք չի կարդացել այդ 5 առաջարկները, թե՞ միտումնավոր այնտեղ «Միջանցք» է խցկում։

Ինձ ապշեցնում է մեր լրագրողների որակը։

Երբ Զատուլինը «Երկիր Մեդիա»-ի լրագրողին ասում է, որ «Միջանցք»-ի մասին ձեր ղեկավարն է համաձայնագիր ստորագրել, և գնացեք իրեն հարցրեք, լրագրողը բերանը ջուր է առնում և չի հարցնում՝ այդ ո՞ր համաձայնագրում է Զատուլինը «Միջանցք» տեսել։

Երբ Զատուլինը «Հրապարակ»-ի լրագրողին ասում է, որ ինքը նման բան չի ասել, սույն լրագրողը նույնպես ձայն չի հանում։ Ավելին՝ Զատուլինը ասում է, որ Ադրբեջանի ներկայացրած 5 կետերի մեջ «Զանգեզուրի միջանցք» կա, և մենք համաձայնել ենք քննարկել դրանք։

Պատկերացնում եք՝ լրագրողը, որ Հայաստանի համար նման նուրբ ու կարևոր հարցի շուրջ է խոսում, չի ֆայմում Զատուլինին հիշեցնել, որ այդ 5 կետերում «Միջանցք»-ի մասին խոսք չկա։

Մեր ընդդիմությունը երկիրը փրկելուց առաջ գուցե իր կիսագրագետ լրագրողներից մեզ փրկի։

Հիշեցնենք՝ Պետրոս Ղազարյանը, «Հայաստան» խմբակցության պատգամավոր Արծվիկ Մինասյանի հետ օրերս տեղի ունեցած հարցազրույցի ժամանակ շոշափելով Զատուլինի՝ Հայաստան մուտքի արգելքի թեման, մասնավորապես ասել էր․ «Զատուլինը հայտարարում է, որ նոյեմբերի 9-ի հայտարարության մեջ մենք «միջանցք» ենք ստորագրել, և նա ասում է՝ գնացեք ստորագրողին հարցրեք, թե ինչու է ստորագրել, սա Ալիևի նարատիվն է։ Երբ Զատուլինը կրկնում է Ալիևի միտքը, ե՛ւ ստում է, ե՛ւ դա ուղղված է մեր պետականության դեմ, ձեզնից մեկը էնտեղ չի ասում՝ հարգելի՛ Զատուլին, գուցե դրա՞ համար է Ձեր մուտքն արգելվել, ուզում եք ՀՀ սուվերեն տարածքը վերցնեք ու տաք Ադրբեջանին»։

Իսկ Զատուլինը, հրաժարվելով իր իսկ հայտարարություններից, մասնավորապես ասել է. «Ոչ, ես այդպիսի բան չեմ հայտարարել: Հայկական լրատվամիջոցներից մեկն ինձ հարց տվեց, թե ինչու է ՌԴ-ն ՀՀ-ից պահանջում, որ միջանցք բացի։ Ես ասացի, որ միջանցքի հարցի վերաբերյալ ամեն ինչ ճշտեք Նիկոլ Փաշինյանից, քանի որ նա իր վրա է վերցնում կամ չի վերցնում ինչ-որ պարտավորություններ, այդ թվում՝ կապված միջանցքի հետ։ Ահա այն ամենը, ինչ ես ասել եմ դրա վերաբերյալ, ես ոչ մի համաձայնագրի հղում չեմ կատարել։ Դա արդեն հետո սկսեցին գրել, թե Զատուլինը ՀՀ-ին վերագրում է միջանցքի համաձայնություն, մինչդեռ եռակողմ հայտարարության մեջ նման համաձայնություն չկա։ Ես եռակողմ հայտարարությանն ընդհանրապես հղում չեմ արել, դա այդպես են մեկնաբանել հայկական այն ԶԼՄ-ները, որոնք Կառավարության գիծն արդարացնելու շահագրգռվածություն ունեն, բայց ես Ձեր ուշադրությունն եմ ուզում հրավիրել այն բանին, որ եթե հաստատվի այն ամենը, ինչ գրված է, այսպես կոչված, «վաշինգտոնյան դեկլարացիայում», ապա «միջանցք» բառն այնտեղ չի օգտագործվում, բայց այնտեղ կա կետ՝ կապված ցամաքային ճանապարհի հետ, որը կարելի է անվանել միջանցք կամ չանվանել»:

Նշենք, որ Կոնստանտին Զատուլինը ՀՀ Ազգային ժողովից պաշտոնական գրություն է ստացել, որով տեղեկացել է՝ ՀՀ-ում ճանաչվել է անցանկալի անձ, և վերջինիս մուտքը արգելված է Հայաստան: