Գագիկ Ջհանգիրյանի և Ռուբեն Վարդազարյանի զրույցի ձայնագրության մասով հարուցված քրեական վարույթը կարճվել է

2022 թվականի դեկտեմբերի 7-ին վարույթն իրականացնող մարմինը որոշում է կայացրել Ռուբեն Վարդազարյանի և Գագիկ Ջհանգիրյանի զրույցի մասով հարուցված քրեական վարույթը կարճելու մասին՝ քրեական օրենսգրքով նախատեսված որևէ հանցանքի բացակայությունը հաստատվելու հիմքով:

Այս մասին «Հայկական ժամանակ»-ին հայտնեց ՀՀ քննչական կոմիտեի մամուլի խոսնակ Գոռ Աբրահամյանը:

««YouTube» կայքում 2022թ. հունիսի 20-ին տեղադրված՝ Ռուբեն Վարդազարյանի կողմից հրապարակված ձայնագրության վերաբերյալ տեսանյութի և 2022թ. հունիսի 22-ին ՀՀ գլխավոր դատախազությունից ստացված, նույն տեսանյութի առնչությամբ «Իրազեկ քաղաքացիների միավորում» խորհրդատվական ՀԿ-ի ծրագրի համակարգող Դ. Իոաննիսյանի կողմից ՀՀ գլխավոր դատախազին հասցեագրված հաղորդման հիմքով ՀՀ քննչական կոմիտեի հատուկ հանձնարարություններով գլխավոր վարչության հատուկ հանձնարարություններով գործերի քննության վարչությունում 2022 թվականի հուլիսի 1-ին նախաձեռնվել էր քրեական վարույթ ՀՀ քրեական օրենսգրքի 441-րդ հոդվածի 1-ին մասի և 486-րդ հոդվածի 2-րդ մասի 2-րդ կետի հատկանիշներով:

Նախաձեռնված քրեական վարույթով կատարվել են բազմաթիվ վարութային և ապացուցողական գործողություններ Ռուբեն Վարդազարյանի հրապարակած ձայնագրությունում տեղ գտած, ինչպես նաև ցուցմունքում հայտնած՝ քրեական վարույթի համար հետաքրքրություն ներկայացնող տեղեկությունների հավաստիությունն այլ ապացույցներով ստուգելու ուղղությամբ: Իրականացված ծավալուն քննության արդյունքում, սակայն, ձեռք չեն բերվել Գ․ Ջհանգիրյանի, Վ․ Քոչարյանի և Ս․ Չիչոյանի կողմից վերոնշյալ հանցավոր արարքները կատարելու մասին բավարար ապացույցներ։ Ելնելով դրանից՝ վարույթն իրականացնող մարմինը միջնորդություն է ներկայացրել հսկող դատախազին՝ վերջիններիս նկատմամբ հանրային քրեական հետապնդում չհարուցելու մասին։ Միջնորդությունը բավարարվել է, և որոշում է կայացվել նշված 3 անձանց նկատմամբ քրեական հետապնդում չհարուցելու մասին՝ մեղսագրվող արարքները նրանց կողմից չկատարելու հիմքով:

2022 թվականի դեկտեմբերի 7-ին վարույթն իրականացնող մարմինը որոշում է կայացրել քրեական վարույթը կարճելու մասին՝ քրեական օրենսգրքով նախատեսված որևէ հանցանքի բացակայությունը հաստատվելու հիմքով»,- ասաց նա:

Անդրադառնալով Վարդազարյանի այն պնդմանը, որ իր և Գագիկ Ջհանգիրյանի միջև առերեսում տեղի չի ունեցել, Աբրահամյանը նշեց, որ վարույթն իրականացնող մարմինը քննչական այդ գործողությունը կատարելու ուղղությամբ պատշաճ միջոց ձեռնարկել է. «Այդ հանգամանքը պարզաբանվել է պարոն Վարդազարյանի կողմից ներկայացված միջնորդության վերաբերյալ կայացված որոշմամբ և ուղարկվել իրեն»:

Նշենք, որ, եթե միջոց է ձեռնարկվել առերեսում անցկացնելու ուղղությամբ, և այն տեղի չի ունեցել, ենթադրվում է, որ մյուս կողմը օգտվել է իր իրավունքից ու հրաժարվել դրան մասնակցելուց։

Հիշեցնենք, որ ԲԴԽ նախկին նախագահ Ռուբեն Վարդազարյանը սույն թվականի ամռանը մամուլի ասուլիս էր հրավիրել, որի ընթացքում գաղտնի ձայնագրություն էր հրապարակել և հայտարարել, թե ունի ապացույց, որ իր դեմ կատարվող «արշավն» ու ամեն ինչ քաղաքական որոշում է, ու ԲԴԽ-ում իրեն զրկել են ապացույց ներկայացնելու իրավունքից։

Ըստ Վարդազարյանի՝ ձայնագրությունը կատարվել է 2021 թվականի փետրվարի 20-ին. զրուցում են ինքը, այդ ժամանակ ԲԴԽ նախագահի պարտականությունները կատարող Գագիկ Ջհանգիրյանն ու ԲԴԽ անդամ Ստեփան Միքայելյանը։

Հիշեցնենք, որ տարածված ձայնագրության վերաբերյալ հաղորդագրություն էր տարածել ՀՀ դատախազությունը: Կառույցից հայտնել էին, որ Վարդազարյանի և Ջհանգիրյանի խոսակցության ձայնագրությունը ստուգման նպատակով ուղարկվել է ՀՀ քննչական կոմիտե:

Ձայնագրությանն արձագանքել էր նաև ԲԴԽ-ն, որը հայտնել էր՝ Գագիկ Ջհանգիրյանը մասնավոր զրույցը չի մեկնաբանում, և այն տեղի է ունեցել առանց վերջինիս իմացության: