Մեղադրանքները, թե ՀՀ իշխանությունը ԼՂ հարցի շուրջ քայլեր չի ձեռնարկում, հնչեցնում են ռուսական պրոքսինները. քաղաքագետ

«Հանուն Հանրապետության» կուսակցության փոխնախագահ Ռուբեն Մեհրաբյանը կարծում է, որ ռուս խաղաղապահներն ու Ռուսաստանը ոչ մի քայլ չեն ձեռնարկելու Լաչինի միջանցքի բացման հարցում, որովհետև ռուսական կողմը ևս իր մասնաբաժինն ունի այս ճգնաժամում:

«Հատկանշական է, որ սույն ճգնաժամը հանգուցալուծվելու է ոչ թե ռուսների միջնորդությամբ կամ ռուսների հետ, այլ, ի հեճուկս ռուսների, այսինքն՝ նրանց շահերի հաշվին: Ինչպես տեսնում ենք, դա հենց այդպես հիմա էլ իրականանում է, որի վկայությունն է հայկական և ադրբեջանական կողմի հեռախոսային խոսակցությունը ԱՄՆ նախագահի Անվտանգության հարցերով խորհրդականի հետ, ինչի արդյունքում ադրբեջանական կողմին վիրտուալ կերպով բերման ենթարկեցին և կարգի հրավիրեցին»,- «Հայկական ժամանակ»-ի հետ զրույցում նկատում է նա:

Մեհրաբյանի դիտարկմամբ՝ այն, որ ռուսական կողմից խոսում են, թե հումանիտար օգնությունը հասել է արցախցիներին, և թեկուզ մեկ շտապօգնության մեքենա է անցել, միայն հիմք է տալիս նրա, որ ռուսական կողմը տարածի այնպիսի տեղեկատվություն, որն ինքն է ցանկանում:

«Անգամ Կրեմլի խոսնակն առանց կարմրելու հայտնում է, որ ռուս խաղաղապահներն իրենց բոլոր պարտավորությունները կատարում են հավուր պատշաճի, ինչն էլ լպիրշ սուտ է: Դրան զուգահեռ էլ Մարիա Զախարովան նեղվում է, որ իրենց խաղաղապահ առաքելության մասով քննադատություններ են հնչում, որը ևս ցինիզմի գագաթնակետն է: Այս ֆոնին չպետք է զարմանալ, որ անգամ մեկ շտապօգնության մեքենան ռուսները կարող են դրոշակ դարձնել»,- ասում է նա:

Անդրադառնալով ՄԱԿ-ի ԱԽ նիստին՝ զրուցակիցը հիշեցնում է՝ Ռուսաստանը ոչ միայն հերքեց Լաչինի միջանցքի փակ լինելը, այլև հարեց ադրբեջանական կողմի առաջ քաշած մտքին՝ ասելով, որ, այո՛, կան որոշակի էկոլոգիական խնդիրներ:

«Սա բացարձակապես չի համապատասխանում իրականությանը ու, բացի դա, չի բխում նոյեմբերի 9-ի հայտարարությունից: Ռուսաստանն այս կերպ ևս մեկ անգամ ցույց է տալիս, որ իր առաջ խնդիր է դրել Արցախում մշտապես կոնֆլիկտ հրահրելու, որովհետև, եթե այդտեղ կոնֆլիկտ չլինի, ռուսներին կարճ ժամանակ անց ասելու են՝ հաջողություն: Դրանից զատ էլ, ռուսական կողմը ՄԱԿ-ում անգամ չպահանջեց Լաչինի միջանցքի ապաշրջափակումը: Սա տանում է հռետորական բնույթի այն եզրակացության, որ եթե մենք ունենք նման դաշնակից, ինչպիսին Ռուսաստանն է, մեզ թշնամի այլևս պետք չէ»,- ընդգծում է Մեհրաբյանը:

Խոսելով Եվրոպական դատարանի որոշման մասին՝ Լաչինի միջանցքի փակման մասով, ասում է՝ այդ մասին կարող ենք խոսել և վերջնական գնահատական տալ միայն այն ժամանակ, երբ որոշումն էլ լինի վերջնական. «Միջանկյալ որոշումն այն է, ինչը դատարանն այսպես, թե այնպես կարող էր անել: Պետք է սպասենք հետագա զարգացումներին»:

Մեհրաբյանի խոսքով՝ այն մեղադրանքներն էլ, թե ՀՀ իշխանությունը ԼՂ հարցի վերաբերյալ համապատասխան քայլեր չի ձեռնարկում, հնչում են բացառապես ռուսական պրոքսինների կողմից:

«Ռուսական պրոքսինների հայտարարություններին պետք է վերաբերվել այնպես, ինչպես դրանք կան, պարզապես՝ պրոքսինական հայտարություններ, ինչը հիմա անում են զատուլիններն ու զախարովանները: Նրանք հրահրում են ճգնաժամ և դրանում մեղադրում հայկական կողմին: Նույնն անում են ռուսական պրոքսիններն ու մեր խորհրդարանի 5-րդ շարասյունն ու 6-րդ պալատը: Այս բոլոր հայտարարությունները բացառապես նույն օպերայից են, պարզապես՝ տարբեր տարածքներում»,- կարծում է զրուցակիցը:

Ըստ նրա՝ այս շրջանում Հայաստանը, բարեբախտաբար, ընդդիմադիր կողմի մասով ներքին քաղաքական խնդիրներ չունի. «Ընդդիմադիր կողմի ներկայիս լռությունն այն մասին է, որ մենք խնդիրներ չունենք, սակայն խնդիրներ ունեն նրանք. եկել ու  հարկատուների հաշվին նստել են խորհրդարանում: Փաստացի չունեն անգամ ոչ մի սոցիալական հենարան որևէ քաղաքական թեզի համար»:

Անդրադառնալով Արցախի հարցի կարգավորմանը՝ Մեհրաբյանը կարծիք է հայտնում, որ դրա համար պետք է գնալ բանակցությունների և կքնել խաղաղության պայմանագիր:

«Պետք է հասկանալ՝ խաղաղության պայմանագրի կնքումը ևս պայքար է, որը ոչ պակաս ջանքեր է պահանջում, քան պատերազմը: Այս ճանապարհին միջազգային հանրության ժողովրդավարական ընկերակցությունը ևս հարում է սույն դիրքորոշմանը: Հաշվի առնելով այդ հանգամանքը՝ Հայաստանը պետք է որոշակիացնի իր դիրքորոշումն այն գործընկերների հետ հարաբերություններում, որոնց հետ ունի շահի, արժեքների և նպատակների ընդհանրություններ: Վերոնշյալներից ոչ մեկը, ի դեպ, Ռուսաստանի մասին չէ»,- շեշտում է նա:

Նատալի Մկրտչյան