Որոշներին աշխատանք ես առաջարկում, նախընտրում են բազմոցին պառկած մնալ ու բարեկամներից օգնություն ստանալ. Քերոբյան

Այսօր լրագրողների հետ զրույցում էկոնոմիկայի նախարար Վահան Քերոբյանը, անդրադառնալով «Ֆեյսբուք»-ի իր էջում կատարած վերջին գրառմանը, ըստ որի՝ մեկ շնչին բաժին ընկնող ՀՆԱ-ն կհասնի 6600-6800 դոլարի, և Հայաստանը կանցնի Թուրքիային, աշխատավարձերն էլ կբարձրանան, ասաց՝ մենք, որպես երկիր, պետք է փոխենք մեր մտածելակերպը, ինստիտուտները, դրանց որակը, որպեսզի կարողանանք դառնալ այլ կլասի երկիր և զարգանալ:

«Կարիք կա մեր պետական ինստիտուտների համապատասխանեցման, որովհետև դրանց շնորհիվ կկարողնանք փոխել մեր երկրում ապրող քաղաքացիների կյանքի որակը ևս»,- ասաց նա:

Քերոբյանի խոսքով՝ առկա թվերը մեր երկրի ընդհանուր հաշվարկված թվերն են, և եթե խոսենք բիզնեսմենների հետ, կտեսնենք, թե ինչպիսի առաջընթաց են գրանցել նրանք այս տարվա ընթացքում:

«Բիզնեսները ևս փոխել են իրենց կլասը, ավելի են զարգացել մի շարք առումներով: Օրինակ՝ Երևանի շոկոլադի գործարանը տեղական շուկայում 20 տոկոսով աճել է, արտահանում է 3 անգամ ավելի, ընդհանուր առևտրաշրջանառությունն էլ 2.5 անգամ ավելացրել է, ու դա ընդամենը մեկ տարվա մեջ: Սա նշանակում է, որ այդ ընկերությունն էլ փոխել է իր կլասը»,- նշեց նա:

Անդրադառնալով իր հայտնած չոր նավահանգիստ ստեղծելուն՝ վերջինս նկատեց՝ e-draft կայքում ամեն բան տեղադրած է, որի միջոցով կարող են ծանոթանալ ծրագրի մանրամասներին:

«Նախագիծն ադյունաբերական պարկ է, որը դեռևս Հայաստանում չկա, սակայն դրանք նախատեսված են մշակող արդյունաբերության ու նման ընկերությունների անհրաժեշտ առաջնակարգ ենթակառուցվածքներով ապահովելու, ինչպես նաև դրան կից լոգիստիկ կենտրոն ունենալու, որպեսզի տրանսպորտային միջոցներով բեռների տեղափոխումն իրականացվի բարձրակարգ եղանակով և նվազագույն ծախսերով: Բնական է, կլինի նաև ազատ տնտեսական գոտի: Անցած շաբաթ էլ նախագիծը հավանության է արժանացել Հանրային ներդրումային կոմիտեում: Թևակոխում ենք խորացված տեխնիկական-տնտեսական փուլ, որին կհաջորդի ներդրումային ծրագիրը: Դա նախատեսում է պետություն մասնավոր գործընկերություն ընթացակարգը, որի ընթացքում նախատեսվում են նաև առաջնակարգ արդյունաբերական պարկեր և տնտեսական գոտիներ, որոնք տարածաշրջանում բավականին ակտիվ են»,- մանրամասնեց տնտեսական գերատեսչության ղեկավարը:

Լրագրողների դիտարկմանը, որ չոր նավահանգստի գաղափարը համացանցում հեգնական համեմատում են կոկորդիլոսաբուծության հետ, Քերոբյանն ասաց՝ Էկոնոմիկայի նախարարությունը չի կարող աշխատել սոցցանցերի տարածած գաղափարներով.

«Մարդիկ սոցցանցերով ինքնահաստատման համար կարող են ծաղրել որոշ նախագծեր, սակայն նախարարությունը նման բազում ծրագրեր արդեն իսկ կյանքի է կոչել: Մենք նայում ենք համացացնում տարածվող կարծիքներին, սակայն դա մեզ համար առաջնորդող չէ, մենք պետք է ցույց տանք, թե որոնք են առաջնակարգ, որպեսզի զարգանանք: Չոր նավահանգիստը միտված է լուծել Հայաստանի լոգիստիկ խնդիրները»:

Այն հարցին, թե տնտեսությունը զարգանում է, սակայն պաշտոնական տվյալներով աղքատության ծավալների աճ կա, ի՞նչ է սա նշանակում, Քերոբյանն ասաց. «Այո՛, մի քանի տարվա կտրվածքով կա աղքատության ծավալների աճ: Սակայն այս տարվա նոյեմբեր ամսվա տնտեսական ակտիվության ցուցանիշնն էլ կազմել է 113.8 տոկոս, իսկ ամբողջ տարվա համար՝ 114.4 տոկոս, ինչը Հայաստանի լավագույն ցուցանիշներից է: Փորձում ենք  այնպես անել, որ դա բաշխվի այնպես, որպեսզի առավել խոցելի խավը կարողանա չվատացնել իր կյանքի որակը: Պետք է նկատի ունենալ, որ շատ բան կախված է հենց մարդկանցից: Որոշներին, երբ աշխատանք ես առաջարկում, նախընտրում են ոչ թե աշխատելը, այլ բազմոցին պառկած մնալը ու բարեկամներից օգնություն ստանալը: Ստացված տրանսֆերտներն էլ լուրջ խոչընդոտ են դրա համար»: