Խաղաղության հույսով ու սպասումով․ որտեղ և ինչպես են դիմավորելու Ամանորը շոու բիզնեսի ներկայացուցիչները

2023 թվականին՝ ջրային նապաստակի տարվա գալստին հաշված ժամեր են մնացել: Մինչ քաղաքական և հասարակական գործիչներն ամփոփում են 2022 թվականին ձեռք բերած հաջողություններն ու կորուստները, շոու բիզնեսի որոշ ներկայացուցիչներ «Հայկական Ժամանակ»-ի հետ զրույցում խոսել են այն մասին, թե ինչպե՞ս և որտե՞ղ են դիմավորելու Ամանորը։

Նրանցից շատերի համար դեկտեմբերի 31-ն աշխատանքային է լինելու, իսկ մաղթանքը միմիայն խաղաղությունն է:

Դերասան, երգիչ շոումեն Արամ MP3-ի Ամանորը, ինչպես ամեն տարի, այս տարի ևս անցնելու է աշխատանքային մթնոլորտում: Ելույթներից, համերգներից հետո է նա Նոր տարին նշում ընտանիքի անդամների հետ: «Ամանորի գիշերը չեմ հասցնելու լինել ընտանիքիս հետ, չնայած արդեն սովոր են։ Միասին նշում ենք հունվարի 1-ից հետո, երբ աշխատանքային գործընթացը դադարեցված է լինում։ Դեկտեմբերը միշտ աշխատանքային առումով լի ամիս է»,- մեր զրույցում ասում է նա։

Երգիչը դժգոհ չէ 2022-ից. այն կատարել է իր ամանորյա երազանքը, որը պահում էր ամեն տարի․ «Իմ ընտանիքում ևս մեկ անդամի համալրման տարի էր՝ ծնվեց աղջիկս։ Մեծ ձեռքբերումներ ունեցա։ Այսինքն՝ 2022-ն ինձ համար ամբողջությամբ հաջողված տարի էր»:

Արամը բոլորին մաղթում է ընտանեկան սեր և առողջություն և, ամենակարևորը, խաղաղություն մեր երկրին։

Ամանորը կրկին աշխատանքային, բայց միևնույն ժամանակ ընտանեկան ջերմությամբ լցված տոն է լինելու դերասան Ռաֆայել Երանոսյանի համար։ Այս տարի էլ դերասանը Նոր տարին կդիմավորի ծնողների հետ իր հայրենի գյուղում՝ գյուղական տաք անկյունում: «Ամանորի գիշերը կաշխատեմ ու հետո կշտապեմ ընտանիքիս մոտ։ Սովորական ընտանեկան տոն է սա մեզ համար։ Ճոխ սեղան, իհարկե, չի լինելու, բայց գյուղում հյուրերը շատ կլինեն»,- ասում է նա։

2022-ից ստացած նոր ձեռքբերումների, հաջողությունների և նոր ընկերների հետ միասին Ռաֆայելը պատրաստվում է դիմավորել 2023-ը։ Նոր տարվա մեջ էլ հնարավոր է՝ երկրպագուները դերասանին այլևս միայնակ չտեսնեն։

«2022-ն ինձ համար շատ լավ տարի էր, բայց երբ շուրջդ վատ է, դու քո ուրախությունն էլ չես կարողանում հանգիստ վայելել։ Նոր տարուն ցանկանում եմ մեր երկրին միայն խաղաղություն, և այդ խաղաղությունը նաև մարդկանց ներսում է պետք։ Ուզում եմ՝ մեր ժողովուրդը տխրությունից դուրս գա և փորձի նաև դրական մթնոլորտում ապրել։ 2023 թվականի համար նպատակները շատ են»,- նշում է նա:

2022 թվականը նոր ձեռքբերումներով և գունավոր իրադարձություններով հաջողակ տարի է եղել նաև դերասանուհի Իննա Խոջամիրյանի համար։

«2019 թվականից սկած՝ ես Ամանորը դիմավորում էի Հայաստանից դուրս, այսինքն՝ յուրաքանչյուր տարի մի երկրում էի և նոր բացահայտումների մեջ։ Այս տարի լինելու եմ ընտանեկան ջերմ միջավայրում՝ Հայաստանում՝ ընտանիքիս հետ եմ դիմավորելու, նույնիսկ հայրս ու մայրս շատ են ուրախացել (- հեղ. ժպտում է)»,- ասում է Իննան։

Դերասանուհին հույս ունի, որ գալիք տարին կլինի լավագույնը, և բոլորին մաղթում է խաղաղություն, սեր ու ջերմություն միմյանց նկատմամբ։

Երգչուհի Սիլվա Հակոբյանն էլ 2022-ը ճանապարհելու է ընտանիքի հետ միասին, չնայած Ամանորը նրա համար նաև մի փոքր աշխատանքային է լինելու։ Մեզ հետ զրույցում ուրախությամբ նշում է՝ անցնող տարին իրեն ևս մեկ հրաշք է պարգևել․ «Ծնվեց իմ աղջիկը՝ Սառան, այդ պատճառով 2022-ն ինձ համար մեծ ձեռքբերումի տարի էր։ 2019 թվականին էլ եմ շնորհակալ մեծ աղջկաս՝ Միլայի ծնունդի համար (- հեղ. ժպտում է)»։

Երգչուհու ամանորյա մաղթանքը մեր երկրի համար խաղաղությունն է, ինչպես նաև այն, որ յուրաքանչյուր ընտանիքում լսվի մանկան անուշ ծիծաղ։

Ծնողների հետ՝ ընտանեկան մթնոլորտում, Ամանորը դիմավորելու է նաև երգիչ Արսեն Գրիգորյանը։ Վերջինս 2022-ը ճանապարհում է 2023-ի մեծ սպասումով․ «Գալիք տարվա հանդեպ շատ լավ եմ տրամադրված։ Այդ պատճառով հունվարի հենց առաջին շաբաթվանից սկսելու ենք նոր տեսահոլովակի նկարահանման աշխատանքները։ 2022-ը նույնպես շատ լավ տարի էր թե՛ իմ, թե՛ իմ երաժշտական ստուդիայի սաների հաջողությունների համար»։

Արսենն իր ամանորյա մաղթանքում նույնպես խաղաղություն է ցանկանում․ «Թող բոլորը խաղաղ լինեն, մեր մանուկները միայն ուրախության ձայն լսեն»։

2023 թվականը խաղաղության հույսով պատրաստվում է դիմավորել նաև երգչուհի Ջուսը, մեզ հետ զրույցում նա խոստանում է գալիք տարում հանդես գալ նոր ստեղծագործական մտքերով։

Ջուսն Ամանորը դիմավորելու է մայրիկի հետ, որից հետո տոնը շարունակելու է հանդիսատեսի հետ։

Իսկ երգչուհի Հասմիկ Կարապետյանը ամանորյա տրամադրություն չունի: Մեզ հետ զրույցում Հասմիկը վերհիշում է՝ 2022 թվականը խլեց շոու բիզնեսի վառ և կյանքով լի անձանց։ Պայմանավորված նաև վերջին երկու տարիներին երկրում տիրող սահմանային լարվածություններով՝ նա փորձում է միայն իր երեխաների համար ապահովել գալիք տարվա տոնական հրաշքը։

«Երեխաների համար փորձում եմ ուրախ լինել, բայց սպասում չկա ամանորյա հեքիաթի։ Միևնույն ժամանակ, երեխաների համար է, որ պետք է շարունակել ապրել։ Իմ տանը որևէ պատրաստվածություն չեմ տեսնում, ընտանիքիս հետ Նոր տարին դիմավորելու ենք Երևանի սրտում՝ որևէ ժամանցային վայրում, որտեղ կլինի ամանորյա երեկույթ»,- նշում է նա։

2022-ին թեև եղան շատ կորուստներ՝ թե՛ երաժշտական աշխարհի, թե՛ երկրի համար, բայց, երգչուհու խոսքով, եղել են նաև լավ պահեր․ նոր երգեր, ծանոթություններ և այլն:

«Իմ անկյունում այս տարին միշտ դրական կլինի, բայց երկրիս համար տխուր տարի էր։ Հիմա մեծ սրտով պատրաստվում եմ 2023-ին, որը հայ ժողովրդին խաղաղություն և բարություն կբերի»,- ասում է նա։

Ամանորյա տոնական տրամադրությունը բացակայում է նաև դերասանուհի Անահիտ Կիրակոսյանի մոտ։ Չնայած Նոր տարվա գիշերը նրա համար նույնպես աշխատանքային է լինելու, բայց ժամանակ է հատկացնելու նաև ընտանիքի համար։

«Ամանորին տոնական տրամադրությունը միայն երեխաների համար է և նրանց երազանքները չկոտրելու։ Ես միայն մաղթում եմ մեր երկրին խաղաղություն և մեր հայրենակիցներին՝ ապաշրջափակում»,- նշում է նա։

Դերասանուհի Հերմինե Ստեփանյանի ամանորյա մաղթանքը նույնպես խաղաղությունն է և Արցախի մեր հայրենակիցների կյանքի ճանապարհի բացումը։ Նա տոները միշտ անցկացնում է ընտանիքի հետ, այս տարին ևս բացառություն չի լինի:

«2022 թվականը, ճիշտ է, այդքան էլ գունավոր չէր, բայց 2023-ին սպասում եմ հույսով։ Տարվա մեջ բոլոր օրերին էլ իմ տանը ընտանեկան ջերմ տրամադրություն է, սիրուն և համով է։ Ճոխ սեղան չի լինում, ես շեշտը դնում եմ ոչ թե ուտելիքի շատ լինելու, այլ՝ սիրուն մատուցման»,- շեշտում է նա: