Արցախում պարենային ապրանքները և հագուստը թանկացել են, բենզինը՝ էժանացել. ինչպիսին է պատկերը ընդհանուր առմամբ. տվյալներ

Արցախի Հանրապետության սպառողական շուկայում 12-ամսյա գնաճը (2022թ. դեկտեմբերը 2021թ. դեկտեմբերի նկատմամբ) կազմել է 7.5%, իսկ նախորդ ամսվա նկատմամբ՝ 0.8%: 

Այս մասին «Հայկական ժամանակ»-ը տեղեկացավ Արցախի Հանրապետության ազգային վիճակագրական ծառայությունից, որն ամփոփել է սպառողական գների փոփոխությունները 2022թ. հունվար-դեկտեմբերին։ 

Արցախի Հանրապետության դիտարկվող բոլոր քաղաքներում 2022թ. դեկտեմբերին  նախորդ ամսվա համեմատ սպառողական գներն աճել են 0.8-1.1%-ով, մայրաքաղաք Ստեփանակերտում՝ 0.8%-ով։

Ըստ ԱՀ ԱՎԾ-ի՝ 2022թ. դեկտեմբերին 2021թ. դեկտեմբերի համեմատ հանրապետությունում արձանագրվել է սննդամթերքի եւ ոչ ալկոհոլային խմիչքի 9.7% գնաճ, իսկ 2022թ. նոյեմբերի համեմատ՝ 2.0%: Հանրապետության դիտարկվող բոլոր քաղաքներում 2022թ. դեկտեմբերին նոյեմբերի համեմատ սննդամթերքի եւ ոչ ալկոհոլային խմիչքի գներն աճել են 1.9-2.4%, մայրաքաղաքում՝ 1.9%-ով։

Մասնավորապես՝ հացաբուլկեղենի ու ձավարեղենի գները նախորդ տարվա դեկտեմբեր համեմատ աճել են 15.2%, միսը՝ 10,6, կաթնամթերքը, պանիրն ու ձուն՝ 15.3, յուղերն ու ճարպերը՝ 6.8, միրգը՝ 7.7։

Մասնավորապես՝ բրնձի, մակարոնեղենի, ալյուրի եւ հաճարի գները 2022թ. դեկտեմբերին 2021թ. դեկտեմբերի համեմատ աճել են համապատասխանաբար 11.6%, 23.9%, 10.6% եւ 11.0%-ով: 2022թ. դեկտեմբերին 2022թ. նոյեմբերի համեմատ բրնձի, ալյուրի եւ հաճարի գներն աճել են համապատասխանաբար 2.1%, 0.2% եւ 0.1%-ով, իսկ մակարոնեղենի գները՝ նվազել 0.2%-ով:

Դրան զուգընթաց 2022թ. դեկտեմբերին 2021թ. դեկտեմբերի համեմատ հանրապետությունում գրանցվել է ձավարեղենի՝ 6.2%, ոսպի՝ 8.5%, հնդկացորենի՝ 4.9% գնաճ, իսկ նոյեմբերի համեմատ՝ համապատասխանաբար 1.8%, 3.5% եւ 2.2% գնանկում: Կաթնամթերք, պանիր եւ ձու ապրանքախմբի գները 2022թ. դեկտեմբերին 2021թ. դեկտեմբերի համեմատ աճել են 15.3%-ով, իսկ 2022թ. նոյեմբերի համեմատ՝ 2.1%-ով: 2022թ. դեկտեմբերին 2021թ. դեկտեմբերի համեմատ հանրապետությունում արձանագրվել է թարմ կաթի 18.3%, մածնի՝ 43.5%, պանրի 20.9%, իսկ նոյեմբերի համեմատ՝ համապատասխանաբար 2.2%, 5.3% եւ 1.7% գնաճ:

Ձվի գինը 2022թ. դեկտեմբերին 2021թ. դեկտեմբերի համեմատ նվազել է 13.8%, իսկ 2022թ. նոյեմբերի համեմատ՝ աճել 1.7%-ով: 

Արեւածաղկի բուսական յուղի գինը 2022թ. դեկտեմբերին 2021թ. դեկտեմբերի համեմատ նվազել է 0.1%-ով, իսկ 2022թ. նոյեմբերի համեմատ՝ 0.7%-ով: Կարագի եւ հրուշակեղենի գները 2022թ. դեկտեմբերին 2021թ. դեկտեմբերի համեմատ աճել են 9.9% եւ 12.7%-ով, իսկ 2022թ. նոյեմբերի համեմատ՝ նվազել համապատասխանաբար՝ 0.5% եւ 0.1%-ով: Շաքարավազի գինը 2022թ. դեկտեմբերին 2021թ. դեկտեմբերի համեմատ աճել է 0.9%-ով, իսկ 2022թ. նոյեմբերի համեմատ՝ 0.1%: 2022թ. դեկտեմբերին 2021թ. դեկտեմբերի համեմատ միրգ ապրանքախմբում գրանցվել է 7.7% գնաճ, իսկ 2022թ. նոյեմբերի համեմատ՝ 2.8%:

Իսկ ահա բանջարեղեն ապրանքախմբում 2022թ. դեկտեմբերին 2021թ. դեկտեմբերի համեմատ արձանագրվել է 1.5% գնանկում, 2022թ. նոյեմբերի համեմատ՝ 13.1% գնաճ: 2022թ. դեկտեմբերին նոյեմբերի համեմատ մրգի եւ բանջարեղենի ապրանքախմբերի միջին կշռված գնաճը կազմել է 8.87%: 

Վերը նշված ապրանքախմբերը, սպառողական զամբյուղում ունենալով 8.9% տեսակարար կշիռ, նշված ժամանակահատվածում նպաստել են սպառողական գների ընդհանուր մակարդակի աճին 0.78 տոկոսային կետով: 

ԱՎԾ-ի տվյալները վկայում են, որ գնաճ է արձանագրվել ոչ միայն սննդամթերքի, այլ նաեւ ոչ պարենային ապրանքների գծով: 

2022թ. դեկտեմբերին 2021թ. դեկտեմբերի համեմատ ոչ պարենային ապրանքների շուկայում գրանցվել է 6.4% գնաճ, իսկ 2022թ. նոյեմբերի համեմատ՝ 0.1 տոկոս:

Մասնավորապես՝ հագուստը նախորդ տարվա դեկտեմբերի համեմատ թանկացել է 5,8%-ով, կոշիկը՝ 6,8, կահույքը՝ 4,4։

Դիզվառելիքի շուկայում էլ պատկերը հետեւյալն է՝ հանրապետությունում 2022թ. դեկտեմբերին նոյեմբերի համեմատ գրանցվել է բենզինի եւ դիզելային վառելիքի՝ համապատասխանաբար 7.8% եւ 6.0% գնանկում: 2022թ. դեկտեմբերին 2021թ. դեկտեմբերի համեմատ գրանցվել է բենզինի 12.9% գնանկում եւ դիզելային վառելիքի 13.0% գնաճ: 

2022թ. հունվար-դեկտեմբերին 2021թ. հունվար-դեկտեմբերի համեմատ բենզինի եւ դիզելային վառելիքի գներն աճել են համապատասխանաբար 9.7% եւ 35.5%-ով։

ԱՎԾ-ն ամփոփել է նաեւ հաշվետու ժամանակաշրջանում ծառայությունների ոլորտի սակագները։ Ըստ այդմ՝ բնակչությանը մատուցված ծառայությունների ոլորտում 2022թ. դեկտեմբերին 2021թ. դեկտեմբերի համեմատ գրանցվել է 5.5% գնաճ, իսկ 2022թ. նոյեմբերի համեմատ գների մակարդակը մնացել է անփոփոխ: Մասնավորապես վարսավիրանոցների եւ անձնական սպասարկման սրահների ծառայությունների գները 2022 թ․ դեկտեմբերին նախորդ տարվա դեկտեմբերի համեմատ աճել են  2.9%-ով, հյուրանոցային ծառայությունների գները՝ 1,7, բնակարանի նորոգման եւ սպասարկման ծառայությունները՝ 7,5%-ով։

Հեղինե Մանուկյան