H1N1-ի դեմ առաջարկում են «Արմենիկում» հաբը, որի խտանյութը ժամանակին կիրառել են ՁԻԱՀ-ի բուժման համար. ինչ է ասում բժիշկը

Վերջին ամիսներին Հայաստանում գրիպով վարակվածության դեպքերը մեծ տարածվածություն ունեն։ Ըստ առողջապահության նախարարության՝ մեզ մոտ հիմնականում շրջանառվում է H1N1 տեսակը։

Վիրուսի հետևանքով ՀՀ-ում պաշտոնապես հայտարարվել է մահվան 2 դեպքի մասին: Մահացած պացիենտները 35 տարեկան էին:

Վարակների տարածման շրջանում կարևորվում է ճիշտ բուժումն ու դրանց դեմ կիրառվող համապատասխան դեղամիջոցները։ Երևանի Թիվ 8 պոլիկլինիկայի թերապիայի բաժնի վարիչ Աննա Մովսիսյանը «Հայկական ժամանակ»-ի հետ զրույցում նշում է՝ գրիպով վարակվածության դեպքում հակավիրուսային դեղորայքների շարքը մեծ է։ Հիվանդությունն ընթանում է տարբեր գանգատներով, և դեղորայքային բուժումը նշանակվում է՝ կախված ախտանշաններից։

«Գանգատներից ամենաշատը գլխացավերն են, ջերմության բարձրացումը, որը շարունակվում է մի քանի օր, կարող է տևել մինչև 5-6 օր։ Կոկորդի ցավերից, մկանացավերից են գանգատվում, ընդհանուր թուլությունից։ Այս տարի դիմելիությունը շատ-շատ է։ Հունվարի 3-ից աշխատանքային է, և գրեթե բոլոր թերապևտները ծանր գրաֆիկով են աշխատում։ Հիվանդները նշում են, որ հիմնականում վարակվել են ընտանիքի բոլոր անդամներով»,- մանրամասնում է Մովսիսյանը։

Եթե հիվանդությունը որևէ վնաս հասցրած չի լինում թոքերին, նշանակվում է սիպտոմատիկ բուժում, շատ հեղուկների կիրառում, թոքերը ախտահարվելու դեպքում համապատասխան հետազոտություններից հետո՝ հակաբիոտիկային բուժում, ասում է Մովսիսյանը։ Ըստ նրա՝ հակաբիոտիկներ նշանակվում են այն դեպքում, երբ որ վիրուսին միանում է այլ բակտերիա․ «Կախված հազի բնույթից նաև, եթե այն առկա է, նշանակվում են այլ դեղամիջոցներ։ Եթե հազը խորխով է լինում, ապա խորխաբերներ են նշանակվում։ Ցանկալի է, որ միշտ վիտամիններ խմեն, որպեսզի իմունային համակարգը կայուն լինի»:

Նրա խոսքով՝ լինում են նաև ինքնաբուժության դեպքեր, երբ մարդիկ այլ անձանց խորհրդով կամ իրենց ցանկությամբ ընդունում են դեղամիջոցներ, որոնք կա՛մ որևէ դրական ազդեցություն չեն թողնում, կա՛մ ավելի են բարդացնում իրավիճակը։ Թերապևտն ասում է՝ ինքնաբուժությունն անընդունելի է, հատկապես հակաբիոտիկների, որոնց առանց անհրաժեշտության ընդունումը կարող է հանգեցնել հակաբիոտիկների դեմ վիրուսի կայունությանը և հետագայում անհրաժեշտության պարագայում դրական ազդեցություն չթողնելուն։

Դիտարկմանը՝ վարակի տարածմանը զուգահեռ «Ֆեյսբուք» սոցիալական ցանցում սկսվել է շրջանառվել «Արմենուկում» դեղամիջոցը, որը ներկայացվում է որպես H1N1 վիրուսի դեմ պայքարելու և դրա կանխարգելման համար իդեալական տարբերակ, 8-րդ պոլիկլինիկայի թերապիայի բաժնի վարիչ Աննա Մովսիսյանն ասում է՝ իրենց հաստատության թերապևտները հիվանդներին այս դեղամիջոցը չեն նշանակում, սակայն կարծում են, որ այն իմունային համակարգը բարձրացնող միջոց է, հակավիրուսային դեղամիջոց։

Նկատենք՝ «Արմենիկում» դեղամիջոցի վերաբերյալ տարիներ առաջ մամուլում բազմաթիվ հրապարակումներ են եղել: Ըստ այդ հրապարակումների՝ դեռևս 1998 թվականին ներքին գործերի և ազգային անվտանգության նախարարի պաշտոնը զբաղեցնող Սերժ Սարգսյանը հայտարարել էր, որ Հայաստանում հայտնաբերվել է «Արմենիկում» անունը կրող դեղամիջոց, որը լիովին բուժում է դարի չարիքը հանդիսացող ՁԻԱՀ հիվանդությունը: Մամուլի հրապարակումների համաձայն՝ նրա այս հայտարարությունից հետո հսկայական միջոցներ էին ներդրվել, համանուն կլինիկա էր բացվել, սակայն ԶԻԱՀ-ով որևէ հիվանդ այդպես էլ չէր բուժվել։

Առողջապահության նախկին նախարար Արարատ Մկրտչյանն էլ, ըստ մամուլում եղած հրապարակումների, այս դեղամիջոցն անվանել էր հեքիաթ, որը փուչիկ էր և պայթեց։

Դեղամիջոցի վերաբերյալ մեկնաբանություն ստանալու համար կապ հաստատեցինք «Արմենիկում» կլինիկա։ Այստեղից մեզ փոխանցեցին, որ ժամանակին դեղանյութը արտադրվել է որպես խտանյութ և օգտագործվել ՁԻԱՀ հիվանդության դեմ։ Հետագայում խտանյութի լեցնզիան դադարեցրել են և սկսել արտադրել դեղահաբերի տեսքով, որոնք կիրառելի են այդ թվում վիրուսային հիվանդությունների դեմ։ Կլինիկայից մեզ նաև հայտնեցին, որ սա չի նշանակում, թե հաբերը ՁԻԱՀ հիվանդության դեմ այլևս կիրառելի չեն։

Թե ՁԻԱՀ-ի, այսպես ասած, բուժման նպատակով որքա՞ն է կիրառվում այս դեղամիջոցը, վիճակագրություն առկա չէ։

Ներկայումս դեղամիջոցը մայրաքաղաքի դեղատներում վաճառվում է 22 հազար դրամով, տուփի մեջ 40 հատ է։ Դեղահաբի մեկ կոճակը վաճառվում է 500 դրամով։ Պահանջարկը, ըստ դեղատների աշխատակիցների, քիչ է: