Պատրիարքարանի վրա հարձակման հետևում այլ ուժերի և քաղաքական ենթատեքստ պետք չէ փնտրել, դրանք կարող են կրկնվել. Վարդանյան

Իրանագետ Արմեն Վարդանյանի խոսքով՝ Հայոց պատրիարքարանի և հայ երիտասարդների վրա հարձակման հետևում այլ ուժերի և քաղաքական ենթատեքստ պետք չէ փնտրել, քանի որ հրեա կրոնական ծայրահեղականները միշտ անհարգալից և ոչ հանդուրժողական վերաբերմունք են ցուցաբերել այլ կրոնների ներկայացուցիչների նկատմամբ:

«Նրանք միշտ հարձակվում են հայկական, հունական և այլ ազգի կրոնավորների վրա: Մի խոսքով, նրանք ծայրահեղ անհանդուրժող վերաբերմունք ուեն այլ կրոնական ներկայացուցիչների նկատմամբ, և նմանատիպ բախումներ մշտապես լինում են: Ես գիտեմ, որ նույնիսկ հրեա ծայրահեղ հոգևորականների մի դաս կա, որ անընդհատ հարձակվում է, անգամ թքում հայերի, հույների վրա»,- «Հայկական ժամանակ»-ի հետ զրույցում ասում է Վարդանյանը:

Իրանագետի կարծիքով՝ նմանատիպ հարձակումների առաջիկայում ևս պետք է սպասել:

«Ինչպես արդեն նշեցի, սա առաջին դեպքը չէ: Ցավոք, Իսրայելում եկել է մի իշխանություն, որը ծայրահեղ աջ ազգայնական ուղղվածություն ունի, և նման տարրերի, այդ թվում՝ հրեա ծայրահեղականների նկատմամբ շատ հանդուրժող են: Պատահական չէ, որ այս օրերին Իսրայելում բավականին մեծ բողոքի ցույցեր են ընթանում: Ժողովրդի մի մասը կարծում է, որ Իսրայելում ժողովրդավարությունը վտանգի տակ է: Իմիջիայլոց, նաև նման մտահոգություն ունի Իսրայելի մերձավոր դաշնակից ԱՄՆ-ն, քանի որ վերոնշյալ ծայրահեղ ազգայնական ուժը Ամերիկայի սև ցուցակում է գտնվում իր ծայրահեղ ազգայնական աջ պահվածքի համար»,- նկատում է նա:

Վերջինս ուղղակիորեն կապ չի տեսնում այս միջադեպերի և Իսրայելի ներքաղաքական իրավիճակի հետ, սակայն անպատժելիության և նման իրավիճակներին որոշակի «մատների արանքով» նայելու միտում է նկատում:

«Ոստիկանությունը, ուժային կառույցներն այդքան էլ արմատական չեն, խիստ չեն այսպիսի հարձակումներ գործող մարդկանց նկատմամբ: Շատ դեպքերում, օրինակ՝ այս վերջի միջադեպի հետ կապված, ավելի շատ հայերի են ձերբակալել, քան հարձակում գործողներին»,- նշում է զրուցակիցը:

Հարցին՝ կա՞ արդյոք վտանգ, որ այսպիսի քայլերը հետագայում կարող են վերածվել միջկրոնական պայքարի, նա պատասխանում է. «Այդ վտանգը դարերով և հազարամյակներով կա: Իսրայելը բազմաէթնիկ երկիր է, որտեղ շատ փոքր տարածքի վրա իրար անմիջական հարևանությամբ բազմաթիվ ազգերի ներկայացուցիչներ են ապրում, այդ թվում՝ ծայրահեղականներ: Օրինակ՝ Երուսաղեմում կան հայկական, արաբական և հրեական թաղամասեր, հունական եկեղեցին իր կալվածքներն ունի, և այդպիսի բախումներ անընդհատ լինում են: Պետությունը պետք է փորձի կանխել դրանք կամ վերահսկել, ինչը գործող կառավարությունն այդքան էլ չի անում»:

Իրավագետի խոսքով՝ սա նաև բացարձակ ոչ մի կապ չունի վերջին օրերին Իրանի հարձակման հետ, ինչպես նաև տեղին չէ համարել սադրանք կամ հակահայ քաղաքականություն:

«Միգուցե նաև կանխամտածված է եղել, չեմ կարող ասել, բայց չեմ կարծում, որ իշխանությունն է հրահրել: Ինչպես նշեցի, հրեա ազգայնականներն անընդհատ խնդիրներ են ստեղծում այլ ազգերի ներկայացուցիչների հետ՝ հայերի, հույների, արաբների: Նույնիսկ հենց այդ ռադիկալ արմատական մասսան շատ դեպքերում չի ընդունում որոշ հրեաների, որոնք մուգ մաշկ ունեն, Մարրոկոյից են եկել կամ աֆրիկյան այլ երկրներից: Այսինքն՝ այս վատ ավանդույթը դրսևորվում է անգամ սեփական ազգի նկատմամբ»,- նկատում է իրանագետ Արմեն Վարդանյանը:

Նա կրկնում է, որ հարցը իշխանության մակարդակով պետք է լուծվի. «Իսրայելի քաղաքացիական հասարակությունն ու իշխանությունը, իրավապաշտպան կառույցները, մարդու իրավունքների պաշտպանության հետ կապված հասարակական կազմակերպությունները պետք է փորձեն հակազդել, և, կարծում եմ, որոշ չափով հակազդում են»:

Հունվարի 28-ի ուշ երեկոյան երկու հրեա ծայրահեղականներ Հայոց Վանքի դիմաց նախ փորձել էին խոչընդոտել երթևեկությունը, ապա հարվածել աշխատանքից տուն վերադարձող հայ երիտասարդների ավտոմեքենային: Ծայրահեղականներից մեկն արցունքաբեր գազ էր փչել հայ երիտասարդի աչքերին, և երկուսով փախուստի էին դիմել: Հայ երիտասարդը տեղափոխվել էր հիվանդանոց: Հրեա ծայրահեղականների մի ուրիշ խումբ էլ փորձել էր մագլցելով բարձրանալ Հայոց պատրիարքարանի տանիք և հանել պատրիարքարանի խաչակիր և Հայաստանի Հանրապետության դրոշները: Նրանց սադրիչ գործողությունների արդյունքում ոստիկանները, զենքերը պահելով հայերի վրա, ծեծի էին ենթարկել մի քանիսին, հայերից մեկին ձերբակալել և տարել էին ոստիկանություն, հետո՝ ենթարկել տնային կալանքի:

 Հերմինե Կարապետյան