ՀՀ-ում տղամարդկանց շրջանում անպտղության ցուցանիշը մտահոգիչ է, հիմնական պատճառներից մեկը ծխախոտի օգտագործումն է․ մասնագետ

Թեպետ վերջին 10 տարվա կտրվածքով մեր երկրում անպտղության ցուցանիշը համեմատաբար ցածր տոկոս է կազմում, սակայն այն Հայաստանում շարունակում է մնալ մտահոգիչ. նախկինում հասնում էր 20, 28, 19 տոկոսի, այժմ 14․6 է, գրեթե մոտ սահմանված 15% ճգնաժամային մակարդակին։

Ի դեպ, խնդիրն առկա է ոչ միայն կանանց, այլ նաև տղամարդկանց շրջանում։ ՀՀ առողջապահության նախարարության սեքսոպաթոլոգիայի գծով գլխավոր խորհրդատու, Հայ-ամերիկյան կենտրոնի բժիշկ-սեքսոպաթոլոգ, դոցենտ Սևադա Հակոբյանի խոսքով՝ անպտղության մակարդակը կանանց շրջանում 15 տոկոս է, շուրջ 50 տոկոս դեպքերն էլ բաժին են ընկնում տղամարդկանց։ Ըստ նրա՝ նման խնդիր ունեցող տղամարդիկ անցնում են հատուկ հետազոտություններ։ 

Հակոբյանն ասում է, որ անպտղության ցուցանիշների պատկերը հասկանալու համար հետազոտությունները տեղի են ունենում 5-7 տարվա ընթացքում, վերջինը մեր երկրում եղել է 2 տարի առաջ, որն էլ ցույց է տվել մտահոգիչ ցուցանիշներ՝ կապված երկրորդային անպտղության և տղամարդկանց շրջանում անպտղության վերաբերյալ։ Մասնագետի նկատառմամբ՝ դրանց առաջացման պատճառները տարբեր կարող են լինել, սակայն տղամարդկանց դեպքում նպաստում է նաև ծխախոտը։ 

«Առաջին կարևոր հետազոտությունը սերմնահեղուկի հետազոտությունն է։ Դա մեծ պատկերացում է տալիս սերմնանյութերի ձևի, քանակի, հղիության ունակությունների և այլնի վերաբերյալ։ Տղամարդու անպտղության ժամանակ նաև սերմնահեղուկում լեյկոցիտների բարձրացում է նկատվում՝ լեյկոցիտոսպերմիան, որն էլ կարող է պայմանավորված լինել ծխելով»,- «Հայկական ժամանակ»-ի հետ զրույցում մանրամասնում է Հակոբյանը։ 

ԱՆ մասնագետի խոսքով՝ ծխախոտը բացասական է ազդում մարդու օրգանիզմի վրա, անմիջական ազդեցություն ունի տղամարդկանց վերարտադրողական ֆունկցիայի նկատմամբ, քանի որ պարունակում է 200-ից ավելի տոքսիկ նյութեր, որոնք ակտիվ ազդեցություն են ունենում զարգացող բջիջների վրա․ «Բժիշկները, շատ հաճախ չիմանալով այդ մասին, անզիջում նշանակում են անտիբիոտիկոթերապիա։ Սակայն լինում են դեպքեր, երբ անտիբիոտիկների նշանակումը որևէ օգուտ չի տալիս, այդ դեպքում ախտորոշվում է որպես իդեոպաթիկ պիոսպերմիա: Մասնագետը ոչ թե պետք է փորձի վերացնել լեյկոցիտների բարձր քանակը տղամարդու օրգանիզմից, այլ դարձնել նորմայի սահմաններում։ Դա էլ կլինի այն դեպքում, երբ տղամարդը դադարի ծխել»։

Եթե տղամարդը դադարի ծխել, բժշկի դինամիկ հսկողության տակ լինի 3 ամիս, հնարավոր կլինի հասկանալ՝ ինչպես են բարելավվում նրա մոտ առկա խնդրի տվյալները, դրանով նաև կարելի է հասկանալ՝ ի՞նչ ազդեցություն ուներ ծխախոտը, ի՞նչ չափով էր վնասել սերմնահեղուկը, նշում է Հակոբյանը։ 

Առողջապահության նախարարության սեքսոպաթոլոգիայի գծով գլխավոր խորհրդատուն նաև ընդգծում է՝ ծխախոտի օգտագործումը հատկապես վտանգավոր է 14 տարեկանից մինչև 25 տարեկան տղաների համար, քանի որ այդ շրջանում տղամարդու մոտ սկսվում է սերմատոգենի, սերմնաառաջացման պրոցեսը, և նրանք այդ ժամանակ ծխախոտի բացասական ազդեցության համար ավելի թիրախային ու խոցելի են:

Ըստ զրուցակցի՝ արական սեռի ներկայացուցիչների դեպքում անպտղության հաղթահարումը հնարավոր է դեղամիջոցների, պրոցեդուրաների և այլ տարբերակներով. «Առաջին իսկ օրվանից տղամարդը պետք է դադարեցնի նաև վնասակար սովորությունները։ Եթե շարունակի դրանց օգտագործումը, ապա բուժումը գուցե ոչ մի օգուտ չտա։ Տղամարդիկ մեծ մասամբ գիտակցում են խնդիրը, երբ բժիշկը հիմնավորում, բացատրում է՝ ինչ վնասներ է հասցնում ծխախոտը»:

Հակոբյանը նշում է, որ վաղուց վերացել է հասարակության մեջ արմատացած այն կարծրատիպը, թե անպտղությունը կարող է լինել միայն կանանց դեպքում։ Նրա խոսքով՝ զույգերը հավասարապես գիտակցում են, որ անպտղության պատճառն ու հետևանքները կարող են հասկանալ միայն երկուստեք հետազոտվելու դեպքում։ Նա համոզմունք է հայտնում, որ այս առումով գիտակցական մակարդակը շատ բարձր է մեր երկրում։