Թուրքական իշխանությունները դիտմամբ անուշադրության են մատնել քուրդ ժողովրդին. Կնյազ Հասանով

Հայաստանում քրդական համայնքի ներկայացուցիչները բողոքի ակցիա են իրականացրել ՄԱԿ-ի հայաստանյան գրասենյակի դիմաց՝ միջազգային հանրությունից պահանջելով ճնշում գործադրել Թուրքիայի վրա, որպեսզի թուրքական իշխանությունները օգնություն ցուցաբերեն ավերիչ երկրաշարժից տուժած քրդերին։ Նրանք ՄԱԿ-ի հայաստանյան գրասենյակին փոխանցել են նամակ, որում ներկայացված են եղել իրենց պահանջները միջազգային հանրությունից:

«Քաղաքացիական պայմանագիր» խմբակցության քուրդ պատգամավոր Կնյազ Հասանովի խոսքով՝ Թուրքիայի և Սիրիայի քրդաբնակ գրեթե բոլոր բնակավայրերը տուժել են ավերիչ երկրաշարժից, տասնյակ հազարավոր մարդիկ են զոհվել, վիրավորվել, մնացել անօթևան։

«Երկրաշարժի հետևանքով զոհերի և վիրավորների շուրջ 90 տոկոսը քրդեր են։ Եկել ենք զորակցություն հայտնելու երկրաշարժից տուժած քուրդ ժողովրդին և հարգելու զոհերի հիշատակը ու ասել, որ թուրքական իշխանությունները դիտմամբ անուշադրության են մատնել քուրդ ժողովրդին, չեն շտապում օգնել և դուրս բերել մարդկանց փլատակներից և չեն վերացնում երկրաշարժի հետևանքները։ Մենք դատապարտում ենք թուրքական իշխանությունների անգործությունը։ Այս ֆոնին նաև խնդրում ենք միջազգային հանրությունից, որ օգտագործեն իրենց հնարավորությունները և ազատեն մեր առաջնորդ Աբդուլլահ Օջալանին»,- ասել է Հասանովը։

Այնուհետև լրագրողների հետ զրույցում նա նկատել է, որ միշտ դիմում է միջազգային կառույցներին, որ բռնեն թուրքական ցեղասպան, մարդասպան ձեռքը, որովհետեւ ամեն օր քրդերից տասնյակ և հարյուրավոր մարդիկ են մահանում, նրանք արդեն ամեն ինչ անում են և հարձակվում եզդիների, քրդերի վրա:

«Միջազգային հանրությունից ես այսօր իմ հավատը կորցրել եմ, որովհետև ինչքան դիմում ենք, տեսնում ենք, որ այդ դիմումները, առաջարկներն այնքան են ընդունվում, ինչքանով որ դա հարիր է եւ օգուտ է իրենց շահերի համար: Ես 44-օրյա պատերազմի ժամանակ տեսնում էի, որ մեր հայ ժողովուրդը դիմում էր տարբեր միջազգային կառույցների, դիմում էր նույնիսկ ՀԱՊԿ-ին, հազար ձևի ՄԱԿ-ի գրասենյակին ու բոլոր միջազգային կազմակերպություններին, որ բռնեն Թուրքիայի ու Ադրբեջանի ձեռքը: Բայց մենք տեսնում էինք, որ ոչ մեկը գործնական որևէ քայլ չէր կատարում, ու մենք կորցրինք մեծ քանակությամբ մեր երեխաներին»,- ասել է նա:

Վերջինս իր խոսքում կոչ է արել միջազգային հանրությանը թողնել իրենց «նավթային շահերը» ու փոքր ժողովուրդների ցեղասպանվելու դեմն առնել: Ըստ նրա՝ Հայաստանում բոլոր պայմանները ստեղծված են ազգային փոքրամասնությունների համար ու «բարբարոս Թուրքիայի» հետ անհամեմատելի է:

Անդրադառնալով հայ-թուրքական հարաբերությունների կարգավորմանը և սահմանների բացմանը՝ Հասանովը նշել է. «Թուրքական պետությունը մեր ազգի համար, ձեր ազգի համար մինչեւ հիմա էլ համարվում է որպես թշնամական պետություն, բայց դու քո հարեւանին չես կարող փոխել: Մենք չենք կարող թուրքերին վերցնենք, տանենք ուրիշ տեղ, հարեւանություն անենք ուրիշ ազգի հետ: Մեր ժողովրդին այսօր պետք է խաղաղություն, պետք է սահմանները բացվեն, առևտուր արվի, դա հնարավոր է, որ և՛ ՀՀ իշխանությունները, և՛ թուրքական իշխանությունները գնան առանց նախապայմանների հարաբերությունները լավացնելու, խաղաղություն բերելու, ես դրա կողմնակից եմ: Բայց այս բոլորը չի կատարվի մի օրվա մեջ, տարիների ընթացքում պետք է կատարվի, ժողովուրդները իրար բարեկամանան: Այսօր ժողովուրդները թշնամացել են, որովհետեւ երկու կողմերից մարդիկ են զոհվել մեծ քանակությամբ: Դրա համար բարեկամությունը պետք է առաջ գա»:

Հասանովի խոսքով՝ նորմալ է Թուրքիային ցավակցություն հայտնելը, թեկուզ փրկարար ուղարկելը, բայց չպետք է մոռանալ, որ 2020թ. և 2022թ.-ին Հայաստանի դեմ պատերազմում էր Թուրքիան:

«Թուրքիայի ժողովրդի մեջ էլ կան մարդիկ, որոնք չեն ուզում հայերի հետ կամ քրդերի հետ բարեկամություն անել, բայց մինչեւ ե՞րբ, այդպես չի լինի: Թշնամությունը բերում է զոհեր, լավ բանի չի բերում, դրա համար պետք է կամաց-կամաց ստեղծել պայմաններ, սահմանները բացել, գնալ-գալ լինի, ժողովուրդները բարեկամանան: Մի 30 տարի առաջ ես տեսնում էի, որ այստեղ 160 հազար ադրբեջանցի էր ապրում, Ադրբեջանում՝ 400-500 հազար հայ, այդ բարեկամությունը այն ժամանակ կար՝ գնալ-գալ, իրար հետ ապրել, հարևանություն անել»,- նկատեց նա: