Արմավիրի համար 4 դպրոցի անձնակազմն ահազանգում է՝ հաստատությունը փակում են. ԿԳՄՍՆ-ն հիմնավորում է որոշման կարևորությունը

Արմավիրի մարզի համար 4 ավագ դպրոցի անձնակազմն արդեն մի քանի օր է՝ ահազանգում է հաստատության փակման մասին։ Ըստ նրանց՝ ՀՀ ԿԳՄՍ նախարարությունը մտադիր է դպրոցը վերամիավորել Արմավիրի Ռ. Եղոյանի անվան թիվ 1 ավագ դպրոցին։ Վերամիավորման ծրագրին, սակայն, դպրոցի ներկայացուցիչներն ու աշակերտները դեմ են, նրանց խոսքով՝ ուսուցիչների և տնօրենի ճակատագիրը մնալու է անորոշ:

Դպրոցը վերամիավորելու նախագիծ իսկապես կա․ ՀՀ կառավարության որոշման նախագծով, որը հանրային քննարկման է ներկայացվել Իրավական ակտերի նախագծերի հրապարակման միասնական կայքում, հիմնավորվում է հետևյալ կերպ. «Վերամիավորման որոշումը կայացվել է՝ հաշվի առնելով, որ Արմավիրի թիվ 1 ավագ դպրոցն ունի առավել բարենպաստ շենքային պայմաններ, գտնվում է քաղաքի գրեթե կենտրոնական հատվածում, ունի ցանկապատված ընդարձակ տարածք, կանաչապատ հողատարածք,  բացօթյա մարզահրապարակ, 2 մարզադահլիճ, 2 ապաստարան, և նախագծային հզորությունը (նախատեսված 1000 աշակերտի համար) լիովին կբավարարի 2 ավագ դպրոցների բոլոր աշակերտների ուսումնական գործընթացը բնականոն կերպով կազմակերպելու համար»։

Արմավիրի համար 4 ավագ դպրոցի տնօրեն Անի Քալաշյանը «Հայկական ժամանակ»-ի հետ զրույցում ասում է՝ իրենք նախագծի մասին տեղեկացել են անակնկալ կերպով՝ լրատվամիջոցում տեղադրված նյութից։ Դրանից հետո փորձել են դիմել ԿԳՄՍՆ, սակայն, ըստ նրա, արձագանք չեն ստացել։ Արմավիրի մարզպետարանից էլ տեղեկացրել են, որ անձնակազմի հետ կհանդիպի ԿԳՄՍ կրթության գծով փոխնախարար Արաքսյա Սվաճյանը։

«Սկզբում մտածեցինք, որ բամբասանք է, լուրջ չվերաբերվեցինք, բայց հետո տեսանք նախագիծն ու հասկացանք այս ամենի լրջությունը։ Աղմուկ բարձրացրինք, մեզ հետ հանդիպում ունեցավ փոխնախարարն ու ասաց, որ իրականացնելու են այս վերամիավորման ծրագիրը։ Մեզ ծանուցագրեր են ուղարկելու, ազատելու են աշխատանքից, երեխաներին էլ տեղափոխելու են այլ դպրոց։ Այդ հանդիպմանը նաև աշակերտներն էին ներկա, ասացին՝ դեմ են տեղափոխմանը, բայց փոխնախարարն ասաց՝ դա իրենց որոշումն է։ Ուսուցիչներն ազատման դեպքում օժանդակ աշխատանք չեն ունենալու, փոխարենը նախարարությունը ընտրելու է՝ ում տեղափոխի այդ դպրոցը»,- մանրամասնում է նա։

Ըստ տնօրենի՝ այդ քննարկման արդյունքում չեն եկել համոզման, որ նախագիծը ճիշտ որոշում է, պետք է կայանա։ Արդյունքից դժգոհ երեկ գնացել են նախարարություն, որպեսզի հանդիպեն նախարարի հետ, սակայն ասել են՝ նախարարը տեղում չէ, փոխարենը կրկին հանդիպել են փոխնախարար Սվաճյանի հետ: Դպրոցի անձնակազմի հիմնական պահանջն այն է, որ հաստատությունը չփակվի, նախագիծը հետ կանչվի հանրային քննարկումից։

«Դպրոցը ունի 244 աշակերտ, 44 անձնակազմ, որից 33-ը՝ ուսուցիչ։ Մեր դպրոցն ունի 680 աշակերտի տեղ, իսկ մյուս դպրոցը՝ 1000-հոգանոց աշակերտի համար սահմանված տեղ, բայց ունի 287 աշակերտ։ Այսինքն՝ շատ քիչ է տարբերվում աշակերտների քանակը։ Առաջին դպրոցը, ի տարբերություն մեր դպրոցի, վերանորոգվել է, բարեկարգ է, մեր դպրոցը, ճիշտ է, չի վերանորոգվել, բայց բազում անգամներ դիմել ենք դրա համար, մեզ ասել են՝ ժամանակը չէ։ Մեր դպրոցը մրցունակ է, ունենք մանկավարժական հզոր համակարգ, հմտություններ, լավ ուսուցիչներ։ Աշակերտներն էլ սովոր են իրենց ուսուցիչներին, դրա համար մեզ հետ պայքարելու են, որ չփակվի։ Եթե այն ժամանակ էլ ցանկանային տեղափոխվել, ապա էլ ինչո՞ւ էին ընդունվում մեր դպրոց»,- ընդգծում է տնօրենը։

Արմավիրի 4-րդ ավագ դպրոցը գտնվում է քաղաքի կենտրոնում, թիվ 1 դպրոցից 500 մետր հեռավորություն ունի։ Կրթական հաստատության ղեկավարի խոսքով՝ այդ դեպքում երեխաների ճանապարհը դեպի դպրոց երկարելու է։ Ըստ նրա՝ հարաբերությունները տվյալ դպրոցի հետ շատ լավ են եղել, այժմ, սակայն, այս որոշմամբ պառակտություն է մտել։

Տնօրենն ընդգծում է՝ իրենց դպրոցն ունի շատ հաջողություններ, 12 ուսուցիչ մասնակցել է կամավոր ատեստավորմանը, 7-ը ստանում է հավելավճար։ Տարակարգին մասնակցող ուսուցիչներ նույնպես կան․ «Երբ փոխնախարարին ասում ենք, որ դեմ ենք, ասում է՝ այդպես են ճիշտ գտել, դա շենքերի օպտիմալացում է, պետության շահից բխող գործընթաց։ Մեր դպրոցը հիմնադրվել է 1983 թվականին։ Միայն պատուհաներն են խնդիրը, որ այդ թվականից մնացել են մինչև այսօր։ Մենք պատրաստ ենք մեր դպրոցը վերականգնել ու աշխատել։ Բայց վերանորոգման խնդիրը մեր բացթողումը չէ, մեզ թույլ չեն տվել օգտվել դրանից, միշտ ասել են՝ առաջնային այլ դպրոցներ կան, որոնք ունեն դրա կարիքը»։

Կրթական հաստատության ներկայիս տնօրենը ընտրվել է 2017 թվականին, 2022 թվականի մարտի 31-ին՝ վերընտրվել, պայմանագիրը 5 տարի ժամկետով է։ Եթե նախարարությունը ծրագիրը շարունակի, պատրաստ են պայքարելու․ «Դպրոցը չի փակվելու, դեմ ենք դրան։ Կամ էլ պետք է քննարկեն արդեն մեզ հետ, դպրոցի աշակերտների ու նրանց ծնողների հետ, համայնքի ու մարզպետարանի հետ։ Մեր դպրոցը ունի 6 սան, որոնք պատերազմում զոհվել են, դպրոցում զոհված տղաներից մեկի ծնողները հուշարձան են տեղադրել»։

Այժմ անձնակազմը սպասում է ԿԳՄՍ նախարարի հետ հանդիպման, գերատեսչությունից ասել են՝ գրություն կուղարկեն, թե երբ ու ինչպես կկայանա հանդիպումը։

Հարցի առնչությամբ ՀՀ ԿԳՄՍՆ-ից էլ «Հայկական ժամանակ»-ին տեղեկացրին՝ դպրոցների միավորման գործընթացն իրականացվում է հանրապետության տարբեր մարզերում և Երևանում, որը պայմանավորված է 1400 դպրոցների մեծ մասի թերբեռնված աշխատանքով և ոչ բարենպաստ շենքային պայմաններով: Փոխնախարարը դպրոցի անձնակազմի հետ զրույցում մանրամասնել է.

«Իրականացվում է հանրակրթության նոր չափորոշչի ներդրման գործընթացը, և այժմ բարեփոխումների ակտիվ փուլում ենք, որն ուղղված է կրթության որակի բարձրացմանը, ուսուցիչների կարողությունների և դպրոցների ենթակառուցվածքների զարգացմանը: Եթե ցանկանում ենք ունենալ որակյալ կրթություն, ապա պետք է ունենանք նաև պատշաճ պայմաններ, որպեսզի ուսուցիչը և աշակերտը հնարավորություն ունենան լաբորատոր փորձեր անելու և հագեցած գրադարանից օգտվելու։ Վերամիավորման անհրաժեշտությունը բխում է այն հանգամանքից, որ դպրոցներն ամբողջական ծանրաբեռնվածությամբ չեն աշխատում»:

Ինչ վերաբերում է դպրոցի մանկավարժներին հաստատության փակման դեպքում օժանդակ աշխատանք չտրամադրելուն, ըստ գերատեսչության՝ միավորման արդյունքում կարևորվելու է մասնագիտական ներուժը լավագույնս օգտագործելու խնդիրը՝ հաշվի առնելով նաև այն հանգամանքը, որ հանրապետության բազմաթիվ դպրոցներում մանկավարժների կարիք կա։ Նախարարությունը նաև հաստատում է, որ դպրոցի շենքը օգտագործվելու է նորից կրթական նպատակներով։

Արմավիրի թիվ 4 ավագ դպրոցը Արմավիրի թիվ 1 ավագ դպրոցին վերամիավորելու ծրագիրը e-draft.am կայքում ունի 386 կողմ, 2117 դեմ ձայն։ Այն մինչև կիրակի՝ հունիսի 18-ը, բաց է լինելու հանրային քննարկման համար։