Ի՞նչ է թաքցնում հեռախոսը

Երեկ շարունակվեց կարմիրբերետավոր տուժող Շահեն Հարությունյանի հարցաքննությունը, որը սկսվել էր նախորդ նիստին: Նա դատարանին հայտնել էր, որ օգոստոսի 9-ին իր ծառայակցի հետ ծառայություն էր իրականացնում Կասկադի շրջակայքում, երբ հատուկ կապով իրենց օգնության են կանչել, եւ երբ ինքն ու ծառայակիցը հասել են Խնկո-Ապոր գրադարանի մոտ, քաշքշուկ է տեսել, բարձրացել է մի քարի վրա ու բջջայինով նկարահանել: Հարցին, թե ինչու է ծառայողական պարտականությունները կատարելու փոխարեն նկարահանում արել, կարմիրբերետավորն ասաց` հետաքրքիր էր, ապա հավելեց, որ նկարահանելուց հետո դեպքի վայրում կորցրել է բջջայինը: Գործով ամբաստանյալ, Կոնգրեսի ակտիվիստ Արտակ Կարապետյանը հետաքրքրվեց` հեռախոսի անհետացումից հետո դիմե՞լ է ոստիկանություն: «Ոչ»,- պատասխանեց կարմիրբերետավորը, պատճառաբանելով, թե չի դիմել, քանի որ համոզված է` «հեռախոսը կորել էր, ոչ թե այն տարել էին»: Գործով մեկ այլ ամբաստանյալ, Կոնգրեսի ակտիվիստ Սարգիս Գեւորգյանը կարմիրբերետավորին խնդրեց մեկ բառով նկարագրել, թե հասնելով դեպքի վայր` ի՞նչ իրավիճակի է ականատես եղել: «Խառը»,- ասաց ոստիկանը: «Այդ խառն իրավիճակին միջամտելու փոխարեն սկսել էիք նկարահանե՞լ: Իսկ ինչպե՞ս էիք պատրաստվում օգտագործել այդ տեսագրությունը»,- հարցրեց Գեւորգյանը: Կարմիրբերետավորը կրկնեց, որ նկարահանել է հետաքրքրությունից դրդված: «Հետաքրքրասեր» Հարությունյանին մի քանի հարց էլ ուղղվեց` իր կորցրած հեռախոսի առնչությամբ, ինչից հետո դատարանը իրար ետեւից սկսեց հանել հեռախոսին առնչվող հարցերը: «Հարգելի դատարան, դուք ի՞նչ մտավախություն ունեք: Որ տուժողը չի՞ կարողանա հարցերին պատասխանել: Ամեն անգամ միջամտում եք հարցերը խմբագրելու համար»,- առարկեց փաստաբան Վահե Գրիգորյանը, արձանագրելով, որ անհետացած հեռախոսով արված տեսագրությունը շատ կարեւոր նշանակություն կարող է ունենալ դատավարության ընթացքում, քանի որ տեսագրությունում պետք է որ երեւա, թե ինչ է տեղի ունեցել օգոստոսի 9-ին` իրականում: Հարությունյանին հարցեր ուղղեց նաեւ քաղբանտարկյալ Տիգրան Առաքելյանը, բայց նրա հարցերն էլ հանվեցին: «Եթե ինչ-որ մեկին թվում է, որ մեղադրանքի ծավալն ինձ կաշկանդում է, ու դրա պատճառով չեմ արտահայտելու իմ կարծիքը` չարաչար սխալվում է: Ինձ չի կաշկանդում որեւէ բան: Ես հարցեր եմ տալիս տուժողին... Ինձ չի վախեցնում որեւէ բան, նույնիսկ այն դատավճիռը, որը լինելու է»,- դիմելով դատավորին` ասաց Տիգրան Առաքելյանը:

Պաշտպան Վահե Գրիգորյանը կարմիրբերետավորից հետաքրքրվեց` հեռախոսի անհետացման մասին հայտնե՞լ էր հրամանատարներին, եւ նրանք որեւէ քայլ ձեռնարկե՞լ են հեռախոսը հայտնաբերելու նպատակով: Ըստ կարմիրբերետավորի` հրամանատարներին ասել էր, բայց չէին կարող փնտրել, քանի որ «չկան հեռախոսի փաստաթղթերը»: Ի պատասխան Գրիգորյանի հարցի` կարմիրբերետավորը ասաց, որ ծառայողական պարտականությունները կատարելու փոխարեն հեռախոսով տեսագրություն անելու համար որեւէ պատասխանատվության չի ենթարկվել: Վահե Գրիգորյանը դիմեց Շահեն Հարությունյանին.

- Կնշե՞ք այն հեռախոսահամարը, որը գտնվում էր անհետացած հեռախոսի մեջ:
- ...Բայց այդ հեռախոսահամարը հիմա ինձ մոտ է:

- Նշեք ձեր հեռախոսահամարը:
- 094...

Դատարանի դահլիճում գտնվող մյուս վեց կարմիրբերետավորները Հարությունյանին հուշեցին, որ համարը չասի, ինչից հետո վերջինս լռեց: Այնուհետեւ դատավորը հանեց Գրիգորյանի հարցը, պատճառաբանելով, թե դա անձնական բնույթ է կրում: Մի քանի հարցուպատասխանից հետո պարզվեց, որ կարմիրբերետավորի օգտագործած հեռախոսահամարը գրանցված է ուրիշի անվամբ: Գրիգորյանը դիմեց դատավորին. «Հարգելի դատարան, ուրեմն դա անձնական տեղեկատվություն չէ, սա էլ ձեզ ապացույց»: Դատավորի պահվածքը հարուցեց դահլիճի զայրույթը: Ի դեպ, պաշտպանական կողմի հարցերին մեկնաբանություններով անընդհատ միջամտում էր մեղադրող դատախազը, ինչը եւս վրդովեցրեց Կոնգրեսի ակտիվիստներին: 

Փաստաբանի հարցին պատասխանելու փոխարեն, դատավորը 10 րոպե ընդմիջում հայտարարեց: Նիստը վերսկսվեց ոչ թե 10, այլ 30 րոպե անց: Դատավորը հայտարարեց, որ Տիգրան Առաքելյանին նկատմամբ սանկցիա է կիրառվում դատական նիստի կարգը խախտելու համար, եւ մինչ նիստի ավարտը նա պետք է հեռացվի դատարանի դահլիճից:

Առաքելյանը հեռացվեց, ինչից հետո սկսվեց գործով որպես տուժող անցնող վերջին կարմիրբերետավորի` Հայկ Նաջարյանի հարցաքննությունը: Ըստ էության, նա էլ պատմեց նույնը, ինչ պատմել էին մյուսները, իսկ որպես միջադեպի բացատրություն ասաց հետեւյալը. «Դե՛, իրանք ընդդիմություն են, մենք էլ իշխանության ներկայացուցիչ ենք, դրա համար եղավ»: Պատմեց նաեւ, որ դեպքի վայրում Դավիթ Քիրամիջյանը «այտախառը» հարվածել է իրեն, ինչից հետո ինքը «մանթռաժ» է եղել:

Երբ Նաջարյանին հարցեր ուղղելու հերթը հասավ պաշտպանական կողմին, Վահե Գրիգորյանը հանդես եկավ միջնորդությամբ. «Ես կխնդրեի, որ այսօրվա դատական նիստը հետաձգվի: Պաշտպանյալս այս տուժողին եւս հարցեր կունենա եւ հարցեր տալու իրավունք ունի... Իմ այս միջնորդությունը բավարարելը ուղղակիորեն կփաստի, որ դատարանը հակված է պաշտպանական կողմին թույլ տալ պաշտպանել, մյուս կողմից` այս միջնորդությունը մերժելու դեպքում ես չեմ կարող գտնվել այս դահլիճում»: Դատավորը մերժեց միջնորդությունը, ինչից հետո Վահե Գրիգորյանը սկսեց հավաքել սեղանին դրված թղթերը: Դատավորը սպառնաց, որ եթե Գրիգորյանը լքի դահլիճը, դատական նիստը կհետաձգվի, բայց Տիգրան Առաքելյանի նկատմամբ կիրառված սանկցիան կկիրառվի նաեւ հաջորդ նիստի ժամանակ: «Դուք իմ գործողությունների համար իմ պաշտպանյալին չեք կարող պատժել»,- ասաց պաշտպանն ու լքեց դահլիճը: Նիստը հետաձգվեց մինչեւ փետրվարի 2-ը, ժամը 15.00-ն: