Քննարկվել են առանձին կոռուպցիոն բնույթի քրվարույթների ձգձգման պատճառները. ՔԿ նախագահն այցելել է Սյունիք

Հայաստանի Հանրապետության քննչական կոմիտեի նախագահ Արթուր Պողոսյանը ապրիլի 18-ին աշխատանքային այցով եղել է Սյունիքի մարզում, որտեղ խորհրդակցություն է անցկացրել մարզային քննչական վարչությունում:

Ինչպես հայտնում են Քննչական կոմիտեից, Սյունիքի մարզային քննչական վարչությունում տեղի ունեցած խորհրդակցությանը մասնակցել են Սյունիքի մարզպետ Ռոբերտ Ղուկասյանը, Քննչական կոմիտեի նախագահի տեղակալներ Վազգեն Ավետիսյանը և Արման Ասլանյանը, Տարածքային քննչական վարչությունների գործունեության վերահսկողության գլխավոր վարչության պետ Կամո Շառոյանը, Սյունիքի մարզային քննչական վարչության պետ Գուրգեն Գրիգորյանը, երրորդ և իններորդ կայազորային քննչական բաժնի պետերը, մարզի դատախազ Մասիս Պողոսյանը, Զինվորական դատախազի տեղակալ Կարեն Աղաբեկյանը, Ներքին գործերի նախարարության, Ազգային անվտանգության ծառայության մարզային կառույցների ղեկավարները, մարզային քննչական վարչության և կայազորային քննչական բաժինների քննիչները:

Գուրգեն Գրիգորյանը Քննչական կոմիտեի նախագահին է ներկայացրել 2024 թվականի ընթացքում, ինչպես նաև 2025 թվականի առաջին եռամսյակի ընթացքում Սյունիքի մարզային քննչական վարչության կատարած աշխատանքները:

ՀՀ քննչական կոմիտեի Սյունիքի մարզային քննչական վարչությունում 2024 թվականի ընթացքում քննվել է 3439 քրեական վարույթ, որից 350-ը փոխանցվել է 2023 թվականից, իսկ 2499-ը ստացվել է 2024 թվականի ընթացքում: 2499 քրեական վարույթից 2412-ը նախաձեռնվել է մարզային վարչությունում, այլ մարմնից ստացվել է 73 քրեական վարույթ: 2025 թվականի հունվար ամիս փոխանցվել է 906 վարույթ:

2024 թվականին քննված 3439 քրեական վարույթից լուծվել է 2533 վարույթի ընթացք, որից դատավարական ավարտ են ունեցել 1974-ը, որից 369-ը՝ 398 անձի նկատմամբ մեղադրական եզրակացությամբ, 2-ը՝ եզրափակիչ ակտով ուղարկվել է դատարան, 1603-ը կարճվել է: 150 վարույթ միացվել է, այլ մարմին ուղարկվել է 111 վարույթ, պասիվացվել է 298-ը:

2024 թվականի ընթացքում 12.1%-ով նվազել է ընթացքը որոշված քրեական վարույթներով արտադրողականությունը, որը կազմել է 73.7% (2023-ին՝ 85.8%), սակայն աճել է արտադրողականությունն ավարտված վարույթներով՝ կազմելով 57.4% (2023-ին՝ 49.3%): Դատարան ուղարկված վարույթներով աճել է արտադրողականությունը՝ կազմելով 10.8% (2023-ին՝ 8.4%):

2024 թվականի ընթացքում աճել է 1 քննիչի միջին ծանրաբեռնվածությունը, որը կազմել է 202 քրեական վարույթ (2023-ին՝ 190 քրեական վարույթ)։

2024 թվականի ընթացքում դատարան ուղարկված, ինչպես նաև ոչ ռեաբիլիտացնող հիմքով կարճված քրեական վարույթներով պատճառված գույքային վնասի չափը կազմել է 131 մլն 708 հզր ՀՀ դրամ, որից վերականգնվել է 34 մլն 92 հզր ՀՀ դրամը:

Հաշվետու ժամանակահատվածում անչափահասների կողմից կատարված հանցագործությունների դեպքերով քննվել է 24 քրեական վարույթ, որից 4-ը մեղադրական եզրակացությամբ ուղարկվել է դատարան, 11-ը՝ կարճվել, 4-ը՝ միացվել, 8-ը փոխանցվել է 2024 թվականի հունվար ամիս:

Նույն ժամանակահատվածում անչափահասների նկատմամբ կատարված հանցագործությունների դեպքերով քննվել է 33 քրեական վարույթ, որից 4-ը ուղարկվել է դատարան, 13-ը՝ կարճվել, 2-ը՝ միացվել, 15-ը փոխանցվել է 2025 թվականի հունվար ամիս:

2024 թվականի ընթացքում քննվել է կոռուպցիոն բնույթի հանցագործությունների վերաբերյալ 22 քրեական վարույթ, որից 14-ը փոխանցվել է 2023 թվականից: 22-ից 2-ը մեղադրական եզրակացությամբ ուղարկվել է դատարան, 2-ը կարճվել է, 12-ը՝ ուղարկվել այլ մարմին: 2025 թվականի առաջին կիսամյակ փոխանցվել է 6 քրեական վարույթ:

Մարզային քննչական վարչությունում 2024 թվականի դեկտեմբերի 2-ի դրությամբ առկա է եղել 1 տարուց ավելի քննվող 185 քրեական վարույթ:

2024 թվականի դեկտեմբերի 2-ից մինչև 2025 թվականի ապրիլի 1-ն ընկած ժամանակահատվածում լուծվել է 1 տարուց ավելի քննվող 136 վարույթի ընթացք, որից 9-ը մեղադրական եզրակացությամբ ուղարկվել է դատարան, 70-ը կարճվել է, 52-ը՝ պասիվացվել, 2-ն՝ ուղարկվել այլ մարմին, 4-ը միացվել է: Նշված վարույթներից 86-ն ավարտվել է 2025 թվականի առաջին եռամսյակի ընթացքում:

ՀՀ քննչական կոմիտեի Սյունիքի մարզային քննական վարչությունում 2025 թվականի առաջին եռամսյակի ընթացքում քննվել է 1581 քրեական վարույթ, որից 906-ը փոխանցվել է 2024 թվականի դեկտեմբերից, իսկ 675-ը ստացվել է 2025 թվականի առաջին եռամսյակի ընթացքում:

2025 թվականի առաջին եռամսյակի ընթացքում քննված 1581 քրեական վարույթից լուծվել է 602 վարույթի ընթացք, որից դատավարական ավարտ են ունեցել 489-ը, որից 79-ը մեղադրական եզրակացությամբ կամ եզրափակիչ ակտով ուղարվել է դատարան, 410 վարույթ կարճվել է, 77-ը՝ պասիվացվել, 39-ը՝ միացվել, 21-ն ուղարկվել է այլ մարմին, անավարտ վարույթների թիվը 955 է:

Քննչական կոմիտեի զինվորական քննչական գլխավոր վարչության իններորդ կայազորային քննչական բաժնում 2024 թվականի ընթացքում քննվել է 771 քրեական վարույթ (2023-ին՝ 1132): 771 քրեական վարույթներից 450-ը փոխանցվել է 2023 թվականից:

2024 թվականի ընթացքում քննչական մարմնի կողմից նախաձեռնվել է 252 քրեական վարույթ (2023-ին՝ 408), այլ մարմինների կողմից ստացվել է 14 քրեական վարույթ:

771 քրեական վարույթից ավարվել է 255-ի նախաքննությունը, որից 150-ը կարճվել է:

71 քրեական վարույթ միացվել է այլ քրեական վարույթի, 10-ն ուղարկվել է այլ մարմիններ:

Հաշվետու ժամանակահատվածում 1 քննիչի միջին ծանրաբեռնվածությունը կազմել է 128 քրեական վարույթ:

2025 թվականի առաջին եռամսյակում քննվել է 518 քրեական վարույթ, որից 435-ը փոխանցվել է 2024 թվականից: Քննված 518 քրեական վարույթներից ավարտվել է 74-ի նախաքննությունը, որից 51-ը կարճվել է:

Հաշվետու ժամանակահատվածում 1 քննիչի միջին ծանրաբեռնվածությունը կազմել է 106 քրեական վարույթ, իսկ ըստ դատավարական ավարտի՝ 12 քրեական վարույթ:

2025 թվականի առաջին եռամսյակի ընթացքում դատարան ուղարկված, ոչ ռեաբիլիտացնող հիմքով կարճված քրեական վարույթներով պետությանը պատճառված նյութական վնասը կազմել է 1 մլն 828 հզր 289 ՀՀ դրամ, որից վերականգնվել է 1 մլն 322 հզր ՀՀ դրամը:

Քննչական կոմիտեի նախագահ Արթուր Պողոսյանը հանձնարարել է ակտիվացնել պայքարն ապօրինի ընդերքօգտագործման և ապօրինի ծառահատումների, որսագողության դեմ պայքարում՝ նշելով, որ այդ բնույթի քրեական վարույթները գտնվելու են իր հսկողության ներքո:

Արթուր Պողոսյանը ևս մեկ անգամ ընդգծել է քաղաքացիների իրավունքների և օրինական շահերի պաշտպանության առաջնահերթությունը և հանձնարել է բացառել անձանց սեփականության իրավունքի անհիմն սահմանափակման դեպքերը:

Խորհրդակցության ընթացքում անդրադարձ է կատարվել նաև առանձին կոռուպցիոն բնույթի քրեական վարույթներին, քննարկվել դրանց ձգձգման պատճառները և հանձնարարվել է այդ վարույթներն առաջիկայում ներկայացնել զեկուցման: