1865-ին բացվեց քաղաքային ակումբի վարագույրը, և այդ օրը ցնծություն էր. Գյումրու դրամատիկականը 160 տարեկան է

«Բացվեց քաղաքային ակումբի վարագույրը, ազդարարվեց ներկայացումը, և այդ օրը Գյումրիում համաժողովրդական ցնծություն էր»:

Քաղաքի բնակչությունը թատրոնի ստեղծման համար տրամադրում է 117 ռուբլի: Հեռավոր 1865-ի մայիսի 23-ին այս մասին գրեց ժամանակի մամուլը՝ ազդարարելով Գյումրու թատրոնի ծնունդը: Ժամանակի հրամայականով ծնված թատրոնն այսօր արդեն 160 տարեկան է:

Գյումրիում մեծ հանդիսավորությամբ տրվեց 160-րդ թատերաշրջանի մեկնարկը: Դրամատիկական թատրոնի գեղարվեստական ղեկավար Լյուդվիգ Հարությունյանն ընդգծում է՝ կարծրատիպ են կոտրել:

«Առիթ եմ ունեցել 10 տարի առաջ նշել թատրոնի 150-ամյակը, և ուզեցինք, որ 10 տարի անց փոխվի ձևաչափը: Մենք կոտրեցինք կարծրատիպը և 160-ամյակը տեսանք այլ կերպ․ դերասանները բոլորն էլ բեմում էին, բայց չխաղացին: Սա որպես ներկայացում մտնելու է թատրոնի խաղացանկ»,- ասաց Հարությունյանը:

Թատրոնի շենքի ճեմասրահներում ցուցադրության են ներկայացված տարբեր տարիների ներկայացումների բեմական մակետները, դերասանների հանդերձանքը, 160-ամյա թատրոնի արխիվային լուսանկարները։ Կայացել է նաև «160 ակնթարթ» ֆոտոալբոմի շնորհանդեսը։

Աճեմյանցիները բեմ բարձրացան «Արտիստիկ համերգ» շոու-ներկայացմամբ՝ մասնակցությամբ «Ֆոլկաստիկ բենդ»-ի։  Ռեժիսորը Ռաֆայել Ասատրյանն է, պարային հատվածների հեղինակը՝ Արինա Արարատյանը, իսկ զգեստները ձևավորել է Լուսինե Խաչատրյանը։ Երգերի, պարերի, լույսերի ու տրամադրությունների շքեղ հրավառությամբ տրված հոբելյանական թատերաշրջանի մեկնարկով չի սահմանափակվի Գյումրու դրամատիկականը: Հոբելյանական ու տոնական է լինելու ողջ տարին:

Մինչ այս թատրոնն արդեն հասցրել է հյուրախաղերով լինել ԱՄՆ-ում, ԿԳՄՍՆ աջակցությամբ՝ նաև Ղազախստանում, նաև արդեն մեկ առաջնախաղ են ունեցել՝ «Երեք անունով մի աղջիկ»: 160-րդ հոբելյանական թատերաշրջանի առաջին ներկայացումը բեմադրել է ՀՀ ժողովրդական արտիստ, թատրոնի գեղարվեստական խորհրդական Նիկոլայ Ծատուրյանը:

«Այս թատրոնն արժանի է այս քաղաքին: Ամենադժվար պահերին ինչպես թատրոնն է եղել Գյումրու կողքին, այնպես էլ քաղաքն է թատրոնի կողքին»,- ասաց Լյուդվիգ Հարությունյանը:

Դրամատիկականի կենսունակության աղբյուրը հանդիսատեսն է՝ ազնիվ, հավատարիմ և անդավաճան:

«Շնորհակալ ենք մեր անդավաճան հանդիսատեսին, որոնց բարձր ճաշակի և խստապահանջության շնորհիվ թատրոնը ժամանակ կա փոքր, ժամանակ կա՝ մեծ քայլերով առաջ է գնում։ Թատրոնը լավ ձեռքերում է, առաջընթացի մեջ է, այսօր մենք կերտում ենք գալիքը, ապագան»,- ասաց ՀՀ վաստակավոր արտիստ Տիգրան Գաբոյանը։

Հոբելյանական տոնական երեկոն և դրա շրջանակներում արված բոլոր աշխատանքները իրականություն են դարձել ԿԳՄՍՆ աջակցությամբ: Նախարար Ժաննա Անդրեասյանը նշեց՝ շարունակելու են մնալ թատրոնի կողքին:

«Գյումրու թատրոնը մեր ամենադինամիկ զարգացող թատրոններից է, և հատկապես կարևոր է, որ այստեղ գալիս են ներկայացումներ դիտելու ոչ միայն գյումրեցիները, այլև մեր ամենատարբեր բնակավայրերի քաղաքացիները։ Սա նշանակում է, որ թատրոնի ներկայացումները վաղուց դուրս են եկել այս դահլիճի սահմաններից և դարձել սիրված ու պահանջված լայն հանրության համար:

Մենք շարունակելու ենք լինել թատրոնի կողքին, և խոսքը միայն նոր ներկայացումների ստեղծման ու հյուրախաղերին աջակցելու մասին չէ։ Մենք նաև հանձնառություն ունենք վերափոխելու թատրոնի պայմանները. աշխատանքի մեծ մասն արված է։ Ուրախ եմ հայտնել, որ այս տարի էլ պետության աջակցությամբ Գյումրու թատրոնը կունենա ամբողջությամբ նոր լուսային և ձայնային համակարգ, ինչը նոր հնարավորություններ կընձեռի թատրոնի զարգացման համար»,- ասաց նախարարը:

Շիրակի մարզպետ Դավիթ Առուշանյանը, ելույթում մատնացույց անելով բեմին կանգնած դերասաններին և դահլիճում ներկաներին, նշեց՝ սա է Գյումրին, և նրանք են իսկական ու իրական գյումրեցիները, այլ տեսակ չկա:

«160 տարի մեր թատրոնը գյումրեցու մեջ կաթիլ առ կաթիլ մշակույթ, արվեստ է սերմանել, որը «լեգիտիմացնում» է Գյումրին մշակութային մայրաքաղաք կոչելը, «լեգիտիմացնում» է հայրաքաղաք կոչելը, և ինչու ոչ, «լեգիտիմացնում» է մեր գլուխգովանությունը։ Ինձ համար հպարտություն է կանգնել այս բեմին՝ իմանալով ինչ մեծություններ են այստեղ հանդես եկել, և զգացմունքների, հպարտության այս հրավառության մեջ ուզում եմ բոլորին ասել՝ իսկական Գյումրին այստեղ է, իսկական ու իրական գյումրեցին այստեղ է, այլ տեսակ չկա» ,- ընդգծեց մարզպետը:

Որպես տարիների նվիրյալ աշխատանքի գնահատանք՝ նախարարը թատրոնի մի շարք ներկայացուցիչների պարգևներ է հանձնել: Ըստ այդմ՝ Անկախության տոնի առթիվ արվեստի բնագավառում ունեցած նշանակալի ձեռքբերումների և երկարամյա նվիրումի համար ՀՀ վարչապետի հուշամեդալով պարգևատրվել են Գյումրու Վ. Աճեմյանի անվան պետական դրամատիկական թատրոնի դերասաններ Սամվել Գրիգորյանը և Նառա Սանթոյանը:

ԿԳՄՍՆ մեդալներով են պարգևատրվել դերասաններ Հովհաննես Հովհաննիսյանը, Հասմիկ Վիրաբյանը և Արսեն Սաղաթելյանը: Թատրոնի մի շարք ներկայացուցիչներ պարգևատրվել են պատվոգրերով ու շնորհակալագրերով:

Գյումրիում ամենաշատը թատրոն հաճախում են բժիշկները. գուցե իրենց հիվանդները շա՞տ են այստեղ

Տարիներ առաջ հնարավոր է եղել հասկանալ՝ ով է այն հանդիսատեսը, որ երբեք որևէ ներկայացում բաց չի թողնում: Այսօր պատկերն այլ է․ մեկ մարդը կարող է նույն ներկայացումը մի քանի անգամ նայել, անգամ Երևանում նույն ներկայացմանը ներկա լինել:

Լյուդվիգ Հարությունյանը նկատում է՝ եթե բնագավառներով առանձնացնի, կարող է ասել, որ Գյումրիում ամենաշատը բժիշկներն են թատրոն հաճախում: Կատակում է՝ գուցե իրենց հիվանդներն այստեղ շա՞տ են:

«Սա միանշանակ: Յուրաքանչյուրս 3 բժիշկ ունենք: Չկա ներկայացում ու առաջնախաղ, որ մեր բժիշկները ներկա չլինեն: Ուրախ եմ, բայց չգիտեմ՝ գալիս են դերասանների խաղը տեսնելո՞ւ, թե՞ իրենց հիվանդներին նայեն՝ ինչպես են: Քաղաքի բոլոր կառույցների հետ էլ թատրոնը համագործակցում է: Մենք սկզբունք ունենք՝ չենք խնդրում, որ գան թատրոն: Կարևոր է, որ հանդիսատեսը մոտենա տոմսարկղին ու տոմս գնի․ դա պահպանված ավանդույթ է, ուրախ եմ, որ գյումրեցիների համար դա կարևոր է»:

Թատրոնում պետք է երիտասարդների շունչ լինի, տեղ ունեն այստեղ. ժամանակին մեզ էլ են այդպես դիմավորել

Գյումրու թատրոնին հաջողվում է ճիշտ ու սահուն սերնդափոխությունը: Վաստակաշատների և հայտնի դերասանների կողքին այստեղ միշտ երիտասարդներ կան: Կա սկզբունք՝ պարտադիր չէ, որ ուսանողը բեմում լինի կրթությունն ավարտելուց հետո: Եթե պետք է, հենց ուսանողական տարիներից է նա այնտեղ:

«Գյումրու թատրոնը շատ ջերմ համագործակցում է ԵԹԿՊ-ի Գյումրու մասնաճյուղի հետ, ինքներս այդ մասնաճյուղի շրջանավարտներ ենք: Այդ կապը պարտադիր է: Երիտասարդների շունչը միշտ պետք է լինի թատրոնում․ դա շատ կարևոր է: Գնահատելով հինը, որը մենք երբեք արմատախիլ չենք անում, կառուցում ենք նորը, իսկ այդ նորը, թարմը պետք է բերի երիտասարդը: Մեզ այդպես են դիմավորել, և մենք էլ կարծում ենք՝ այն երիտասարդը, որը ասելիք ու անելիք ունի, թատրոնի դռներն իր առաջ բաց կգտնի»,- ասաց դրամատիկականի գեղարվեստական ղեկավարը: