Ներկայացումներ 0-ից 100 տարեկանների համար. բացվեց Գյումրու տիկնիկայինի հոբելյանական 90-րդ թատերաշրջանը

Կենսունակ ու մեծ նպատակների հետևից քայլող Գյումրու տիկնիկային թատրոնը շարունակում է զարմացնել ու հիացնել իր հանդիսատեսին: Բացվեց հոբելյանական 90-րդ թատերաշրջանը:

Տիկնիկային տերմինը սովորաբար նույնականանում է երեխայի հետ, Գյումրու տիկնիկայինում ամեն ինչ այլ է: Տարիքն այստեղ այլ հաշվարկային միավոր է:

Ներկայացումներ 0-100 տարեկանների համար. ինչպես և որտեղ վերագտնել մանկությունը Գյումրիում

«0-ից 100 տարեկանների համար են մեր ներկայացումները: Սա կարևոր երևույթ է և խոսում է այն մասին, որ մեր առաքելությունը ճիշտ ուղու վրա է: Մեր 90-ամյա թատրոնը դարձել է առանց տարիքային սահմանափակման բոլորի համար հրաշքի օղակ, մանկություն գտնելու, մեծահասակների դեպքում՝ մանկություն վերագտնելու մի տարածք, որտեղ մարդիկ հիշողությունների մեջ են ընկնում, հիանում են, ուրախանում են, վայելում են, վերապրում իրենց մանկությունը»,- «Հայկական ժամանակ»-ի հետ զրույցում ասում է Գյումրու տիկնիկային թատրոնի տնօրեն, գեղարվեստական ղեկավար Արմենուհի Մանուկյանը:

Մարդը ձգտում է նրան, ինչն անհնար է, հետո սկսում է ողբալ, թե ինչու է անհնարը անհնար. Իսահակյան

Հոբելյանական թատերաշրջանը Գյումրու տիկնիկայինը Իսահակյանով բացեց. տարին վարպետի համար էլ է հոբելյանական: Մանուկյանն ասում է՝ Ավետիք Իսահակյանին բեմ բարձրացնելը թատերայնորեն բարդ էր, հատկապես մանկական ներկայացման առումով:

«Մարդը ձգտում է նրան, ինչն անհնար է, հետո սկսում է ողբալ, թե ինչու է անհնարը անհնար»:

Իսահակյանի այս հայտնի միտքն ուղենշային է եղել թատերաշրջանի ներկայացման ընտրության համար:

«Որոշեցինք, որ պետք է Իսահակյանի «Նուկիմ քաղաքի խելոքները» արդիական դարձնենք և նաև դարձնենք այնպես, որ երեխաներին հասու լինի հեքիաթը և լինի էսթետիկ: Որոշեցինք ու բեմադրեցինք ըստ Ավետիք Իսահակյանի՝ «Քաղաքի խելոքները» պիեսը, որի հեղինակը ես եմ, ներկայացման բեմադրությունը և երաժշտական ձևավորումը մեր թատրոնի ռեժիսոր Անի Մարգարյանինն է, նկարչական ձևավորումը և տիկնիկների քանդակները՝ նկարիչ-քանդակագործ Կարեն Թովմասյանինը:

Մենք ստացել ենք բավական հետաքրքրիր ներկայացում: Որպես հերոսներ ներկայացված են մեր քաղաքի և նաև մնացած հայ մեծանուն գրողներն ու դերասաններ՝ Ավետիք Իսահակյան, Հովհաննես Շիրազ, Մհեր Մկրտչյան, Հովհաննես Թումանյան: Այս 4 կերպարն ավելի գեղեցիկ ու իմաստուն է դարձնում հեքիաթը:

Սա այն ներկայացումներից մեկն է, որն իրապես արժեքավոր է, ուսուցողական է և նոր սերնդի համար և նաև նրանց համար, ովքեր հետ են մղված մեր արժեքներից: Սա դաստիարակչական ներկայացում է, այս արժեքներին պետք է արժանավայել մեծարենք, քանզի նրանք համեմում են մեր քաղաքն իրենց բնավորությամբ և հավերժ քայլելու են մեր հետ»,- ասում է թատրոնի տնօրենը:

Երկու Վարպետ. Իսահակյանի խոհեմությունը վաստակաշատ Գառնիկ Պետրոսյանն է փոխանցում

«Քաղաքի խելոքները» ներկայացման մեջ զբաղված է երիտասարդներից կազմված թատերախումբը: Նրանց հետ բեմում է նաև վաստակաշատ դերասան Գառնիկ Պետրոսյանը: Հենց նա է մարմնավորել Իսահակյանին:

«Հայ մեծերի կերպարները մարմնավորած երիտասարդների հետ զուգահեռ նրանց էներգիային, տրամադրություններին ու ավյունին ամենևին չզիջելով՝ բեմում է նաև տիկնիկայինի վաստակաշատ դերասան Գառնիկ Պետրոսյանը: Նա է հանդես գալիս Իսահակյանի դերում, նրա միջոցով փառահեղ է ներկայանում վարպետին իր խոհեմությամբ ու ծանրակշռությամբ: Այսինքն՝ բեմում 2 Վարպետներ են․ արդյունքում իրոք փառահեղ խաղ է ստացվել»:

Sold Out. «Քաղաքի խելոքները» ներկայացման տոմսերը սպառվում են միանգամից, բոլոր օրերի համար

«Քաղաքի խելոքները» ներկայացումը երկար է մնալու տիկնիկայինի խաղացանկում: Այն, որ գործը հաջողված է, վեր է կասկածից: Այն դիտելու ցանկություն են հայտնել մեծերն էլ, փոքրերն էլ: Բոլոր օրերի համար նախատեսված տոմսերը սպառվել են հայտարարություններից ժամեր անց:

«Այս իրավիճակում, բնական է, որ թատրոնն իրեն լավ է զգում: Յուրաքանչյուր թատրոնի համար առավելություն ու հպարտություն է, երբ միայն ներկայացման վերնագիրն ես նշում, և տոմսերը սպառվում են:

Այս ներկայացումը, ինչպես մյուս բոլոր ներկայացումները, տիկնիկայինը կյանքի է կոչում սեփական ֆինանսական միջոցներով: Դրանք և՛ քիչ են, և՛ անսպառ չեն, իսկ աջակցության բացակայության պարագայում մեծ ծանրաբեռնվածություն են թատրոնի համար: Նման բարդ իրավիճակը, սակայն, երբեք դահլիճ չի փոխանցվում: Հանդիսատեսին միշտ ողջունում են գունավոր, գեղեցիկ, ակնահաճո տիկնիկները:

«Մեր այս ներկայացումն իրոք շքեղ է ստացվել: Սա ֆինանսական հարցեր, ճիշտ է, առաջացնում է, բայց աշխատել ենք ամեն ինչ անել բարձրակարգ, քանի որ տիկնիկայինն աչքի արվեստ է, պետք է ամեն ինչ իրական ու ճիշտ լինի»,- ասում է Մանուկյանը:

Ամանորին երեխաներին կսպասեն «Կարմրիկը», «Գրինչ»-ը և «Դեպի օվկիանոս կանաչ բլուրների վրայով» ներկայացումները

Ամանորը Գյումրու տիկնիկայինում լինելու է հեքիաթային ու կախարդական, ինչպես միշտ: Միանգամից երեք նոր ներկայացում կլինի բեմում՝ Թումանյանի «Կարմրիկը», Դոկտոր Սյուսի «Գրինչ»-ը և Սերգեյ Կազլյովի «Դեպի օվկիանոս կանաչ բլուրների վրայով»: Այդ օրերին հատկապես Գյումրու տիկնիկայինում մեծ հոսք կա: Ժամանակը քիչ է, աշխատանքի ծավալը՝ մեծ:

Երեխաների սպասումներն արդարացնելու համար տքնաջան աշխատանքի փուլում են ալիխանյանցիները:

Հատկապես «Գրինչ»-ն իր ձևաչափով անակնկալ է լինելու․

«Նոր տարվա 15 օրվա փոքր կտրվածքով ավելի շատ հոսք ենք ունենում: Ամանորը մեզ համար շատ կարևոր է, և արդեն ընթացքի մեջ են ներկայացումների փորձերը: «Գրինչ»-ը հեքիաթը լինելու է կենդանի պլանով, դերասաններն են խաղալու, նրանք հնարավորություն կունենան իրենք իրենց դերասանական շնորհով և աուրայով հանդես գալ երեխաների համար առանց տիկնիկների:

Ունենք շատ քիչ ժամանակ և 3 հեքիաթ, հասցնելու ենք»:

Տիկնիկների շքերթով կփակվի հոբելյանական տարին. ինչ է սպասվում

90-ամյա հոբելյանական տարին կշարունակվի բուռն և կավարտվի առավել քան հիշարժան: Մանուկյանն ասում է՝ այդ հարցում իրենց օգնելու են դպրոցներն ու մանկապարտեզները: Երեխաները տիկնիկներ կպատրաստեն, Գյումրիում տիկնիկների շքերթ կլինի: Շատ փակագծեր բացելու ժամանակը երբ գա, այդ մասին ավելի մանրամասն կպատմեն, իսկ այս պահին Ստեփան Ալիխանյանի տիկնիկային թատրոնը, որը մի քանի տարուց կշեմի մեկդարյա իր կենսագրության ոսկե էջը, բոլորին հրավիրում է մանկանալու, խորհելու, մեծանալու, կյանք ու սեր գտնելու իր հյուրընկալ հարկի տակ: