Տիկինը պնդում է՝ 150 տեղ չկա

Այս շաբաթ Մալաթիա-Սեբաստիա համայնքում Սերժ Սարգսյանը, ինչպես տեղեկացրել էինք, հայտարարել էր, թե Հայաստանում աշխատատեղերի խնդիր չկա: «Որովհետեւ ցանկացած հեռուստաալիք միացնում ես, արդեն աշխատողներ են փնտրում: Բայց, ցավոք, այդ աշխատանքը քիչ վճարվող աշխատավարձով աշխատանք է, եւ մարդիկ չեն ուզում աշխատել այլեւս 150 հազար դրամով, որեւէ մեկը չի ուզում գնալ եւ աշխատել»,- ասել էր Սարգսյանը: Ի դեպ, այս նույն հայտարարությունը նա արել էր նաեւ Չարենցավանում` կրկին իր քարոզարշավի շրջանակներում: Բայց, ի տարբերություն Չարենցավանի, Մալաթիայում այն բոլորովին այլ արձագանքի արժանացավ: Դահլիճում զարմանքի ալիք բարձրացավ: Տեսնելով այդ արձագանքը, Սերժ Սարգսյանը, դիմեց առաջին շարքում նստած Երեւանի քաղաքապետ Տարոն Մարգարյանին. «Ուզում եք, Տարոն, խնդրեմ, ասա, թե քանի վարորդի կարիք ունենք»: «150 աշխատատեղ` վարորդի, 200 աշխատատեղ` կոմունալ ծառայությունում, խնդրեմ, կարող են ցանկացողները դիմել քաղաքապետարան»- տեղից վեր կենալով, հայտարարեց Տարոն Մարգարյանը: Եւ ահա երեկ համացանցում հայտնված վերոնշյալ տեսանյութից տեղեկանում ենք, թե ինչպես է մի քաղաքացի փորձում Սերժ Սարգսյանի եւ Տարոն Մարգարյանի հայտարարություններից հետո վարորդի աշխատանք գտնել քաղաքապետարանում, եւ ինչպես է պարզվում, որ նման աշխատանք չկա: Քաղաքացին զանգահարում է քաղաքապետարանի թեժ գծով եւ հայտնում, որ վարորդի աշխատանքի համար է անհանգստացնում: Նրան տալիս են այլ հեռախոսահամար: Քաղաքացին զանգահարում է այդ հեռախոսահամարով, այստեղ նրան տալիս են մեկ այլ համար (տրանսպորտի վարչության), մեկ այլ համարից էլ` մեկ այլ համար, այստեղից էլ` մեկ այլ համար: Մի խոսքով, մի քանի հեռախոսահամարներով զանգահարելուց հետո նա միանում է Երեւանի ավտոպարկ, որտեղի աշխատակցուհին ասում է, որ վարորդի թափուր տեղ չունեն: Երբ քաղաքացին ասում է, որ հայտարարվել է վարորդի 150 թափուր աշխատատեղի մասին` 150 հազար դրամ աշխատավարձով, ավտոպարկի աշխատակցուհին նշում է, թե նման աշխատավարձ չկա, իրենց մոտ ժամավճար է:

Երեկ զանգահարեցինք Երեւանի քաղաքապետարանի տրանսպորտի վարչության պետ Հենրիկ Նավասարդյանին:

- Պարոն Նավասարդյան, այս պահի դրությամբ, վարորդի քանի՞ թափուր աշխատատեղ կա:
- Մենք ունենք 150 ավտոմեքենայի վարորդի թափուր տեղեր: Այսինքն, կա վարորդի խնդիրը:

- Աշխատավարձը որքա՞ն է կազմում:
- Աշխատավարձը կախված է իրենց աշխատանքային ժամերից, իրենք ժամավճարով են վճարվում: 22-24 օր աշխատելու դեպքում 70-80 հազար դրամ աշխատավարձ են ստանում, բայցի այդ, քանի որ իրենք շաբաթ, կիրակի էլ են աշխատում, նաեւ տոնական օրերին եւ երեկոյան ուշ ժամերին, որպես խրախուսման միջոց մոտավորապես մի 80 հազար դրամի չափով էլ լրացուցիչ աշխատավարձ են ստանում: Եւ ընդհանուր առմամբ, որ ասում ենք 150 հազար, այդպես է ստացվում:

- Դուք այդպես եք ասում, բայց համացանցում հենց հիմա պտտվում է մի տեսանյութ, որտեղ…
- Գիտեմ, տեսել եմ:

- Այդ դեպքում ինչպե՞ս դա կմեկնաբանեք:
- Քաղաքապետարանի աշխատողները տալիս են ավտոբուսային պարկի հեռախոսի համարը, որտեղ աշխատողներից մեկը, ամբողջությամբ չտիրապետելով, անպատասխանատու հայտարարություններ է արել` չմեկնաբանելով ամբողջը, որի համար ինքը պատժվելու է:

- Ի՞նչ եք անելու, հեռացնելու ե՞ք:
- Պատժելու ենք, նաեւ կարող է եւ հեռացնեն, այո: Տնօրենը նկատողության նման մի բան արել է առավոտյան, բայց վերջնական պետք է որոշի` ինչ պատժամիջոց կիրառի:

- Այսինքն, հիմա մարդիկ հանգիստ կարող են դիմե՞լ վարորդի աշխատանքի համար:
- Այո, այո, անխտիր:

- Այդ կինը շուտվանից է՞ այնտեղ աշխատում:
- Մի 4-5 ամիս, երեւի:

- Այսինքն, կարող է այս ընթացքում էլի բազմաթիվ մարդկանց նույն պատասխանն է տվե՞լ, ինչպե՞ս է նա աշխատանքի ընդունվել, եւ ինչպե՞ս կարող է նման բան լինել:
- Դուք հիմա բան եք ասում, որի ավելի շուտ պատասխանատուն է տնօրենը: Ես հո ցանկացած աշխատողի վերաբերյալ մանրամասն քննություն չե՞մ անցկացնում: Դա տնօրենի իրավունքների մեջ է եւ բացի այդ, իրենք պետք է շահագործման բաժնի պետի կամ տնօրենի համարը տային: Էսօրվանից տնօրենը արգելել է բոլորին հեռախոսներին պատասխանելը, բացի այդ հեռախոսազանգերն էլ թեժ գծով գնում են շահագործման բաժնի պետի եւ տնօրենի համարներին, որ կարողանան ստույգ պատասխանել, որ այդպիսի թյուրիմացություններ չլինեն:

Երբ զանգահարեցինք ավտոպարկ, հեռախոսը վերցրեց նույն կինը: Ակնհայտ էր, որ ղեկավարությունը նրա հետ արդեն համապատասխան զրույց էր ունեցել: Տիկինը, որ հրաժարվեց նշել իր անունը, կրկնում էր նույնը, ինչ մեր զրույցում ասել էր քաղաքապետարանի տրանսպորտի վարչության պետը: Նա հայտնեց, որ բանավոր նկատողություն է ստացել տնօրենից: Երբ ասացինք, որ խոսվում է իրեն աշխատանքից ազատելու մասին, ասաց. «Հիմա ես կարող է դիմում գրեմ, դուրս գամ»: Հիմա վարորդի քանի՞ թափուր տեղ ունեք, 150 տեղ կա՞` հարցին պատասխանեց. «150 չգիտեմ` կա, թե ոչ: Այս պահին չկա 150 տեղ: Կլինի՞ ես տնօրենին փոխանցեմ»:  Վայրկյաններ անց, սակայն, նա հայտնեց, որ տնօրենը` Էլբակ Թարփոշյանը, դուրս է եկել: