ՆԿԱՐՎՈՂ «ԿԱՐՄԻՐ ԳԾԵՐԸ»

Այն փողոցներում, որտեղ «Փարքինգ սիթի սերվիս» փակ բաժնետիրական ընկերության կողմից ամբողջական կահավորում չի արվել, այսինքն` չեն տեղադրվել տեսախցիկներ, կայանելն առայժմ անվճար է: Այս մասին մեզ հետ զրույցում ասաց «Փարքինգ սիթի սերվիս» ՓԲԸ տնօրեն Վազգեն Հարությունյանը:

Հարությունյանը հավաստիացրեց, որ կայանման դիմաց բոլոր չվճարողները տուգանվում են առանց խտրականության, բայց` եթե փողոցը ամբողջությամբ կահավորված է: «Որտեղ կահավորումը թեկուզ մի մասով պակաս է, այնտեղ հսկողություն չենք իրականացնում»,-ասաց ընկերության տնօրենը: Նման դեպքերում կայանման դիմաց վճարել-չվճարելը «Փարքինգ սիթի սերվիսը» առայժմ թողնում է վարորդների խղճին: Սակայն այդպես երկար չի շարունակվի: Տեսախցիկների տեղադրումը Երեւանի փողոցներում շարունակվում է: «Վերջին օրերին տեսախցիկներ են տեղադրվել Չարենց, Տերյան, Բեյրութի, Խորենացի փողոցներում: Նրանցից մեկ-երկուսը, օրինակ Չարենցի փողոցը, ակտիվ կլինի 1-2 օրից, քանի որ կահավորումը նոր ենք ավարտել: Մի քանի օրից այս ցանկին նոր փողոցներ կավելանան»,-ասաց Հարությունյանը: Մինչեւ տարեվերջ «Փարքինգ սիթի սերվիս» ՓԲԸ-ն կավարտի Փոքր Կենտրոնի կահավորումն ամբողջությամբ: Իսկ մինչ այդ, կահավորված փողոցների թիվը շուտով կհասնի մոտ 20-ի: Դրանք են.  

Կահավորված
Ամիրյան փողոց    
Մաշտոցի պողոտա  
Սայաթ-Նովա փողոց
Իսահակյան փողոց  
Թումանյան փողոց  
Խորենացի փողոց
Գր. Լուսավորիչ փողոց    
Բեյրութի փողոց     
Սարյան փողոց
Մոսկովյան փողոց  
Չարենց փողոց    
Տերյան փողոց      

Շուտով
Հանրապետության փողոց
Տիգրան Մեծի պողոտա
Վարդանանց փողոց
Ագաթանգեղոսի փողոց
Աբովյան փողոց

Հիշեցնենք, որ Երեւանում ավտոկայանատեղիները վճարովի են սեպտեմբերի 1-ից: Թե որքան մարդ է տուգանվել կայանման դիմաց չվճարելու համար, «Փարքինգ սիթի սերվիսից» դժվարացան նշել: Ընկերության տնօրենն ասաց, որ նման ցանկ չի կարող տրամադրել, քանի որ դա միայն նախնական ցանկ է: Ընկերությունը ֆիքսում է տեղական տուրքի մասին օրենքը խախտողների տվյալներն ու դրանք հանձնում Երեւանի քաղաքապետարանին: Արձանագրությունները վերջնական կազմվում են հենց այստեղ: «Քաղաքապետարանն է տուգանողը, խնդրում եմ դիմեք քաղաքապետարան, տվյալներն այնտեղ են»,-ասաց Վազգեն Հարությունյանը: Քաղաքապետարանից մեզ պարզաբանեցին, որ իրավաբանական վարչությունը արձանագրությունները կազմելուց առաջ ճշտում է` այդ ընթացքում կարգազանցներից եղե՞լ են տուգանքը վճարողներ, թե ոչ: Ցանկը ֆիլտրելուց հետո նոր կազմվում են արձանագրություններ: Եթե վարորդը սահմանված ժամկետում չի վճարում տուգանքը, ապա հարցը քննարկվում է դատական կարգով:

Հիշեցնենք, որ Երեւանի վճարովի ավտոկանգառներից մինչեւ 5 րոպե օգտվելն անվճար է: 5 րոպեից ավել կայանելու համար վարորդը պարտավոր է վճարել: Մեկ ժամ կայանելն արժե 100 դրամ, մեկ օրը` 500, մեկ շաբաթը` 1000 դրամ, մեկ ամիսը` 2000 դրամ, մեկ տարին` 12 հազար դրամ: Կեսգիշերից մինչեւ առավոտյան ժամը 9:00-ն կայանելու համար գումար չի գանձվում: Մեկ տարվա համար վճարելով, վարորդը իրավունք կունենա ծառայությունից օգտվել ոչ թե 12 ամիս, այլ` մինչեւ ընթացիկ տարվա դեկտեմբերի 31-ը: Մինչեւ 1 ժամ վճարման համար անհրաժեշտ է բջջային հեռախոսից SMS ուղարկել 1045 համարին, տեքստում նշելով մեքենայի պետհամարանիշը` լատինատառ, առանց միջակայքի: Հեռախոսի գումարից կգանձվի 100 դրամ: 1 ժամվա ավարտից 15 րոպե առաջ վարորդը ստանում է պատասխան SMS-հուշում, որ կայանելու ժամանակն ավարտվում է եւ որ եւս մեկ ժամ կանգառից օգտվելու համար պետք է կրկին SMS ուղարկել: Այսպես` մինչեւ 4-րդ ժամը ներառյալ: Անհրաժեշտության դեպքում, 5-րդ ժամվա համար վճարումը համակարգն ընդունում է որպես ամբողջ 1 օրվա տուրք: Եթե քաղաքացին մտադիր է մեքենան մեկ ամբողջ օր կայանել, պետք է SMS ուղարկի  5045 համարին: Այս դեպքում նրա հեռախոսից կգանձվի 500 դրամ: Եթե վարորդն իր հեռախոսից երկու անգամ 500-ական դրամ վճարի, սա կհաշվարկվի որպես մեկ շաբաթվա կայանելու իրավունք:

Վճարումներ վարորդները կարող են անել նաեւ ցանկացած տերմինալից, բանկերի մասնաճյուղերից, «Վիվա Սելի» սպասարկման կետերից:

Գագիկ Աղբալյան