Ի հիշատակ Հոկտեմբերի 27-ի ոճրագործության ծաղիկներ են խոնարհվել ԱԺ բակում, Պանթեոնում (լրացված)

Այսօր առավոտյան ՀՀ վարչապետ Հովիկ Աբրահամյանը, ՀՀ ԱԺ նախագահ Գալուստ Սահակյանը, բազմաթիվ պատգամավորներ՝ այդ թվում ՀԺԿ նախագահ Ստեփան Դեմիրճյանը, նրա ընտանիքի անդամները եւ 1999 թվականի հոկտեմբերի 27-ին Ազգային ժողովում գնդակահարված մյուս զոհերի հարազատներ հավաքվել էին ՀՀ Ազգային ժողովի բակում՝ հարգանքի տուրք մատուցելու եւ ծաղիկներ խոնարհելու ի հիշատակ 15 տարի առաջ այս օրը տեղի ունեցած սարսափելի ոճրագործության խորհրդարանի այգում տեղադրված հուշաքարի մոտ:

Արարողությունից հետո լրագրողները հավաքվածներին հարցեր ուղղելու հնարավորություն ունեցան: Խոսելով Հոկտեմբերի 27-ի բացահայտման մասին՝ Հովիկ Աբրահամյանը հայտարարեց, թե պատկան մարմիներն արել են ամեն ինչ՝ ոճրագործությունը բացահայտելու համար։ «Մենք ցավով ենք հիշում այս ոճրագործությունը, դատապարտում ենք, եւ վստահ եմ, որ պատկան մարմինների կողմից արվեց ամեն ինչ, որ այս ոճրագործությունը բացահայտվի, եւ այսօր մենք ունենք այն, ինչ ունենք»,- ասաց Աբրահամյանը: Լրագրողներից մեկը նկատեց, թե ընդդիմադիրները հայտարարում են, որ Հոկտեմբերի 27-ի իրական մեղավորները չեն բացահայտվում իշխանությունների քաղաքական կամքի բացակայության պատճառով: Ի պատասխան Հովիկ Աբրահամյանը ասաց, որ այն ժամանակ, երբ իշխանությունները աշխատում էին ոճրագործությունը բացահայտելու ուղղությամբ, պատկան մարմիններում կային նաեւ զոհվածների հարազատներից, ի դեմս՝ վարչապետի: Ուստի, ըստ վարչապետի՝ ինքը քաղաքական կամքի բացակայություն չի տեսնում: Հիշեցնենք, որ Հոկտեմբերի 27-ից հետո այդ ոճրագործությանը զոհ դարձած վարչապետ Վազգեն Սարգսյանի փոխարեն նույն պաշտոնում նշանակվեց նրա եղբայրը՝ Արամ Սարգսյանը:

Ոճրագործության զոհ դարձած ԱԺ նախկին նախագահ Կարեն Դեմիրճյանի որդին՝ Ստեփան Դեմիրճյանն էլ լրագրողների հետ զրույցում այսօր հայտարարեց, որ «իշխանություններն ամեն ինչ արեցին հոկտեմբերի 27-ի գործը կոծկելու համար»։ Դեմիրճյանն ասաց նաեւ, որ Հոկտեմբերի 27-ի գործով դատավարությունը չի փարատել հասարակության կասկածները: «Հոկտեմբերի 27-ի ծանր հետեւանքներն առ այսօր հաղթահարված չեն։  Համոզված եմ, որ բոլորովին այլ երկրում կապրեինք այսօր, եթե չլիներ Հոկտեմբերի 27-ը»,- ասաց ՀՀ ԱԺ պատգամավորը՝ այնուամենայնիվ հույս հայտնելով, որ ոճրագործությունը մի օր կբացահայտվի:

Հ.Գ. Քիչ առաջ տարածված տեղեկատվությամբ ՀՀ ԱԺ-ից տեղեկացնում են, որ ՀՀ ԱԺ նախագահ Գալուստ Սահակյանը, ՀՀ վարչապետ Հովիկ Աբրահամյանը, ՀՀ ԱԺ փոխնախագահներ Հերմինե Նաղդալյանը, Էդուարդ Շարմազանովը, պատգամավորները, զոհված պետական գործիչների հարազատները, ԱԺ աշխատակազմի ներկայացուցիչները եւ խորհրդարանում հավատարմագրված լրագրողները հարգանքի տուրք են մատուցել հոկտեմբերի 27-ի ոճրագործության զոհերի հիշատակին: Ներկաները ծաղիկներ են դրել ՀՀ ազգային հերոս Կարեն Դեմիրճյանի, ՀՀ ազգային հերոս Վազգեն Սարգսյանի, Յուրի Բախշյանի, Արմենակ Արմենակյանի, Ռուբեն Միրոյանի, Միքայել Քոթանյանի, Հենրիկ Աբրահամյանի, Լեոնարդ Պետրոսյանի հիշատակը հավերժացնող հուշակոթողի մոտ:

Լրագրողների հետ զրույցում ՀՀ ԱԺ նախագահ Գալուստ Սահակյանն ասել է, որ իր համար 1999 թվականին խորհրդարանում տեղի ունեցած ողբերգությունը երբեք անցյալ չի դառնում, հակառակը՝ այդ վիշտը մշտապես իր հետ է: ԱԺ նախագահը նշել է, որ ոճրագործության զոհերը մեծ գաղափարներ եւ նպատակներ ունեին, որոնց իրագործման հարցում պատասխանատու է համարում նաեւ իրեն:

ՀՀ ԱԺ նախագահ Գալուստ Սահակյանը եւ ՀՀ վարչապետ Հովիկ Աբրահամյանն այնուհետեւ եղել են Երեւանի Կոմիտասի անվան պանթեոնում եւ Եռաբլուր պանթեոնում, հարգել հոկտեմբերի 27-ի ոճրագործության զոհ դարձած ՀՀ ազգային հերոսներ Կարեն Դեմիրճյանի եւ Վազգեն Սարգսյանի հիշատակը:

Հ.Գ.2 Ավելի ուշ Եռաբլուր եւ Պանթեոն են այցելել եւ Հոկտեմբերի 27-ի զոհերից ԱԺ նախագահ Կարեն Դեմիրճյանի եւ վարչապետ Վազգեն Սարգսյանի հիշատակին հարգանքի տուրք մատուցել ՀԱԿ ներկայացուցիչները՝ ՀՀ առաջին նախագահ, ՀԱԿ առաջնորդ Լևոն Տեր-Պետրոսյանի գլխավորությամբ: