Սեֆիլյանն ու ընկերները ամուր են. Տեսանյութ

Երեկ ոստիկանության Երեւանի քաղաքային վարչության ձերբակալվածների պահման վայրի դիմաց տասնյակ քաղաքացիներ հավաք անցկացրեցին՝ պահանջելով ազատ արձակել նախօրեին ձերբակալված Ժիրայր Սեֆիլյանին, Հիմնադիր Խորհրդարանի անդամներ Գարեգին Չուգասզյանին, Վարուժան Ավետիսյանին, Պավել Մանուկյանին, Արամ Հակոբյանին եւ Գեւորգ Սաֆարյանին:

Քաղաքացիները նշում էին, որ ընդդիմադիրների ձերբակալությունները ապօրինի են եւ պատվիրված են Ս.Սարգսյանի կողմից: Մինչ հավաքի մեկնարկը՝ ՁՊՎ մտավ ԱԺ «Ժառանգություն» խմբակցության պատգամավոր Զարուհի Փոստանջյանը, ով այնտեղ մնաց շուրջ 40 րոպե: Դուրս գալով՝ նա ասաց, որ բացի Պ.Մանուկյանից, հանդիպել է մյուսների հետ, իսկ Մանուկյանի հետ չի հանդիպել, քանի որ ժամանակը սուղ էր. «Իրենց տրամադրությունը բարձր է, ասացին, որ իրենց գործողությունները մնում են ուժի մեջ, օրակարգը չի փոխվել: Ասացին, որ ամեն ինչ ուժի մեջ է, այդ թվում՝ ապրիլի 24-ի հանրահավաքը: Ձերբակալվածներից ոչ ոք առողջական խնդիրների մասին չմատնանշեց, ես էլ բռնության հետքեր չեմ տեսել»,- ասաց Փոստանջյանը՝ հավելելով, որ Սեֆիլյանն ու իր ընկերները ամուր են ու վճռական: Փոստանջյանն ասաց, որ ձերբակալությունները զուրկ են իրավական հիմքից ու ՀԽ անդամները ձերբակալվել են քաղաքական այլ հայացքներ ունենալու համար: Անդրադառնալով ՔԿ այն հայտարարությանը, որտեղ նշվում էր, թե ապրիլի 24-ի ցույցը բարոյական սահմաններից դուրս է, Փոստանջյանը հակադարձեց՝ ասելով, որ եթե խոսում են բարոյականությունից, պետք է գնան ու ռազմաբազայում ձերբակալեն Ավետիսյանների ընտանիքին գնդակահարած Վալերի Պերմյակովին:

Նախօրեին հարուցված քրգործով որպես վկա հարցաքննության է հրավիրվել նաեւ ՀԽ համակիր, «Կոռնիձոր» ջոկատի հրամանատար Արայիկ Խուդավերդյանը (Կոռնիձորցի Արոն), ով նույնպես մասնակցում էր ցույցին: Խուդավերդյանը մեզ տեղեկացրեց, որ իրեն ծանուցագիր են ուղարկել, հրավիրել ՔԿ ու մոտ 4 ժամ հարցեր տվել: «Ժամը հինգից իննը հարցաքննության եմ եղել: Հիմնականում ուզում էին իմանալ՝ ինչ եք մտածում դուք, ի՞նչ է լինելու ապրիլի 24-ին, ի՞նչ են ուզում անել Ժիրոն ու ժողովուրդը: Ես պատասխանեցի՝ եթե ժողովուրդը կանգնի, իր համար ազատություն կբերի, եթե չկանգնի՝ ռեժիմը կքերթի ժողովրդին: Իրենք անպայման ուզում էին իմանալ՝ ժողովրդի ինքնադրսեւորումը ինչպես է լինելու»,- ասաց Խուդավերդյանը՝ հավատացնելով, որ իշխանափոխության պրոցեսը չի կանգնելու: Նա պատմեց, որ ՔԿ-ում իրեն ներկայացրել են իր հեռախոսազրույցը մտերիմներից մեկի հետ. «Ոչ մի բան չնշանակող ձայնագրություն: Իմացել էի, որ սահմանին ունենք 2 զոհ, խոսակցության ժամանակ ասացի, որ մենք գոնե մի 10 հոգու գլխից պիտի խփենք, որ հակակշիռ լինի: Քննիչն էլ հարցնում էր՝ ո՞ւմ եք ուզում խփել եւ այլն: Ես ասացի, որ դա կապ չունի «100-ամյակն առանց ռեժիմի» շարժման հետ»: Պահանջի հավաքին մասնակցում էր նաեւ սիրված երգիչ Ռուբեն Հախվերդյանը, ով նույնպես պահանջում էր ազատ արձակել Սեֆիլյանին ու իր կողմնակիցներին: Անդրադառնալով ապրիլի 24-ի հանրահավաքին՝ նա ասաց. «Էսքան տարի սգում ենք, դրանից ի՞նչ է փոխվում, ես համաձայն եմ ակցիայի հետ, բայց թե կգա՞մ, թե ոչ՝ վստահ ասել չեմ կարող…»: Ակցիան ավարտվեց «Ժիրայր», «Ազատ, անկախ Հայաստան», «Ազատություն», «Մենք ենք տերը մեր երկրի» վանկարկումներով: ՀԽ անդամներից Վարդան Հակոբյանը հայտարարեց, որ հաջորդ հավաքը անցկացնելու են վաղը, ժամը 14:00-ին՝ ՔԿ դիմաց: Երեկ հաղորդագրություն էր տարածել նաեւ ձերբակալվածներին եւ կալանավորվածներին պահելու վայրերում դիտորդական առաքելություն իրականացնող հանրային վերահսկողության խումբը: Հաղորդագրությունում, մասնավորապես, ասված է. «Բոլոր 6 ձերբակալվածներն էլ ընդհանուր վերաբերմունքից եւ ՁՊՎ-ի պահման պայմաններից դժգոհություններ չհայտնեցին, բայց ՀԽ անդամ Պ.Մանուկյանը հացադուլ է հայտարարել: Դիտորդական խումբը պարզեց, որ արգելանք է դրված նրանց հարազատների հետ տեսակցության եւ հեռախոսազանգի վրա: Անհասկանալի հիմքով՝ վարույթն իրականացնող մարմնի կողմից արգելանք է դրվել կապն արտաքին աշխարհի հետ իրավունքից օգտվելու վրա: Արդյունքում՝ նշված արգելանքով ձերբակալվածները իրավունք չունեն օգտվելու ռադիոընդունիչից եւ տպագիր մամուլից»: