Հեռացել եմ ՀՅԴ-ից. ասում է Պողոս Պողոսյանի եղբայր Անդրանիկ Պողոսյանը

2001 թվականի սեպտեմբերի 25-ի լույս 26-ի գիշերը Ռոբերտ Քոչարյանի թիկնապահների կողմից «Առագաստ» սրճարանում դաժանաբար սպանված ՀՅԴ անդամ Պողոս Պողոսյանի եղբորը՝ Անդրանիկին, հանդիպեցինք Աջափնյակի զբաղվածության կենտրոնի տարածքային բաժնում:

Պողոսյանը 1998 թվականից այս կառույցի տնօրենն է եւ պատմում է, որ աշխատանքի է ընդունվել Ռոբերտ Քոչարյանի նախագահ դառնալուց հետո, ՀՅԴ-ի միջնորդությամբ՝ որպես ՀՅԴ անդամ: Սակայն այսօր Անդրանիկ Պողոսյանն իրեն այլեւս ՀՅԴ անդամ չի համարում: Հենց այս մասին է պարոն Պողոսյանի հետ մեր զրույցը:

- ՀՅԴ անդամ եմ դարձել 1991 թվականին, կասեցման տարիներին եղել եմ նաեւ կոմիտեի անդամ՝ ամեն ինչ անելով կուսակցությունն ու նրա կառույցները պաշտպանելու համար: Սակայն եղբորս սպանությունը, դրան հետեւած չակերտավոր դատավարությունը ցույց տվեցին, որ ՀՅԴ-ն հեռացել է իր ծրագրից ու գաղափարներից, եւ 2002 թվականի հոկտեմբերին ես ՀՅԴ-ից հեռանալու դիմում եմ գրել, որի պատասխանը մինչեւ այսօր չունեմ: Այսօր ինձ այլեւս ՀՅԴ անդամ չեմ համարում:

- Իսկ ի՞նչ գաղափարներից է հեռացել ՀՅԴ-ն:

- ՀՅԴ-ի հիմնական նպատակը հայ մարդուն պաշտպանելն է՝ անկախ նրա քաղաքական պատկանելությունից: Բայց, եթե նա իր կուսակցի հիշատակը չպաշտպանեց, իմ մնալը այնտեղ լիովին անիմաստ էր: Մանավանդ որ, նոյեմբերին պետք է տեղի ունենար ՀՅԴ Գերագույն ժողովը, որը պաշտպանելու էր Ռոբերտ Քոչարյանին: Իսկ ինչպես ես կարող էի լինել մի կուսակցության անդամ, որը պաշտպանում է Ռոբերտ Քոչարյանին, որի թիկնապահները գազանաբար սպանել են եղբորս: Այժմ արդեն համոզված եմ, որ Ռոբերտ Քոչարյանը թույլ չտվեց, որ Պողոս Պողոսյանի գործով դատավարությունը ընթանա արդար հունով:

- Ըստ Ձեզ, ինչպե՞ս են քվեարկելու ՀՅԴ-ի մյուս շարքային անդամները:

- Ունեմ ՀՅԴ անդամ բազմաթիվ մտերիմներ, որոնք ինձ պատմում են, որ ընկերային հավաքների ժամանակ ՀՅԴ անդամները հավաքներին ներկա ԳՄ ներկայացուցիչներին տեղեկացրել են, որ իրենք պատրաստ են լինել վստահված անձ, հանձնաժողովի անդամ, սակայն Քոչարյանի օգտին չեն քվեարկելու: Այնպես որ, ՀՅԴ-ի միայն ղեկավար հատվածն է ձայն տալու գործող նախագահին, այն էլ՝ պաշտոնի, բիզնեսի եւ այլ թելերով նրա հետ կապված լինելու պատճառով: ՀՅԴ ղեկավարության նվիրվածությունը Քոչարյանին այլ բացատրություն էլ ունի. կուսակցության ղեկավարության մեծ մասի վրա քրեական գործ կա, եւ նրանք ազատության մեջ են ոչ թե դատարանի վճռով, այլ Քոչարյանի բարի կամքով: Պատկերացրեք նրանք որտեղ կհայտնվեն, եթե Քոչարյանը նախագահ չդառնա:

- Դուք ասում եք, որ աշխատանքի եք ընդունվել ՀՅԴ-ի միջնորդությամբ: Այժմ քննադատելով ՀՅԴ-ին եւ Քոչարյանին՝ չե՞ք վախենում,որ կարող եք կորցնել ձեր աշխատանքը:

- Իսկ ինչ է, Հայաստանում օրենք կա՞, որ աշխատելու իրավունք ունեն միայն դաշնակցականները կամ Քոչարյանին պաշտպանողները: Ես ՀՀ քաղաքացի եմ եւ ամբողջությամբ կատարում եմ իմ աշխատանքային պարտականությունները:

- Դուք ծագումով ջավախքցի եք, իսկ ջավախքահայերին միավորող «Հզոր հայրենիք» կուսակցությունը եւս հայտարարել է Քոչարյանին պաշտպանելու մասին: Ինչպե՞ս եք վերաբերվում այդ որոշմանը:

- Եթե ՀՅԴ անդամների 70-80 տոկոսը ձայն չի տալու Քոչարյանին, ապա ջավախքահայերի՝ 90-95%-ը: «Հզոր հայրենիքը» եւ դրա նման այլ կառույցների ստեղծման պատմությունը հայտնի է բոլորին, դրանք ստեղծվեցին մեր ազգը ջավախքցիների, արցախցիների, ապարանցիների եւ գյումրեցիների պառակտելու համար: Իսկ այդ նպատակը իրականացնողները մի քանի փոքր պաշտոնյաներ են, որոնց նպատակը՝ ծառայելով այդ պաշտոնները պաշտպանելն է:

- Իսկ ո՞ւմ օգտին եք քվեարկելու փետրվարի 19-ին:

- Հավատացած եմ, որ Ռ. Քոչարյանը հաղթելու ոչ մի հնարավորություն չունի, ընդդիմադիր չորս թեկնածուներին էլ՝ Արտաշես Գեղամյան, Ստեփան Դեմիրճյան, Արամ Կարապետյան, Վազգեն Մանուկյան, շատ հավանում եմ: Անձամբ ես քվեարկելու եմ  Գեղամյանի օգտին, քանի որ նա հեռուստատեսությամբ հայտարարում է, որ բացահայտելու է նրանց արած բոլոր հանցագործությունները, իսկ ինձ անձամբ խոստացել է պատժել Պողոսին սպանողներին եւ նրանց հովանավորողներին:

Ավետիս Բաբաջանյան

Տպագրվել է «Հայկական Ժամանակ» օրաթերթի՝ 2003 թվականի փետրվարի 12-ի համարում