Ես շորթում չեմ կատարել. Տիգրան Առաքելյան

Շուրջ 8 ամիս կալանքի տակ գտնվելուց հետո մայիսի 27-ին ազատ է արձակվել ակտիվիստ Տիգրան Առաքելյանը:

Տիգրան Առաքելյանը ձերբակալվել էր հուլիսի 30-ին, ապա կալանավորվել: Նրան մեղադրանք է առաջադրվել ՀՀ քրեական օրենսգրքի 182-րդ հոդվածի հատկանիշներով (շորթում): Այսօր Տիգրան Առաքելյանը պատասխանել է սույն քրեական գործի վերաբերյալ մեր մի քանի հարցերին:

-Տիգրան, ձեզ առաջադրված շորթման մեղադրանքը ընդունո՞ւմ եք, թե ոչ, այն ձեզ համար հասկանալի՞ է:

-Ես տեւական ժամանակ չէի բացում ՀՀ քրեական օրենսգիրքը՝ տեսնելու, թե շորթման հոդվածը որ հոդվածն է: Վեց ամիս հետո եմ իմացել, որ սույն հոդվածը, որով ինձ մեղադրանք են առաջադրել նախատեսում է 6-10 տարի ազատազրկում: Ինձ համար դա եղել է երկորդական, որովհետեւ ես այն չեմ ընդունել եւ չեմ ընդունում, նման մեղադրանքը չի կարող ինձ հետ որեւէ առնչություն ունենալ: Դրա համար շատ մեծ պատճառներ կան, ես գիտեմ, որ ես Քրեական օրենսգրքի որեւէ հոդված չեմ խախտել այդ թվում եւ շորթման, դրա համար ես սրան լուրջ չեմ վերաբերվում: Ես շորթում չեմ կատարել:

-Մոտ 10 ամիս ձեզնից որեւէ տեղեկություն չկար, դուք հրաժարվում էիք պաշտպանից: Ո՞րն էր պատճառը:

-Նախ սկսեմ նրանից, որ նախաքննությունը կարող էր այնպես ընթանալ, որ այս հարցը գոնե չառաջանար: Ութ ամիս զանգերից, տեսակցություններից զրկելու պատճառը որն էր, ես չգիտեմ, այդ հարցը պետք է ԱԱԾ-ից հարցնել: Իսկ իմ իրավունքների մասին ես լավ գիտեի, պաշտպանի կարիք էլ չունեի, որովհետեւ պաշտպանության խնդիր չունեի: Ինձ ամիսներով չեն հարցաքննել, իրենք ինչ-որ բան էին փնտրում, բայց եթե փնտրում էին ինչ ցուցմունք տայի, ինչի մասին խոսեի, ընդհանրապես դա ինձ հետ կապ չունի: Ես անտեղյակ, կողմնակի անձ եմ. բացարձակ չգիտեմ ինչի մասին է խոսքը:

-Բացի ձեզնից այս քրեական գործի շրջանակներում այլ մեղադրյալներ կա՞ն:

-Ես Մոսկվայում բիզնեսով էի զբաղվում եւ այնտեղի իմ գործընկեր եւս կալանավորվեց: Արդեն ինքն էլ է ազատ արձակվել:

-Կրկին շորթման մեղադրանքո՞վ:

-Չեմ կարող ասել, որովհետեւ ոչ առերես հարցաքննություններ են մեր միջեւ կազմակերպել, ոչ էլ, ոչ մի տեղեկատվության չեմ տիրապետում:

-Տիգրան, ձեզ կալանավորելուց հետո մամուլում տեղեկություններ հայտնվեցին, որ դուք սեքսուալ բնույթի տեսանյութերով շանտաժի եք ենթարկել ՀՀԿ-ական պատգամավորների, մասնավորապես Հովհաննես Սահակյանին եւ մեծ գումար պահանջել սկայպով ինչ-որ կանանց հրահրմամբ արված տեսաձայնագրության դիմաց։ Սրա մասին ի՞նչ կասեք:

-Եթե ես որեւէ տեսանյութի մասին գաղափար անգամ չունեմ, ինչպե՞ս կարող եմ ինչ-որ տեսանյութով որեւէ մեկին շանտաժ անել:

-Իրենց հետ շփում չե՞ք ունեցել:

-Բացարձակ:

-Իսկ տեղյակ եք պատգամավորները հարցաքննվե՞լ են:

-Նման տեղեկության չեմ տիրապետում:

-Ձեր եւ նրանց միջեւ առերեսում տեղի ունեցե՞լ է:

-Հիմա իմ խափանման  միջոց կալանքը ստորագրությամբ փոխել են եւ ես ստորագրել եմ նախաքննական գաղտնիք չհրապարակել: Մի փորք սպասենք, նախաքննությունը կավարտվի, բոլորիս պարզ կլինի, թե ով է հարցաքննվել, ով է սուտ ասել:

-Նպատակը ո՞րն էր ձեզ 10 ամիս կալանքի տակ պահելու, քաղաքական դրդապատճառներ տեսնո՞ւմ եք:

-Հիմա ես դրդապատճառը փնտրում եմ, ուզում եմ հասկանալ որն էր. չկա դրդապատճառ, չկա հանցագործություն: Ես իմ մասով կարող եմ ասել, որ ես որեւէ քրեական օրենսգրքի հոդված չեմ խախտել: Բայց, թե ինչն է եղել իրական պատճառը, դա ինձ թվում է ինչ-որ պահի բոլորիս հասկանալի կլինի, ամեն դեպքում մենք գիտենք՝ որտեղ ենք ապրում եւ ինչ կարող է լինել: Միգուցե, ինչ-որ օպերատիվ կեղծ տեղեկատվություն կար, բայց ես ոչ մի տեղեկություն չունեմ: Կարծում եմ, որ ինչ-որ մի բան փոխվել է, գործի ինչ-որ մի հանգամանք փոխվել է, որ իմ խափանման միջոցը փոխել են:

-Այս ընթացքում ձեր նկատմամբ բռնություն գործադրվե՞լ է:

-Ոչ, բռնություն չի եղել: Ես պահվել եմ «Երեւան-Կենտրոն» ՔԿՀ-ում եւ կարող եմ ասել, որ երեւի այն մեր երկրի ամենալավ աշխատող հիմնարկներից մեկն է: Ես չգիտեմ ներսում լավ օրենքներ են գործում, թե վատ օրենքներ են գործում, բայց գործում է  ու ոչ ոք դա չի խախտում, նույնիսկ սնունդը չես կարող համեմատել օրինակ «Նուբարաշեն» ՔԿՀ-ի հետ:

-Տիգրան, ձեզ կալանավորելուց հետո ՀԱԿ կուսակցությունից որեւէ մեկը տեսկացության եկա՞վ:

-Իմ տեսակցությունների վրա արգելանք էր դրված:

-Բայց պատգամավորներին թուլատրում են տեսակցել:

-Ես չգիտեմ, միգուցե իրենց էլ չեն թողել, համենայնդպես ինձ մոտ ոչ մեկ չի եկել, ես չեմ հետաքրքրվել եկել են, թե՝ ոչ: Ինձ մոտ առաջին անգամ եկել է Մարդու իրավունքների պաշտպանի ներկայացուցիչը:

-Իսկ ազատ արձակվելուց հետո էլ չեք տեսե՞լ նրանց:

-Ազատ արձակվելուց հետո մեկ-երկու հոգու եմ տեսել:

-Ձեր կալանավորումից հետո Գագիկ Ջհանգիրյանը լրագրողների հետ զրույցում ասել էր, որ դուք առնվազն 2 տարի է՝ իրենց հետ որեւէ կապ չունեք եւ իրենք որեւէ տեղեկություն չունեն ձեզնից: Սա ինչպե՞ս կմեկնաբանեք:

-Դե, դա բոլորին էլ տեսանելի էր, ես նախ Հայաստանում չէի, իմ անձնական գործերով էի զբաղվում: Քաղաքականության մեջ պետք է քաղաքականությամբ զբաղվես, իսկ ես չէի զբաղվում: ՀԱԿ-ի հետ ես որեւէ հակասություն չունեմ, քաղաքական առումով իմ հայացքների մեջ որեւէ բան չի փոխվել, ես մտածում եմ այն, ինչ-որ մտածում էի առաջ:

-Այսինքն՝ դուք շարունակո՞ւմ եք կիսել իրենց գաղափարները:

-Ես շարունակում եմ կիսել բոլոր ընդդիմադիր հայացքներ ունեցող խմբերի, կուսակցությունների գաղափարները:

-Եթե գործը հասնի դատարան, որեւէ ակնկալիքներ ունե՞ք դատարանից:

-Երբ գործի հանգամանքներին ծանոթանամ, կհասկանամ, դրդապատճառը հասկանամ այդ ժամանակ միգուցե:

-Զրույցի սկզբում նշեցիք, որ Մոսկվայում մինչ կալանավորվելը բիզնեսով էիք զբաղվում, ի՞նչ բիզնես էր:

-Դեկորատիվ մոմերի արտադրությամբ էինք զբաղվում:

ՀՀ ազգային անվտանգության ծառայությունից հետաքրքրվեցինք, թե ինչպես ստացվեց, որ 10 ամիս անց որոշեցին Տիգրան Առաքելյանի խափանման միջոց կալանավորումը փոխել ստորագրությամբ: Ի պատասխան մեր հարցին ԱԱԾ լրատվականից հայտնեցին, որ Առաքելյանի խափանման միջոցը վերացվել է դրա անհրաժեշտությունը վերանալու կապակցությամբ: Սույն գործով նախաքննությունը շարունակվում է: