Կամ խմբագիրը պատգամավորին կտանի ստի դետեկտորի մոտ, կամ էլ պատգամավորը նրան՝ բանտ

Shame.am կայքի խմբագիր Արտյոմ Խաչատրյանը պատրաստվում է ուրբաթ օրը մամուլի ասուլիս հրավիրել եւ պատգամավոր Տիգրան Ուրիխանյանի մասին, իր իսկ խոսքերով, հետաքրքիր բաներ պատմել:

Խաչատրյանը հայտարարում է, որ պատգամավորը հոկտեմբերի 5-ին Թբիլիսյան խճուղի փողոցում գտնվող Դալար ռեստորանային համալիրում իրեն ծեծել է տվել: Նախ, այդ օրը կեսօրից հետո Տ. Ուրիխանյանի «Ալյանս» կուսակցության Գյումրու ավագանու ցուցակի երրորդ հորիզոնականը զբաղեցնող Կարեն Հակոբյանը, որը Խաչատրյանի վաղեմի ծանոթն է, վերջինիս պատմելով, իրեն ռեստորան է հրավիրել: Որոշ ժամանակ հետո Խաչատրյանի ընկերներից մեկը զանգել է իրեն ու հայտնել, որ Ուրիխանյանը Ազգային ժողովում իր մասին ելույթ է ունեցել:

Հիշեցնենք, որ պատգամավորը կառավարության հետ հարցուպատասխանի ժամանակ հարց էր հնչեցրել, թե ինչպես է հնարավոր Խաչատրյանի «Քաղաքական հետազոտությունների կենտրոն» ընկերությանը պետբյուջեից 21 մլն դրամի արտոնյալ գյուղատնտեսական վարկ տալ: Կարճ ժամանակ անց, ըստ Խաչատրյանի պնդումների, Ուրիխանյանն ինքն է 10-15 հոգու հետ ժամանել այդ ռեստորան, որտեղ իրեն դաժան ծեծի են ենթարկել: «Ինքը դոն Կառլեոնեի նման նստել՝ հեռվից հետեւում էր, իսկ մյուսները հարվածում էին ինձ»,- երեկ մեր զրույցում պատմում էր Խաչատրյանը:

Ըստ նրա, Հակոբյանը նախապես իմացել է, թե ինչ է տեղի ունենալու այդ ռեստորանում եւ իրեն խաբելով է այնտեղ տարել: Ավելին, Խաչատրյանը հավելում է, որ խմիչքը սովորականից շուտ է ազդել իր վրա, եւ կասկածում է, որ ուտելիքի մեջ ինչ-որ նյութ է խառնած եղել: Դա, հավանաբար, կպարզի փորձաքննությունը: Իսկ ծեծի արդյունքում ջարդվել է նրա քիթը, գլուխը վնասվել է եւ մարմնի տարբեր հատվածների սալջարդ է ստացել: Խաչատրյանը պատրաստվում է բժշկական փորձաքննության անցնել, պարզելու, թե առողջական էլ ինչ վնասվածքներ է ստացել, որոնք արտաքուստ նկատելի չեն:

Տիգրան Ուրիխանյանը հերքում է, որ ինքը ծեծել է տվել Արտյոմ Խաչատրյանին եւ ինքն է իրավապահ մարմիններին կոչ անում սուտ մատնության հատկանիշներով գործ հարուցել ու պատասխանատվության ենթարկել իրեն զրպարտողին: Մենք փորձեցինք պատգամավորից հավելյալ մեկնաբանություն ստանալ, բայց նա հրաժարվեց՝ հավելելով, թե իր՝ երեկ տարածած հայտարարության տեքստում ամեն ինչ ասել է: «Իսկ այն մեր հայրենակիցներին, որոնք կարող էին հավատացած լինել Ուրիխանյանի կողմից անիրավաչափ գործողությունների իրականացմանն ու տարբեր ժամանակներում իր մասին տարածվող ստերին` առաջարկում ենք հավատալ նաեւ այն «լուրին», որ Ուրիխանյանը վաղաժամ մահացել է»,- գրել էր նա այդ տեքստում:

Ոստիկանությունից մեզ փոխանցեցին, թե նյութեր են նախապատրաստվում հաղորդման հիման վրա: Ա. Խաչատրյանը մեզ հետ զրույցում փոխանցեց, թե Կ. Հակոբյանը երեկ արդեն հրավիրվել է ոստիկանություն: Իսկ ընթացող գործողությունների արդյունքում ոստիկանության Քանաքեռ-Զեյթունի հետաքննչական բաժնի աշխատակիցներից մեկի հետ ինքն արդեն եղել է Դալար ռեստորանում: Փորձել են տեղադրված տեսախցիկների արձանագրած տեսանյութը ստանալ, բայց ասել են, թե դրանք չեն աշխատել: «Բայց կողքերն այլ օբյեկտներ էլ կան, որոնք տեսախցիկներ ունեն: Ուրիխանյանն ու իր հետ եկած այդ մի խումբ տղաներն առնվազն երեք մեքենաներով են եկել: Իսկ դրանք չեն կարող աննկատ մնալ գոնե հարակից օբյեկտների տեսախցիկներից: Այնպես որ, եթե ցանկանան, կարող են այդ նյութերը վերցնեն»,- ասում է Խաչատրյանը:

Ա. Խաչատրյանին պատկանող Shame.am կայքը քննադատական եւ հայհոյախառն, վիրավորական արտահայտություններով հոդվածներ է հրապարակում ՀՀ գրեթե բոլոր պաշտոնյաների մասին: Արդյոք նրա համար սպասելի՞ չէր, որ մի օր կհայտնվի հենց այդ վիճակում: «Իմ մտքով ամեն ինչ անցել է, բայց ոչ այսքան ստոր: Այլ մարդկանց հետ խնդիր ունեցել եմ, բայց հարթվել է: Ես պահանջում եմ, որ նա՝ որպես առեւանգող, մարդուն մարմնական ծանր վնասվածք պատճառող եւ դրանից հրաժարվող, բանտ նստի»,- ասում է Ա. Խաչատրյանը:

Ուրիխանյանն իր մասին հրապարակումների վերաբերյալ արդեն դատական հայց ունի Shame.am-ի դեմ եւ դրանցից յուրաքանչյուրի համար մեկական մլն դրամ փոխհատուցում է պահանջում: «Մի օր Հովիկ Աբրահամյանը ինձ խնդրեց, թե մոռացի Ուրիխանյանին, ինչ ես ուզում նրանից: Ես համաձայնեցի՝ ասելով, այդ դեպքում թող նա էլ իր կողմից ետ վերցնի այդ դատական հայցերը: Հ. Աբրահամյանն ասաց, լավ, որ նա ետ վերցրեց, դու էլ մոռացի նրա մասին: Բայց նա այդպես էլ ետ չվերցրեց այդ հայցերը»,- պատմում էր Խաչատրյանը:

Իսկ հիմա, երբ ինքը պնդում է, թե Տ. Ուրիխանյանն իրեն ծեծել է տվել, իսկ պատգամավորը հրաժարվում է՝ հայտարարելով, որ իրեն զրպարտում են, Ա. Խաչատրյանը ՀՀ իրավապահներին իրենց սուտը կամ ճիշտը պարզելու մի միջոց է առաջարկում՝ թող երկուսին էլ ստի դետեկտոր անցկացնեն ու պարզեն, թե իրենցից ով է խաբում: