Եթե տարածքների վերադարձի խնդիր կա, պետք է նաեւ ԼՂ կարգավիճակի քննարկում լինի. Ջ. Ուորլիք

ԵԱՀԿ ՄԽ ամերիկացի համանախագահ Ջեյմս Ուորլիքի երազանքներից մեկն է այն է, որ հայերն ու ադրբեջանցիներն ապրեն իրար կողքի՝ առանց հակամարտության:

Այս մասին Երեւանում՝ լրագրողների հետ հանդիպմանն ասաց դեսպանը.

«Կարծում եմ՝ այն ոչ միայն իմ, այլ նաեւ բոլոր հայերի ու ադրբեջանցիների երազանքն է, որ կարողանան ժողովուրդները միմյանց հետ, կողք կողքի ապրել»,-ասաց նա:

Հարցին, թե ինչպե՞ս է պատկերացնում իրար կողքի խաղաղ ապրելը հակամարտության առկայության պայմաններում, դեսպանը հիշեցրեց նախկին ժամանակները.

«Եղել են ժամանակներ, երբ հայերն ու ադրբեջանցիները կողք կողքի ապրել են, երիտասարդ հայերի եւ ադրբեջանցիների սերունդը դա չեն տեսել: Մեր ջանքերը որպես միջնորդներ, ուղղված է տեւական խաղաղության ամրապնդմանը, ամենն ուղղված է դրան: Տարածաշրջանի ժողովուրդը արժանի է, որ ապրի խաղաղության մեջ, ու չլինեն հակամարտություններ: Մենք ուզում ենք կրկնապատկել մեր ջանքերը, հասնել այնպիսի լուծման, որն ընդունելի կլինի բոլոր կողմերի համար: Հավատացած եմ՝ այդ օրը կգա, եւ մենք կտեսնենք հայերին ու ադբեջանցիներին, ովքեր կողք կողքի ապրում են»,- ասաց Ջեյմս Ուորլիքը:

Ինչ վերաբերում է ապրիլին ղարաբաղա-ադրբեջանական շփման գծում էսկալացիային եւ ՄԽ համանախագահների կեցվածքին՝ մասնավորապես, ոչ հասցեական քննադատություններին, դեսպանը պատասխանեց.

«Ապրիլի սկզբներին բոլորս ականատես եղանք իրական ողբերգության, որը շատ կյանքեր խլեց. ի՞նչ պետք  մենք հասկանանք սրանից: Այն ցույց է տալիս, որ բանակցությունը մեծ կարեւորություն ունի: Ինչպես նշեցի խոսքիս սկզբում՝ ապրիլյան ողբերգությունից հետո շփման գծում համեմատաբար հանգիստ իրավիճակ է, բայց նույնիսկ մեկ զոհը չափից շատ է: Սակայն իրավիճակն, ընդհանուր առմամբ, հանգիստ է եղել եւ դա հիմք է հանդիսանում բանակցությունների համար, որոնց փորձում ենք ձեռնամուխ լինել: Կարծում ենք՝ հարգանքը հրադադարի հանդեպ եւ այս անդորրը կշարունակվեն»:

Ուորլիքը նաեւ հավելեց, որ կողմերը եւս չպետք է մեղադրեն միմյանց:

Լրագրողներից մեկի դիտարկմանը, որ ԱՄՆ պետքարտուղար Ջոն Քերին ժամանակին խոսում էր այն մասին, որ կողմերի մոտ չկա կամք հակամարտության լուծման, իսկապես դա այդպե՞ս է, դեսպանը պատասխանեց, որ պետքարտուղարը մտահոգ է ԼՂ խնդրով.

«Անցած տարի Վիեննայում նա էր, ով հրավիրեց երկու նախագահներին, եւ քննարկումն արդյունավետ էր արտգործնախարար Լավրովի եւ Ֆրանսիայի արտգործնախարարի հետ: Մենք՝ ԱՄՆ-ի հետ միասին պատրաստ ենք առաջ շարժվել բանակցային ճանապարհով եւ մենք հավատացած ենք, որ կա հնարավորություն, եւ ես Բաքվում ասացի՝ եթե ոչ հիմա, ապա՝ ե՞րբ: Կան գաղափարներ, կան առաջարկներ, որոնք այժմ սեղանին են, եւ մենք կարող ենք դրանց շուրջ աշխատել: Ի՞նչ եք մենք ուզում, մենք ուզում ենք քաղաքական կամք տեսնել նախագահների կողմից, որպեսզի հանձնառություն ստացվեն առաջ շարժվել այս բանակցություններում»,-մանրամասնեց Ջեյմս Ուորլիքը:

Ըստ ադրբեջանական լրատվամիջոցի՝ Ուորլիքը հայտարարել էր, որ պետք է խնդրի կարգավորման համար «օկուպացված տարածքները վերադարձվեն»: Հարցին, թե որքանով է ճիշտ մեջբերել դեսպանի խոսքը լրատվամիջոցը, Ջեյմս Ուորլիքը, ըստ էության, ո՛չ հերքեց, ո՛չ էլ հաստատեց, 

«Մենք խոսում ենք համապարփակ լուծման մասին, ի՞նչ նկատի ունենք, դրանք այն բոլոր տարրերն են, որոնք պետք է սեղանին լինեն ու քննարկվեն: Մենք չենք կարող ընտրել մի խնդիր եւ այն առանձնացնել համատեքստից դուրս: Եթե տարածքների վերադարձի մասին խնդիր կա, ապա պետք է նաեւ քննարկում լինի ԼՂ կարգավիճակի մասին, ինչպես նաեւ այլ հարցերի: Մենք պետք է խոսենք փախստականների վերադարձի մասին, ներքին տեղահանվածների, միջազգային խաղաղապահ ուժերի կազմի, մանդատի մասին: Սրանք այն տարրերն են, որոնք համապարփակ լուծման բաղադրիչներն են, կողմերից մեկը չի կարող վերցնել միայն այն տարրը, որն իրենց համար նպաստավոր կամ ձեռնտու է»: