Պոլսի հայոց պատրիարքարանը նոր պատրիարք ընտրելու հարցով դիմել է Թուրքիայի իշխանություններին

Պոլսի հայոց պատրիարքարանում պատրիարքական փոխանորդ, արքեպիսկոպոս Արամ Աթեշյանի գլխավորությամբ երեկ երեկոյան հրավիրվել է հոգեւոր խորհրդի ժողով: Ժողովի ժամանակ քննարկվել է պատրիարք Մեսրոպ Մութաֆյանի առողջական խնդրի հետ կապված պատրիարքարանում ստեղծված իրավիճակը։ Ժողովին մասնակից հոգեւորականները համակարծիք են եղել, որ պատրիարք Մեսրոպ Մութաֆյանը 2008 թվականից փաստացի որպես պատրիարք հոգեւոր ծառայություն չի կարողանում մատուցել եւ պետք է հայկական եկեղեցու կանոններին համապատասխան ստեղծված իրավիճակից դուրս գալու որոշում կայացվի:

Ձայների մեծամասնությամբ պատրիարք Մեսրոպ Մութաֆյանը որպես «հանգստյան կոչված պատրիարք» է ճանաչվել: Ժողովականները նշել են, որ եկեղեցական կանոնների ու ավանդույթների համաձայն՝ 7 տարվա բացակայությունը բավարար է հոգեւորականին անգործունակ ճանաչելու համար: Իսկ այն փաստը, որ Մեսրոպ Մութաֆյանը արդեն 8 տարի է չի մասնակցում եկեղեցական գործերին, ըստ ժողովականների, ինքնաբերաբար հիմք է ծառայում նոր ընտրություններ անցկացնելու համար: Բացի այդ, կից ներկայացվել է 2015 թվականին դատաբժշկական հանձնախմբի տեղեկանքը, որում արձանագրվում է պատրիարքի անգործունակ լինելու փաստը: Դա հիմք ընդունելով՝ ժողովում որոշում է կայացվել նոր պատրիարքի ընտրություն անցկացնելու համար համապատասխան դիմում ներկայացնել Թուրքիայի պատկան մարմիններին։

Պոլսի հայոց պատրիարք Մեսրոպ Մութաֆյանը անգործունակ է 2008 թվականից, երբ նրա մոտ ախտորոշվեց դիմենցիա հիվանդությունը: Այն ժամանակվանից հայ համայնքը դիմել է իշխանություններին, որպեսզի նոր պատրիարք ընտրելու թույլտվություն տրվի: Այնուամնեայնիվ, Թուրքիայի իշխանությունները նոր պատրիարք ընտրելու իրավունք չեն տվել՝ պատճառաբանելով, թե եկեղեցական կանոնադրության համաձայն, պատրիարքը ընտրվում է ցմահ եւ որ նոր պատրիարք կարող է ընտրվել միայն նրա մահից հետո: Դրա փոխարեն իշխանություններն առաջարկել են ընտրել պատրիարքի փոխանորդ: Դրա հիման վրա պատրիարքի փոխանորդ է ընտրվել արքեպիսկոպոս Արամ Աթեշյանը:

Վերջինս, ընդհանուր առմամբ, բացասաբար է ընդունվում Պոլսի հայ համայնքի կողմից եւ շատերը նրան «Էրդողանի մարդն են» համարում: Հայտնի հանգամանքների բերումով Պոլսի հայ պատրիարքները ստիպված են եղել լոյալ գտնվել Թուրքիայի իշխանությունների հանդեպ, սակայն, ի տարբերություն իր նախորդների, Աթեշյանը աչքի է ընկնում իր ընդգծված թրքահաճո կեցվածքով ու հայտարարություններով:Այդ պատճառով Պոլսի հայ համայնքում անախորժ մթնոլորտ է տիրում եւ այն փաստացի պառակտված է, ինչին էլ ձգտում են Անկարայում:

Համայն հայության շրջանում, հատկապես, մեծ զայրույթ է առաջացրել հունիսին Facebook-ում Թուրքիայի նախագահ Ռեջեփ Թայիփ Էրդողանին Աթեշյանի հասցեագրած բաց նամակը, որում նա նշել է, թե հունիսի 2-ին Գերմանայի Բունդեսթագի կողմից Հայոց ցեղասպանության ճանաչումը հայ ազգի մոտ խորը վիշտ է առաջացրել: «Հարգելի նախագահ,Առաջին համաշխարհային պատերազմի ողբերգական շրջանում տեղի ունեցած իրադարձությունների մասին Գերմանիայի խորհրդարանի ընդունած որոշումը մեր ժողովրդի շրջանում խորը վիշտ է առաջացրել։ Սրտից բխող եւ անկեղծ զգացմունքներով Ձերդ գերազանցությանը տեղեկացնում ենք, որ Թուրքիայի հայկական համայնքը կիսում է այս վիշտը»,-գրել էր Աթեշյանը։ Նրա այս քայլից հետո թե՛ Հայաստանում եւ թե՛ Սփյուռքում կոչեր էին հնչում, ընդհանրապես, կարգալույծ անել Աթեշյանին:

Այսպիսով, առաջիկայում Թուրքիայի իշխանությունները պետք է պատասխանեն Պոլսի հայոց պատրիարքարանի նամակին: Չի բացառում, որ դիմումին կրկին բացասական պատասխան տրվի այն պատճառաբանությամբ, թե պատրիարքը ցմահ է ընտրվել: Թեպետ չի կարելի նաեւ բացառել, որ կառավարությունը հաշվի առնի պատրիարքարանի ներկայացրած հիմնավորումները եւ նոր ընտրություններ նշանակի:

Տվյալ դեպքում, բավական մեծ է հավանականությունը, որ Պոլսի հայոց պատրիարքի պաշտոնում Մեսրոպ Մութաֆյանին արդեն դե յուրե փոխարինի համայնքի կողմից այդքան չընդունված Արամ Աթեշյանը: Չնայած, որ Պոլսի պատրիարքարանը, ըստ կանոնադրության, ուղղակիորեն ենթակա է Մայր Աթոռ Սուրբ Էջմիածնին, սակայն փաստացի ենթարկվում է Թուրքիայի իշխանությունների ցուցումներին: