«Սասնա ծռեր»-ի համար ԱՄՆ-ում նախատեսված դրամահավաքը տապալվում է

Armtimes.com-ը նոյեմբերի 18-ին անդրադարձել էր «Սասնա ծռեր» հիմնադրամի շուրջ ստեղծված իրավիճակին եւ գրել էր, որ հիմնադրամում կան տարաձայնություններ, հիմնադրամից դուրս են են եկել Ժիրայր Սեֆիլյանի կինը՝ Նանոր Սեֆիլյանը եւ Արմենակ Կյուրեղյանը:

Այս օրերին ԱՄՆ-ում ի աջակցություն «Սասնա ծռեր» խմբավորման բողոքի ակցիաներ կազմակերպած անձանցից Հերմոն Միքայելյանը հրապարակավ հայտարարեց, որ առաջին իսկ օրերից, ինքը մասնակցել է այդ հավաքներին: «Երկու ամիս առաջ ֆեյսբուքի էջերից տեղեկացանք, որ դեռևս օգոստոս ամսին Հայաստանում ստեղծվել է «Սասնա Ծռեր» հիմնադրամը, որն անմիջական օգնություն է հասցնում Հայաստանի բոլոր քաղբանտարկյալներին: Ուսումնասիրելով նրանց պարզ և մանրամասն հաշվետվությունները, գնահատելով այդ մարդկանց կատարած կարևոր գործը, հաշվի առնելով նաև այն հանգամանքը, որ համաձայն իրենց կանոնադրության նրանք չեն հարում որևէ կուսակցության, ինչը համընկնում էր էր նաև Լոս Անջելեսի անկուսակցական Սասնա Ծռերի սկզբունքներին, բոլոր անդամները միահամուռ որոշեցին սատար կանգնել այդ անչափ անհրաժեշտ ձեռնարկին և լծվեցին գործի:
Կազմակերպվեցին ուղիղ հեռուստակամուրջներ հիմնադրամի անդամների հետ և երկու անգամ եթեր տրվեց հեռուստատեսությամբ, այդպիսով հայ համայնքին ևս ծանոթացնելով Հայաստանի «Սասնա Ծռեր» հիմնադրամին:
Չնայած մեծ ու փոքր խոչնդոտներին, այս կարևոր և պատասխանատու աշխատանքն առաջ էր գնում մինչև այն պահը, երբ հայտնվեց ոմն Արաքսի Գրիգորյան անունով մի կին, ինքըզինքը հայտարարելով Սասնա Ծուռ և անհապաղ լծվեց իր սադրիչ և պառակտիչ գործունեությանը»,- հայտարարել է նա եւ հավելել, որ առաջին, իսկ ժողովում Արաքսի Գրիգորյանն իր «անհանգստությունը» հայտնեց և հայտարարեց, որ թափանցիկություն է ուզում: Ըստ նրա, Արաքսի Գրիգորյանը քաղբանտարկյալների ընտանիքների օգնության համար հավաքվելիք գումարները տարբեր զարտուղի ճանապարհներով ուզում էր կրճատել, պահանջելով նաև այդ փողի մի մասը տրամադրել զինվորների իրենց ֆոնդին, այդ հարցը բնականաբար մերժվեց, բայց պառակտման մեխանիզմն արդեն գործի էր դրված:

Այս հայարարությանն էլ հաջորդեց «Սասնա ծռեր» խմբավորման անդամ Պավլիկ Մանուկյանի աղջկա՝ Ասպրամ Մանուկյանի կողմից հանրայնացված՝ խմբավորման ադնամների հարազատների հայտարարությունը: «Մենք՝ «Սասնա Ծռեր»-ի ընտանիքների անդամներս կապված ԱՄՆ-ում նոյեմբերի 20-ին կազմակերպվող դրամահավաքի (թելեթոնի) հետ հայտարարում ենք, որ հաշվի առնելով մեր անվստահությունը «Սասնա Ծռեր» հիմնադրամին, չփոխանցել հավաքվելիք գումարը հիմնադրամին: Քննարկելով և ընդհանուր հայտարարի գալով խնդրում ենք հավաքված գումարը փոխանցել ԱՄՆ-ում գտնվող մեր վստահված անձանց՝ Արաքսի Գրիգորյանին, Հարություն Պետրոսյանին, Մելանյա Ջանսուզյանին, եթե ոչ, ապա խնդրում ենք չշահարկել «Սասնա Ծռեր»-ի անարատ անունը որոշ մարդկանց շահերի համար: Կից թղթում ստորագրել են «Սասնա Ծռերի» 19 ընտանիքի անդամները, իսկ մնացած բոլորը իրենց համաձայնությունը տվել են հեռախոսակապով»,- ասված է խմբավորման անդամների հարազատների հայարարությունում:

Արաքսի Գրիգորյանն էլ իր հերթին հայտարարել է, թե հավաստի տեղեկությունների համաձայն՝ Լոս Անջելոսում նախատեսված դրամահավաքը տեղ չի ունենալու: «Մենք հաղթեցինք, թող ոչ ոք չհամարձակվի Սասնա Ծռերի հաշվին հարստանա»,- իր ֆեյսբուքյան էջում գրել է Արաքսի Գրիգորյանը եւ տեղադրել մի լուսանկար, որտեղ դրամահավաք-մարաթոնը բոյկետելու կոչ էր է գրված: Իսկ ավելի ուշ նա շնորհակալություն է հայտնել ընկերներին հաջողության հասնելու համար: